1 Korintios 10:14 - Northern Tepehuan Bible

¹⁴ Gin aaduñi, kïïga gïn oigïdai aanï kaxkïdï gïn tïanïi aanï sai mai buaboitudaiña aapimï go uubixi. Gajiadïrï abïr bia gobai.

Tepehuan Northern: Diuusi ñiooquidʌ utuducami oodamicʌdʌ

¹⁴ Cascʌdʌ giñaaduñi casiavʌr maisiaa duutuada aapimʌ momoono.

1 Korintios 10:14 ပူးပေါင်းရင်းမြစ်များ

Hechos 15:20

Mosïkaxi gï aagai ix ojixdagi aatïmï sai ka mai kuadana bhabhaidi ix makïdï gï dadaxdi go momono ix makïdï xadutudai odami Diuxi dukai. Dai sai mai ïmadï boona ix makïdï maiti ïr aduñdï. Dai sai ka mai kuadana bhaabhiadï buxtaki bhaikoadï, ix makïdï mai busakïi ïradï dai koiyïrïi tudu. Dai sai mai kuadana ïradï.

Romanos 12:19

Gin aaduñi, xi ïmadutai soi gïn buidadagi, maiti gï agai xi gaagagi aapimï ix dukatai gïn sïïrhiñdagi ïgai ïmadï. Diuxi ïgai dai gï sïïrhiñdamu soimaaxi buadami ïmadï bhaiyoma. Daiñi, Diuxi ñokidï ikaiti aidï sai, Aanï ïr Tïanïdami dai aanï bia sïïrhikami xi gin sïïrhiñdagi soimaaxi buadami ïmadï. Aanï aa noraidamu soimaaxi buadami mai kïï dunakai ïgai, ikaiti go Tïanïdami.

1 Korintios 10:15

Kïïga bia aapimï tïgibudagai ixtukïdï gin maatï kaïkagi tudu kaxkïdï abïr ïïgi aagada ix bhai mai kïï aagai aanï.

1 Korintios 10:19

Dai podukai ïpï odami ix makïdï kuadana daxdaradï ïmo ubixi xadutuadan buayi go ubixi ïpï. Dïï gia tomaxi odami daxdagi kuadagai go uubixi gobai mai itïiya ïrhidi sai bia gubukarhigai go ubixi. Dai mai itïiya ïrhidi sai go daxdaragai ïr soiñi odami bïïtarï ïpï.

1 Korintios 10:7

Dai sai mai buaboitudaiña aatïmï go uubixi ïpï ix dukai ibuadana muidutai ïgai. Ibuadana ïgai ix dukatai oja go Moiseskaru ïïki tudu. Ami ojadïrï ikaiti sai, Go odami gauu daidi gaii gabagimadatai dai bhodïrï go kïkïïrhi ïmadï go oki gïn aaga idui buirudagai gatutudakïitai, ikaiti go ojai.

1 Korintios 5:11

Mai xii kïï maatï kaï aapimï go ojai tudu ix makïdï gïn otoxi aanï baasïkioma aagaitai go soimaaxi ibuadami. Kaxkïdï xibi gia kïï sïïrhi gïn aagidamu aanï sai maatïkagi aapimï ix tïiya ïrhidi gobai. Daiñi, itïiya ïrhidi gobai sai mai urapïkïda aapimï go odami ix makïdï buaboitudadami gïn aagai dai bïïxkïrï naana maaxi soimaaxi ibuayi. Maiti abïr urapïkïda tudu ix makïdï buaboitudadami gïn aagai dai apia aipako boopoiña jaa ïmadï, dai koimudadï tutuiga, dai ïïxiboga, dai kia buaboitudai ubixi, dai gïpiïrï bupai jaa odami yaatagikïdï, dai nabaakorïiña. Maiti gï aagai ix urapïkïda aapimï tomarhi kuadagiïrï ix makïdï buaboitudadami gïn aagai dai pomaaxi ibuayi.

2 Korintios 11:11

Dïï gia maiti gï agai sai po gïn ïrhiada aapimï sai maiti gïn oigïdai aanï mai taanïitai aanï tuminxi. Maiti ipïrhidi aanï ix soi gïn buada aapimï bhaiyoma. Gïn oigïdai aanï kaxkïdï. Diuxi maatï sai buaboikïdï gïn oigïdai aanï tudu.

2 Korintios 12:15

Kaxkïdï bïïxi gin bhai ïrhiarakïdï bhai aagai aanï ix gïn bïïtarï xia duadiagi bïïxi xïïxi bia aanï dai asta bïïxi gin gubukarhiga ïpï mos ïï kïïga gïn oigïdatai aanï. Daiñi, aanï gia kïïga gïn oigïdai. Asta bamioma gïn oigïdai aanï xibi ix bhai ïkioma tudu. Dïï gia aapimï ka mai xii kïïga gin oigïdai. Kïïgioma gin oigïdaitadai aapimï baasïkioma tudu. ¿Bhai ix ïr sïïrhi podukai?

2 Korintios 12:19

Gin aaduñi, kïïga gï maatï sai oidaga odami ix makïdï gin bui ñokaiña. Dïï gia maiti gï agai sai po gïn ïrhiada aapimï sai idui aanï idi ojai ïïgi gin soiña ïrhiditai buidïrï ïgai. Gï agai bhaiyoma sai maatïkagi aapimï sai bïïxi aïkatai ixtumaxi ibuadana aatïmï ïr gïn soiñaragai bïïtarï sai bamioma kabakana gïn buaboidaraga. Kaxkïdï kïïga gïn mamaakaiña aatïmï ñoki kïïga urabakatai aatïmï Suxi Kristo dai maatïkatai sai gïr nïidi Diuxi ix tuma buayi aatïmï.

2 Korintios 6:17

Maiti abïr urapïkïda go óídakami ix makïdï mai buaboitudai dai soimaaxi ibuayi. Maiti gï agai tomarhi xi taatagi aapimï go naana maaxi soimaaxkami ix makïdï ibuayi ïgai tudu. Dai ix ïko darakagi aapimï go soimaaxkamiañdïrï, aidï gia kïïgakïrï gïn nïijadamu aanï.

2 Korintios 7:1

Aapimï gin aaduñi ix makïdï kïïga oigïdai aanï, kaxi gïr aagidi Diuxi saidi gïr saagida oidaka agai ïgai. Kaxkïdï tïtai maigobai dasa bïïxi aïkatai go soimaaxkami ix makïdï gïr tukurhimadagi gïr tukuga ïmadï gïr ibhïdaga. Tïtai ïkobai óídaka bïïxi go soimaaxkamiañdïrï tudu dai go ïïgi Diuxi bïïtarï óídaka kïïga xadutudaitai aatïmï.

Filipenses 4:1

Kaxkïdï maiti abïr gïn daadagitoda aapimï gin aaduñi Diuxi amadïrï xi gïn maitiagi soimaaxi. Kaxi bïïna daraka aapimï Gïr Nukadakami tudu, kaxkïdï maiti abïr gïn dagitoda. Aapimï tudu ïr gin aaduñi dai kïïgakïrï gïn oigïdai aanï dai gïn tïtïitoi aanï gïn nïida iñïrhiditai. Aapimï tudu ïr gin bhai ïrhiaraga. Aanï in bïïtarï aapimï ïr ïmo bhai ïrhiaragai maitïki duu tudu ix makïdï bhïiyi aanï gin aaduindaga bïïtarï gïn tïïgidakai aanï go bhai ïrhiaragai aatagi.

Filemon 1:1

Bhaiga aapi Filemon. Aanï ïr Pabora dai gï otoxdi idi ojai tanai maixakaruana dakatai aanï. Gin maixatu aanï ïïgiditai aanï Suxi Kristo tudu. Dai tanai gin ïmadï daja go Timoteo ïpï. Kïïga gï oigïdai aatïmï aapi Filemon. Aapi ïr ïmo gïr aduñi Diuxiamadïrï tudu dai kïïga gïr ïmadï gaatabuayi aapi Diuxi aaduindadïrï. Kaxkïdï gï otoxdi aatïmï idi ojai aapi gï bïïtarï

Hebreos 6:9

Pomaaxi tudu. Dïï gia buaboitudai aatïmï sai mai po gïn duñimu aapimï. Kïïga gïn oigïdai aatïmï dai buaboitudai aatïmï sai mai ïpïamaaxi aapimï go dïbïrai ix makïdï xia gï buayi. Buaboitudai aatïmï bhaiyoma sai aapimï gia buimu naana maaxi kïkïïgadukami ix makïdï ïr bïïtarï odami ix makïdï ka kïïgakïrï bubuaka.

1 Pedro 2:11

Gin aaduñi, xibi gïn aagidamu aanï ïmo ñoki gïn oigïdatai aanï. Daiñi, aatïmï xibhïadïrï óídakami dukai óídaga tami oidigi daama. Idi oidigi mai kïïgakïrï ïr gïr kii tudu dai bhaiyoma go tïbagi ïr gïr kii. Kaxkïdï kïïga abïr gïn tïgitoka dai mai ïïgiada go soimaaxi ix makïdï gïn tanïdagi gïn tukuga xibi kia gïn tukugïrï óídakatai aapimï. Go soimaaxkami ix makïdï gïn tanïdagi gïn tukuga ïr buidïrï kaatïkami dukai gïn ibhïdaga tudu dai soi duada ïrhidi gobai gïn ibhïdaga.

1 Juan 5:21

Gin aaduñi, kïïga gïn oigïdai aanï dai kaxkïdï gïn aagidimi aanï sai mai buaboitudada dai mai oijada aapimï tomarhi ïmo ïma maaxi ixtumaxi. Mosïkaxi Suxi Kristo abïr oijada dai buaboituda tudu. Ïgai buaboikïdï ïr Diuxi kaxkïdï. Mosïkaxi.

Apokalipsis 13:8

Dai bhaitoma bïïxi oidigi daama óídakami xadutuada agai go kïixi Diuxi dukai. Dïï gia go odami ix makïdï ojixi go libroïrï ix makïdï bia go Arhi Kañiru ïgai gia mai xadutuada agai go gïï kïixi. Go Arhi Kañiru ïgai makïdï gï muatu dai bia ïmo libro xako ojixi odami ix makïdï bïïxkïrï bïïtarï óídaka agai. Aidï abhiadïrï xi mai kia kïkibatadai oidigi biakana ïgai go libro tudu. Dai odami ix makïdï ojixi ami libroïrï gia mai xadutuada agai go gïï kïixi.

Apokalipsis 2:14

Dïï bïïxkïrï oidaga ixtukïdï mai bhai gin ïrhidi aapimïkïdï. Daiñi, oidaga ïïmoko gïn saagida ix makïdï mamaakai soimaaxi aatagi ïpïan dukai idui go kïïrhi Balaam tïgidukïdï ïïki. Kïï maatï aapimï tudu sai go Balaam maa ñoki go kïïrhi Balak tïgidukïdï dai aagidi ixdukatai gïpiïrï daitudana ïgai go Israelitas. Aagidi go Balaam go Balak sai abïnakidiña ïgai go Israelitas sai kuadana kuadagai ix makïdï gï dadaxditadai uubixi. Arhiïxi ïr soimaaxi gobai. Dai aagidi ïpï sai abïnakidiña ïgai go Israelitas sai ïmadï bopoiña jaa aipakoga ix makïdï maiti ïr aduñdï.

Apokalipsis 21:8

Dïï jaa gia surhigimu aanï go gïï taiyïrï ix makïdï mïmïjïi asufrekïdï. Taiyïrï surhigimu aanï bïïxkatai ix makïdï dagito xi maitiagi duadimudagai tudu dai ix makïdï mai buaboitudai dai ix makïdï tukurhimagi ïïgi ibhïadï soimaaxi ibuadatai. Surhigimu aanï ix makïdï ïr gakodadami ïpï dai ix makïdï ïmadï bopoyiña jaa aipakoga dai taapïgami dai ix makïdï xadutudai uubixi dai ix makïdï ïr yaatabogami. Bïïxkatai ïgai gïn ajiagai xi go gïï taiyïrï surhigiagi. Gobai ïr go kugadïrï mukigami agaikïdï tudu— in tïtïdai Diuxi.

Apokalipsis 22:15

Dïï gia kidigamadïrï bimu bïïxkatai ix makïdï tukuraga iibhïadï mai buaboidaitai ïgai. Dukami taapïgami dai odami ix makïdï ïmadï bopoyiña jaa aipakoga dai gakodadami dai ix makïdï xadutudai uubixi dai ix makïdï yaataboga. Bïïxkatai ïgai kidigamadïrï bimu.