1Tesalonicenses 2:4 - Northern Tepehuan Bible

⁴ Bhaiyoma Diuxi kïïga maatï ixdukatai aatabuayi aatïmï dai bhai aa tïxi aipakoga aituldana odami go bhai ïrhiaragai aatagi. Diuxi bïïxi maatï asta ixtuma tïtïitoi aatïmï tudu dai kaxkïdï ñokai aatïmï ixdukatai Diuxi ipïrhidi dai mai xu ixdukatai odami ipïrhidi.

Tepehuan Northern: Diuusi ñiooquidʌ utuducami oodamicʌdʌ

⁴ Baiyoma Diuusi ʌcovai gʌrvuvaitu dai gʌrootoi tʌsai gʌnaagidana Diuusi ñiooquidʌ dai gomaasi ʌgai ismaacʌdʌ gʌnaagidi aatʌmʌ. Aatʌmʌ ivueeyi istumaasi Diuusi ipʌlidi dai maisiu istumaasi ʌoodami ipʌlidi. Diuusi ʌgai dai maatʌ gʌriibʌdaga iscʌcʌʌgadu ischo ʌʌpʌ.

1Tesalonicenses 2:4 ပူးပေါင်းရင်းမြစ်များ

Lukas 12:42

Dai Suxi potïtïdai, —Go ñoki gobai ïr toma xorai bïïtarï ix makïdï ïr pipioñikagi duu kïïga ïïgidarakan tuigakami dai biakami kïïga tïgibudagai. Daiñi, ïmo ga amu ix makïdï muidukagi pipioñigadï xïxkadï xibhï imi agadagi gaagaiña ïmo pioñigadï ix makïdï kïïga ïïgidarakagi dai ix makïdï kïïgadu tïgibudadï. Dai tïïgakai ïgai ïmoko pomaaxkami nukaturhiña ïgai go gaa pipioñi sai nukadakana ïgai dai sai bhibhidiña xïïxkadï gï agadagi— itïtïdai.

Lukas 16:11

Kaxkïdï gï agai aapimï xi kïïga ibuadagi gïn buxtuidagakïdï ix makïdï bipiatu aapimï tami oidigi daama. Gobai ix makïdï oidaga tami oidigi daama mai xii ïr namïakami tudu. ¿Dïï gia xi mai kïïga ibuadagi aapimï gokïdï aidï gia dukatai gïn nukatuldana Diuxi ixtumaxi kïïgakïrï ïr namïakami ix makïdï gamamaakai ïgai tïbagiañdïrï?—

VUAANA 21:17

Dai bhodïrï ïpamu potïtïdai ïgai, —Aapi Ximuñi ix makïdï ïr Juan maradï ¿Gin oigïdai pïxi?— itïtïdai. Baikojo podukai tïkakai go Suxi go Piduru dai kaxkïdï soi gï ïrhi go Piduru daidi itïtïdai ïgai go Suxi, —Aapi gin Tïanïdamiga kïï maatï bïïxi aïkatai. Dai kïïga maatï aapi ix aanï gï oigïdai— itïtïdai. Daidi go Suxi itïtïdai, —Kïïga saadaka gin sosoiga kañiru— itïtïdai.

Romanos 8:27

Diuxi kïï maatï ix tïtïitoi odami dai kïi maatï ïpï ix tïiya ïrhidi Diuxi Ibhïadï daanïitai gïr bïïtarï. Diuxi Ibhïadï daanïi ixtumaxi Diuxi ipïrhidi gïr bïïtarï tudu.

1 Korintios 7:25

Xibi maakimu aanï ñoki ix makïdï mai kia kukuna. Dai tomaxi Gïr Nukadakami maiti gïr maa ñoki idikïdï dïï gia kïï tuiga ïgai gin bïïtarï dai gin maakaiña gubukarhigai ix kïï sïïrhi ñokada aanï kaxkïdï gï aagai ix buaboitudada aapimï gin ñoki.

1 Korintios 9:17

Kaxkïdï tudu tomaxi maiti ipïrhiadagi aanï ix aagagi go bhai ïrhiaragai aatagi tomax dukai bia aanï sïïrhikami ix aagagi dai mai tipu maitïki gin bïïtarï. Dïï gia ix ïïgi gin bhai ïrhiaragakïdï aagagi aanï aidï gia kïïga buyiña aanï maitïki.

2 Korintios 2:17

Diuxi ïgai dai gïr maa ïmo sïïrhikami tudu. Dai kaxkïdï Diuxi gubukarhigadïkïdï aatabuayi aatïmï dai kïïga sïïrhi ñokai aatïmï ojotosadïkatai aatïmï Suxi Kristo. Dai mai xu xi tuminxikïdï gaatabuayi aatïmï gatïtïïgiditai Diuxi ñokidï aipakoga. Jaa gia go ïï tuminxikïdï gatïtïïgidiña ñoki dïï aatïmï gia cho. Kïïga maatï aatïmï sai Diuxi bïïxi nïidi ixtuma ibuadagi aatïmï kaxkïdï.

2 Korintios 4:2

aagaitai ixtumaxi ïr buaboi. Oidaga jaa ix makïdï ïxtotai dukai ibuadana naana maaxi xaïrarakami dai bupuirumadai ïgai óídakami mai sïïrhi aagaitai ïgai Diuxi ñokidï. Dïï gia aanï ïmadï ix makïdï gin soikïi gin aaduindagïrï mai pobuayi. Aatïmï bhaiyoma aagai mosïkaxi ixtumaxi ïr buaboi gïr nïiditai Diuxi. Pobuayi aatïmï saidi bïïxi óídakami kïïga maatïkana iibhïadïrï sai mai yaatagïi aatïmï.

2 Korintios 5:11

Sïïrhikïdï gïr tïgito ajiopaiña aatïmï sai ayi agai ixtuigako aagada agai Gïr Nukadakami ix tumaxi ajïaka agai bïïxi óídakami tudu. Dai kaxkïdï kabami abïnakidiña aatïmï óídakami saidi buaboitudaiña ïgai gïr ñoki. Diuxi kïï maatï ix tutuiga aatïmï dai ix mai yaatagïi aatïmï gatïtïïgiditai ñoki. Dai ipïrhidi aatïmï sai aapimï ïpï maatïkana gïn iibhïdagïrï ix tutuiga aatïmï dai sai mai yaatagïi aatïmï.

2 Korintios 5:16

Kïïga maatï aatïmï xibi sai Suxi Kristo muu bïïxi óídakami bïïtarï tudu dai kaxkïdï ka ïma dukai nïidi aatïmï óídakami dai mai xu ixdukatai nïidiña aatïmï ïkioma. Ka ïmai tïgibudagaikïdï nïidi aatïmï odami tudu dai mai xu xi go tïgibudadïkïdï ix makïdï go gaa oidigi daama óídakami oidiña. Dai xibi ka ïma dukai nïidi aatïmï Suxi Kristo ïpï. Ïkioma mai kïïgakïrï nïidiña aatïmï ïgai. Ïkioma nïidiña aatïmï ixdukai go ix makïdï mai buaboitudai nïidi tudu. Dïï xibi gia ka buaboitudakai aatïmï ka gïïpi ïma dukai nïidi aatïmï go Suxi.

Galatas 1:10

Daiñi, aanï kïïga buamï in ïrhidi ix tïiyagi Diuxi nïiditai ïgai ix dukatai gatïtïïgidi aanï aatagi. Dïï gia mai buamï ïrhidi aanï ix tïiyagi odami. Mosïkaxi Diuxi buamï ïrhidi aanï ix tïiyagi tudu. Daiñi, oidaga odami ix makïdï pokaitiña sai aanï naana dukai aagaiña aatagi aagaitai ïïgi ixtumaxi kaïka ïrhiada odami. Pokaitiña ïgai sai aanï mos gaagaiña ix dukatai kïïgakïrï gin nïijadagi óídakami. Dïï maiti ïr buaboi gobai. Aanï ipïrhidi bhaiyoma sai kïïgakïrï gin nïijadagi Diuxi pioñigadïkatai aanï Suxi Kristo dai mai xu xi ipïrhidi aanï xi odami kïïgakïrï gin nïijadagi. Ka aagai aanï tudu sai xorai mai sïïrhi aagagi go bhai ïrhiaragai aatagi gï agai xi taatagi gïgïbidaragai bïïxkïrï bïïtarï. ¿Kaxkïdï dukatai naana dukai aagaiña aanï go aatagi? Mai bhaiga. Maatiga maaxi gobai di. Pioñigadï aanï Suxi Kristo tudu xi kaxkïdï bia aanï xi sïïrhi aagagi go aatagi dai mai xu xi mos aagagi aanï ixtumaxi odami kaïka ïrhiadagi.

Galatas 2:7

Bhai aa ïgai tudu sai kïïgadu ix duu aagai aanï sai go buaboitudadami mai bia xi ïïgiadagi go sïïrhikamigadï Moises dai sai maiti gï agai xi gïn circuncidandoagi ïgai ïpï sai kïï biïna Diuxi ïmadï. Kïïga maatï tïï ïgai sai Diuxi kïï tuiga gin bïïtarï gin maakaitai ïmo sïïrhikami. Kaxkïdï bhai aa ïgai sai kïïgadu gin aatagi. Maatï tïï ïgai tudu sai ïpïan dukai xi Diuxi maa sïïrhikami go Piduru ix tïtïgiadagi ïgai ñoki go judidiu podukai gin maa Diuxi sïïrhikami aanï xi tïtïgiada aanï ñoki go ix makïdï maiti ïr judidiu. Sai tïtïgiada aanï go bhai ïrhiaragai aatagi tudu. Dai asta pobai in tïtïdai go bhaitï gukakami sai aanï ïmadï go Bernabé ïr ïmo aadunumï ïgai ïmadï. Dai gïr aagidi ïgai sai aatïmï aituldana aatagi go odami ix makïdï maiti ïr judidiu dai ïgai aitulda aagai aatagi go ix makïdï gia ïr judidiu. Pobai gïr tïtïdai go kïkïïrhi ix makïdï odami bamioma xadutudai tudu. Dïï gia gï agai xi maatïkagi aapimï sai Diuxi ïmadugan dukai nïidi bïïxi odami dai kaxkïdï aanï in bïïtarï go bhaitï gukakami mos ïr kïkïïrhi ïpïandukai toma xorai tomaxi odami gia bamioma tïtïanïdami dukai nïidi. Kïïga bhai aa ïgai tudu sai kïïgadu gïr aaduindaga dai maiti gïr aagidi ïgai sai ïma dukai gatïtïïgiada aatïmï aatagi.

Efesios 3:8

Daiñi, tomaxi aanï ïr ïmo buaboitudadami bamioma mai namïakïdï, bïïxkïrï Diuxi gin maakai idi gïdukami bhai ïrhiaragai. Gin maa ïgai xi aagidagi aanï go ix makïdï maiti ïr judidiu xïï kïï tuiga Suxi Kristo gïr bïïtarï bïïnakai aatïmï ïgai. Odami tïgibudadï mai ajïi ix maatiagi xïïxi ïr namïakami Suxi Kristo gïr bïïtarï tudu.

Efesios 6:6

Kabami abïr gïn aaga gïn aaduindagïrï dai mai xu mos gïn nïiditai gïn amu. Aapimï ïr pipioñigadï Suxi Kristo tudu kaxkïdï abïr bïïxi gïn bhai ïrhiarakïdï ibuada ixdukatai ipïrhidi Diuxi.

Kolosenses 3:22

Dai aapimï ix makïdï ïr pipioñi, kïïga abïr ïïgiada gïn amu ix makïdï bia aapimï tami oidigi daama. Dai mai xu xi mosïkaxi ïïgiada aapimï xïïxkadï gïn nïijadagi ïgai buamï gïn ïrhiditai ix tïiyagi ïgai. Bïïxi gïn ibhïdagakïdï abïr ïïgiada bhaiyoma ïmo xadutudaragai dukai Gïr Nukadakami bïïtarï.

1 Tomoteo 6:20

Aapi Timoteo, kïïga inukada go buaboidaragai ix makïdï gï nukaturhi Diuxi. Gï agai xi kïï sïïrhi tïtïgiada aapi gobai sai mai gai imïna tudu. Dai maiti urapïkïda aapi aagadami aatagi ix makïdï ïr ïïgi odami tïgibudadï dai ix makïdï maiti ïr soiñi. Naana maaxi aagai ixtumaxi tudu. Pokaitiña ïgai saidi ïr mamaatïkami dïï maiti ïr buaboi. Maiti urapïkïda ïgai tudu.

2 Timoteo 1:14

Daiñi, Diuxi gï nukaturhi go kïïgadukïdï aatagi kaxkïdï maiti gï dagitoda aapi ix kuga imiagi gï aatagi xïïxkadï gatïtïïgiada aapi ñoki. Kïï sïïrhi aagada tudu. Dai Diuxi Ibhïadï ix makïdï gïr ïmadï daja gï soiñamu sai podukai kïï nukadakana aapi go aatagi.

2 Timoteo 2:2

Aapi Timoteo kïïga kaïkana gin aatagi dai jaa mui kaïkana ïpï dai aagai saidi ïr buaboi. Dai xibi gï agai xi nukatulda aapi go aatagi jaa kïkïïrhi sai maigobioma aituldana ïgai ï galbaaxi aatagi. Gï agai xi nukatulda aapi jaa ix makïdï sïïrhi aatabuayi tudu sai mai sarabidagi gobai ïma maaxi aatagi. Dai Diuxi gï maakimu gubukarhigai idi aaduindagai bïïtarï.

Tito 1:3

Diuxi ïr gïr kïïgakïrï bubiadamiga dai kaxkïdï aidïxi ka ayitadai ixtuigako ïgai ipïrhi aidïpïrï gïr maa ïgai ñokidï. Dai xibi gin maa ïgai aaduindagai sai aipakoga aituldana aanï gobai.

Hebreos 4:13

Mai tipu ixtumaxi ïxtokikagi Diuxi buitapi tudu. Bïïxi aïkatai mos maaxiko kaatïkana Diuxi buidïrï. Dai ïgai buitapi bia aatïmï xi aagadagi ix tumaxi dui aatïmï tami idi oidigi daama.

1 Pedro 4:11

Dukami, ix makïdï gatïtïïgiadagi ñoki gï agai sai kïïga ñokadagi ñokiturhikatai ïgai Diuxi. Dai ix makïdï soikïdagi jaa gï agai sai kabami gï aajagïdagi soikïitai bïïxi go gubukarhigaikïdï ix makïdï gamamaakai Diuxi. Bïïxi ixtumaxi ibuadagi aapimï abïr Diuxi gubukarhigadïkïdï ibuada saidi jaa xadutuadana Diuxi nïiditai ixtumaxi ibuayi aapimï gïn soikïitai Suxi Kristo. Suxi Kristo ïgai dai bïïxi adaama gï xadutuada agai bïïxkïrï bïïtarï tudu dai bïïxi adaama gatïanïda agai ïgai ïpï. Gobai gia ïr buaboi.

Apokalipsis 2:23

Dai kodamu aanï ix makïdï ïïgidi aatagidï ïpï. Aidï gia bïïxi go buaboitudadami ix makïdï aipakoga gïn ïmpaidiña maatï nïijadamu sai aanï bïïxi maatï ixtumaxi tïtïitoi odami dai ixtumaxi ibuada ïrhidiña ïpï. Dai maatïkamu ïgai xi aanï maakimu ixtumaxi ajïakagi bïïxi odami. Gobai ïr go ñoki ix makïdï bia aanï go soimaaxi ibuadami bïïtarï.