1Tesalonicenses 4:5 - Northern Tepehuan Bible

⁵ Maiti gï agai tudu ix ïïgiada aapimï gïn tukuga xïïxkadï gïn tanïda gobai sai soimaaxi ibuada aapimï. Daiñi, go gaa ix makïdï mai buaboitudai Diuxi adaimïiña ixtumaxi ipïrhidi ïïgi tukugadï dai aapimï maiti gï agai ix pobuadagi.

Tepehuan Northern: Diuusi ñiooquidʌ utuducami oodamicʌdʌ

⁵ dai maisiu ivuaadagi ʌgaicʌdʌ istumaasi ipʌlidi isducatai ivueeyi ʌgai ismaacʌdʌ maivaavoitudai Diuusi mosʌcaasi isducatai gʌaagai.

1Tesalonicenses 4:5 ပူးပေါင်းရင်းမြစ်များ

Mataibo 6:32

—Gobai ïr ix makïdï adaimïi odami ix makïdï mai buaboitudai Diuxi tudu. Gokïdï buamï gïn ïrhidiña ïgai. Maiti gï agai gobai tudu. Diuxi gïr Oga ix makïdï tïbagiana daja kïïga maatï ixtumaxi tïgitokana aapimï kaxkïdï— itïtïdai.

Lukas 12:30

Daiñi, bïïxi go gaa óídakami ix makïdï mai buaboitudai gobai bïïxkïrï mos pomaaxiïrï gïn tïtïitoiña. Dïï gia aapimï gia bia Diuxi gïn Oga ix makïdï gïn nukadai dai ïgai kïï maatï ixtuma tïgito aapimï.

Hechos 17:23

Nobai aimïraitadai aanï dai tïï mui ïïmapïkïrï xako ibuayi aapimï xadutudaragai ïgai bïïtarï. Dai tïï aanï ïmo daxdakarui ïpï dai ami go daxdakaruana ojixi sai, IDI DAXDAKAUI ÏR ÏMAI DIUXI BÏÏTARÏ IX MAKÏDÏ AATÏMÏ MAI MAATÏ. XÏDUÑADA OIDAKAGI ÏMAI DIUXI XIBHÏAKOGA DAI AATÏMÏ MAI MAATÏ, ikaiti go ojixikami. Xibi aanï gïn aagidamu xorai idi ix makïdï xadutudai aapimï mai maatïkatai— itïtïdai Pabora.

Romanos 1:24

Kaxkïdï Diuxi dagito odami xi adaimudagi ïïgi gïn tïgibudaga saidi budana ïgai bïïxi ixtumaxi soimaaxkami ix makïdï iduña ïrhidiña ïgai. Dai odami idui naana maaxi xaïraragai maaxi gïn tukugakïdï.

Romanos 1:26

Kaxkïdï Diuxi dagito odami xi galnaxi buadagi, ïïgi ix dukatai gïn tïgito ïgai dai iduña ïrhiditadai. Dai ïïmoko go oki dagito ixtumaxi ïr sïïrhi dai abhana boi jaa oki. ¡Maiti gï agai podukai di!

Romanos 1:28

Odami maiti ipïrhi xi xadutuadagi Diuxi tudu. Kaxkïdï Diuxi dagito xi adaimuagi ïgai tïgibudagai ix makïdï maiti ïr sïïrhi. Dagito ïgai xi odami ibuadagi naana maaxi ix makïdï maiti agai xi ibuadagi.

1 Korintios 1:21

Dïï gia Diuxi tïgibudadï gia saitudaga. Dai ïgai podukai gï tïgito dai podukai dáí sai odami tïgibudadïkïdï mai kïïga maatïkana odami Diuxi. Diuxi bhai ïrhi bhaiyoma sai mosïkaxi odami ix makïdï buaboitudagi go bhai ïrhiaragai aatagi gia kïïgakïrï bubuakïna. Dïï óídakami mos buirudagai dukai kaïkana go bhai ïrhiaragai aatagi dai mai buaboitudai.

1 Korintios 15:34

Kïïga abïr gïn tïgito tudu daidi maigobai dasa go soimaaxi tïgibudagai. Daiñi, aanï aagai sai ïïmadutai ix makïdï gïn urapïkïi gïn ïmpaiñdaragïrï mai maatï Diuxi. Gï agaitadai ix soiñamudai aapimï sai maatïkana dïï mai kia soi aapimï dai gokïdï gï agaitadai ix xaïradagi aapimï.

Galatas 4:8

Dïï bïïxkïrï duadikui aanï xïduñada ïpamu oi aapimï gïn ïïkidadï buaboidaragai dai go aaduindagai ix makïdï idui aanï gïn saagida ka maiti ibuadagi soiñi. Daiñi, ïkioma didiuxi dukai nïidiña aapimï naana maaxi ixtumaxi dukami uubixi maaxi dai biakana aapimï xi gaatabuadagi pipioñi dukai ïïgiditai pomaaxi buaboidaragai. Aidï mai kia maatïkatadai aapimï ïgai ix makïdï ïr Diuxi kïïgakïrï kaxkïdï.

Efesios 2:12

Tïgitobïrai ïpï sai aidï maiti gïn ajïakatadai xi gïn soikïdagi Suxi Kristo dai mai biakatadai aapimï urabaragai ïmadï go Israelitas. Diuxi bhai dui ñoki go Israelitas ïmadï dai aagidi saidi iduñagai naana maaxi ixtumaxi ïgai bïïtarï dïï aapimï maiti ïr gïn bïïtarïkatadai gobai. Aapimï mai biakatadai soiñi aidï dai mos óídakaiña mai maatïkatai Diuxi.

Kolosenses 3:5

Kaxkïdï abïr dagitoda ixtumaxi ibuadana aapimï aidïxi oidiña aapimï gïn ïkidadï oidakaraga. Maiti abïr ïmadï bopoda tudu ix makïdï maiti ïr gïn aduñi dai maiti abïr tïtïgito ajiopada podukai ïpï. Maiti abïr ibuada ïrhiada buirudagai tudu. Dai maiti abïr koimudadï tutiaka. Tomaxorai ix makïdï koimudadï tutiakagi ïpïan dukamikana ix makïdï Diuxi dukai nïidi ixtumaxi ix makïdï maiti ïr Diuxi. Ïgai bamioma namïakami dukai nïidi ixtumaxi oidaga tami oidigi daama dai mai pokaxi namïakami dukai nïidi ïgai Diuxi.

2 Tesalonicenses 1:8

Dai aidï gï sïïrhiñdamu Suxi ïmadï go odami ix makïdï maiti ipïrhi ix urabagi Diuxi. Gïgïbituldamu ïgai tudu ix makïdï mai buaboitu go bhai ïrhiaragai aatagi ix makïdï aagai Suxi Kristo.

1 Pedro 4:3

Ïkioma gia ibuadana aapimï go soimaaxkami ix makïdï ojoidi xi ibuadagi odami ix makïdï ïkobai daraka Diuxiañdïrï. Ïgai ojoidi xi ïmadï bodagi jaa aipakoga ix makïdï maiti ïr aduñdï dai xi nabaakotïrïdagi. Ibuayi ïgai naana maaxi buirudagai bagimigadïrï dai buaboitudai ïgai uubixi. Gobai ïr ïmo galnaxi buirudagai Diuxi buidïrï.