Yohana 5:39 - Eriiraghano Eriihë

³⁹ “Inyu moghwiköngʼi chwee ghusöma Amandëkö Amatööbhiyu gho kubha mokwihëëbha kubha moghotora kubhöna muyo obhuhöru bho miishe ghyose. Amandëkö ghayo ghayo nigho ghaghungambëra eni.

Yohana 5:39 ပူးပေါင်းရင်းမြစ်များ

Mataayo 22:29

Yesu akabhagharokeri akabhugha, “Morumeeriri gho kubha moteeche ghano ghaandëkuru mo‑Mandëkö Amatööbhiyu, wiiki moteeche obhotoro bho Ryobha kebhuno bhoonyi.

Maariko 10:3

Yesu akabhagharokeri akabhugha, “Musa ꞉naabharagheriiri emeghiro ke?”

Maariko 12:10

Kana, motaamara musöma Amandëkö Amatööbhiyu ghano? ‘Eriibhohe rino abhaabhëki ꞉bhaangiri, niryo ribheere eriibhohe ikoro re bhoroso.

Ruuka 16:29

Amare, Abhurahamu aghagharokeri akabhugha, ‘Bhaömöönyu bhayo, mbaanyi na amangʼana ghano ghaandëkuru na Musa na abharööti. Mbakwëndëru ghoghatëghëërëra ghayo!’

Ruuka 16:31

Abhurahamu akamugharokeri akabhugha, ‘Bhaömöönyu bhayo, aribha bhataaghotereera ghano ghaandëkuru na Musa na abharööti, bhataaghotereera koru aribha omooto angaryoka koru mo‑bhaku.’”

Ruuka 24:25

Yesu akabhabhoorera akabhugha, “Aa! Inyu m‑bhaghëëghë moonyi! Neke moonyi bhaköngʼu mo‑chaakörö cheenyu ghokumi koru ghano ꞉ghaasiikiiru na abharööti?

Ruuka 24:27

Niho, Yesu akabhëërëkërëri amangʼana ghoose ghano ghaandëkuru ighoro yaache, korwera mo‑Mandëkö gha Musa, na mo‑Mandëkö ghoose gha bharööti.

Ruuka 24:44

Akamara akabhabhoorera akabhugha, “Eriibhagha neere nekeere neenyi haghirohamu na niinyu, ghano, nigho amangʼana ghaane ghano ꞉neebhabhooriire, kubha ghoose ghano ghaandëkuru ighoro yaane ngakwëndëru ghahikeerane. Ibhe mo‑meghiro ghe Musa, na mo‑Mandëkö gha bharööti, na gha Sabhuri.”

Yohana 1:45

Mbe, Bhiiribho akamubhöna Natanaheri, akamobhoorera akabhugha, “Ntomorooche omooto uno Musa andëkiri amangʼana ghaache mo‑ghitabhu ke Meghiro, wiiki uno abharööti ꞉bhaandëkiri amangʼana ghaache. Eriina reeche n‑Yesu o Nasareeti, mwërëëti o Yusubhu.”

Yohana 5:32

Amare Taata naghungambëra amangʼana ghaane ghokoonyu, na neeni nyeeche kubha amaghambo ghoose ghano aghughamba ighoro yaane n‑gha hëënë.

Yohana 5:36

Amare eni neenyi no obhwibhateri bhokoro chwee ghokera bhuure bho Yohana. Gho ghayo, emeremo ghino Taata aheere ghuköra nighyo ghino gheghungambëra kubha Waryobha Taata niwe antomiri.

Yohana 5:40

Amare inyu motaakwënda kuucha ghokoone, kubha mubhönë obhuhöru bho miishe ghyose.

Yohana 5:46

Aribha mahëënë mongamokumiri Musa, mbe, mongatoriri ghonkumi na neeni, gho kubha Musa ꞉naandëkiri amangʼana ghaane.

Yohana 7:52

Ibho bhakamugharokeri Nikoteemu bhakabhugha, “Kana, na niiye noruure Ghariraaya? Nooghi wisunche wiiki bhoheene Amandëkö Amatööbhiyu, mbe, na niiye nokumënya kubha taanyi‑ho omurööti uno aghotora koru Ghariraaya.”

Amaköri gha Bhatomu 13:27

Mbe, gho kubha abhaato bha Yerusareemu na abhakangati bhaabho bhataamënyiri kubha Yesu niwe Omotoori, gho ghayo, ꞉mbaamoteniire ekiina itu. Gho ghuköra hangʼu niho ꞉bhaahikeriine amangʼana ghano ꞉ghaare ghaandëkuru ighoro yaache mo‑bhitabhu bhe bharööti, amare ibho bhataaghamënyiri, na nigho ꞉ghaare gharasömu chaasiko choose che Riikane.

Amaköri gha Bhatomu 17:11

Abhaato bha hayo Bherooya mbaare abhaato bhahöriicho chwee ghokera bha Tesaronike. Hano Bhawuro abharaghaniiri angʼana e Ryobha, bhakayiishereri kwo miigha chwee. Bhaakabha bharaghiisuncha Amandëkö Amatööbhiyu chaasiko choose, kubha bharighi aribha ghayo Bhawuro akobhugha n‑gha hëënë.

Amaköri gha Bhatomu 26:27

Oo omutëmi Aghiribha, noghoghakumi ghoose ghano ꞉ghaasiikiiru na abharööti? Eni nyeeche bhoheene kubha noghoghakumi.”

Abharuumi 1:2

Angʼana Anchömu iyo, niyo ino Eryobha ꞉riiraghiri korwera kare, kohetera mo‑bharööti bhaache mo‑Mandëkö Amatööbhiyu.

Abharuumi 3:2

M‑mahëënë, kubha Omuyahuuti nkoonyi no obhwëra bhwaru. Angʼana a yimbërë n‑kubha, Eryobha ndebhaheere Abhayahuuti amangʼana ghaache.

Abhakorosaayi 3:16

Angʼana e Kirisito yiikare kwo bhwaru moose yaanyu. Mwegherani, na ghutöngërana mo‑mangʼiini ghoose. Moryembere Eryobha gho Sabhuri, na kwo myembo, na gho chatensi che mo‑metema. Hano mookubha moraryembera, mubhe morariitabheri mo‑metema gheenyu.

Abheebhuraaniya 11:16

Amare abhaato bhayo mbaare bhariighomba ase anchömu chwee. Ase iyo n‑ase e Mwishaaro. Nikyo Eryobha retaakorighi chaasoni kobherekeru Eryobha reebho, gho kubha ndimariri ghusëëmi omoghya gho ghiri yaabho.

Abheebhuraaniya 11:35

Obhokumi ꞉mbuuköriri abhakari nyarebhe bhaghasongʼaana abhahiiri bhaabho bhano ꞉bhaare bhakuure, amare bhakaryoka. Abhande ꞉mbaanyahaaruru chwee na ghwitu, amare bhatiisheriiri ghotighooroku, gho kubha mbaare bhariitëngʼëra kubha, Eryobha ndengabharyokiri na kobhaha obhuhöru bhuno bhoonyi no obhwëra chwee.

Obhohunyurëru 19:10

Niho neghagho kebhuuma ambërë e marayika uyo, kubha nemusëngërë. Amare akamboorera akabhugha, “Tigha! Eni woose n‑omutamishi mughëndi waacho neenyi. Nturëngʼiine na abhahiiri bhaacho abharööti, na abhande bhoose bhano bhakoruusi obhwibhateri ighoro e Yesu. Mbe, usëngërë Eryobha eryene chiri! Gho kubha, obhuhëënë bhuno Yesu ërëkiri, nibho bhoghughëri abhaato bhararuusi obhurööti.”