41 Mbi te nasɔke ekumu ai bato.
Na esako ebato, na ekumu eNjambe, bapala gbo oko esako ebato.
Tati ko esɔkɔ mbi, editi tati emoto. Mbi ko nabali ngando ji bo oheleni.
Ino ko otapalakani bodoa ai mbi bo osɛni bomɔ.
Najebaka bo ino opelitini ngɛnjɔ eNjambe a tei enu.
Ino odini bojima na ye? mojɔ bo osɔkɔni oko ekumu enu ai bato batongo; otadukakani nongo ekumu yena ehulaka ai Njambe pɛ.
Yesu ajeba bo bakanaka bo bamopee na ngulu bo bamobakee kumu. Oko boa adonga, na akɛ a mono oko yo buki pɛ.
Yona okojaka na kpaci ende mɛnɛ apalaka bo asakumejae. Yona ko opalaka bo akumejae yona omoloma, yo adi moto osoti, na bokosea boditi a tei ende.
Mbi nitadukaka ekumu a mojɔ mombi mɛnɛ; okina adi yona oedukaka, na yo asambejaka.
Yesu abasɔmbeja bo, Nakasakumeja mbi mɛnɛ, ekumu embi edi boda eka engasa. Iyona okumejaka mbi, oko Sangwa ’mbi; na ino obalakani bo yo adi Njambe onu.
Boipala bo bato bakumejae so, isa no bɛnɛ, isa bato batongo. Nongo adaka so babwɛnji baMasiya, boipala bo bodae muna ai no.
Mojɔ bo obeamani a njea emina, cina bo Masiya yo mɛnɛ adingoa a mojɔ menu, na akinea no ekoaneli bo osuseni mɔɔlɛ mande.
Iyo asɔ bosakoa na ekumu ai Njambe Sango yana ahula kɔpi a ekumu eDiko ai yo bo, Iyoyo adi Mwana’mbi ongɛnjɔ; nasepaka na nde bou.
