Yohana 14:26 - Eriiraghano Eriihë

²⁶ Amare Omotoorereri uyo, egheteemoro keeche n‑Akörö Ahörëëru, ino Taata akoyetoma ghokoonyu kwo riina reene, nekobheeghi na kobhahiiti ghoose ghano neere nebhabhooriire.

Yohana 14:26 ပူးပေါင်းရင်းမြစ်များ

Mataayo 1:18

Ghano nigho amangʼana gha kwibhoru kwo Yesu Kirisito. Mariyamu nyina Yesu, naare arwachiiru obhuku na Yusubhu. Amare hano bhaare bhakeere komisi haghirohamu, Mariyamu akarighibhu n‑inda anyi kwo bhotoro bho Körö Ahörëëru.

Mataayo 1:20

Eriibhagha Yusubhu are ariihëëbha ghayo, mööhi marayika o Mutëmi akamorwera mo‑riröötö, akamobhoorera akabhugha, “Yusubhu, omoona o Tawuti, otatiina komokwira Mariyamu, gho kubha anda yaache nayebhwine kwo bhotoro bho Körö Ahörëëru.

Mataayo 28:19

Mbe, mughëndë kwo bhaato bha matöngö ghoose na kobhaköra kubha abhaanabheegha bhaane. Mobhakörë bhabhe abhaanabheegha bhaane gho kobhabhatiisa, kwo riina re Taata, na re Moona na re Akörö Ahörëëru.

Mataayo 3:11

“Eni nekobhabhatiisa kwo manche kwërëki kubha motuukuuniri amasari ghaanyu. Amare uno akuucha anyuma yaane, iwe nakobhabhatiisa gho Körö Ahörëëru na kwo mororo. Omooto uyo naanyi na changuru ghonkera, koru nteekurëngʼaanera ghughëgha ebhekwera bheeche.

Maariko 12:36

Tawuti omwene ꞉naakangaturu na Akörö Ahörëëru, akabhugha, ‘Omutëmi Waryobha ꞉naamobhooriire Omutëmi waane, Wiikare eribhaara re kubhökö koone gho kwiro, mbagha neghukörë okinde abhabhisa bhaacho, na kobhakangata.’

Maariko 13:11

Hano abhaato bhayo bhakobhaghööta na kobhahira mo‑mabharacha na ghoteneru ekiina, motiinyaaki ighoro e ghano moghosiikëra. Mosiikërë ryoryose rino mokuhaabhu ne Eryobha eriibhagha riyo riyo. Taanyi inyu abheene moghosiikëra, amare n‑Akörö Ahörëëru ino enyi moose yaanyu niyo eghosiikëra.

Ruuka 1:15

gho kubha omoona uyo naakubha omokoro ambërë e Mutëmi. Omoona uyo ataacha kunyo amaro ghoghoose ghaare. Korwera mo‑nda e nyina, naakubha ichoriibhu Akörö Ahörëëru.

Ruuka 1:35

Akamugharokeri akabhugha, “Akörö Ahörëëru neghoghwikera, no obhotoro bho Ryobha Omokoro o Bhyose, mbookubha ighoro yaacho ghe kiriiri. Omoona uyo okwibhora, naakubha omwahöru, naakubha arabherekeru Omoona o Ryobha.

Ruuka 1:41

Rusabheeti, hano oghwire erikëërani re Mariyamu, omoona uno anyi mo‑nda yaache aghatuumatuuma. Hayo hayo, aghiichöribhu Akörö Ahörëëru,

Ruuka 1:67

Sakariya, ishe omoona uyo, aghiichöribhu Akörö Ahörëëru, akaruusi obhurööti arabhugha,

Ruuka 11:13

Nangabha moonyi bha masari, mweche kobhaha abhaana bhaanyu ebheghiro ebhichömu. Mbe! Taanyi hëënë kubha, Taata waanyu uno anyi Mwishaaro naghuköra ghokera ghayo? Mahëënë nakobhaha Akörö Ahörëëru bhano bhakomusabha!”

Ruuka 2:25

Hayo Yerusareemu, naare‑ho omooto umu, eriina reeche Simiyooni. Simiyooni uyo naare muhëënë ambërë e Ryobha araresooka, ino araghanya korighi ghotooribhu kwo Abhiisiraeri. Akörö Ahörëëru neere haghirohamu nawe.

Ruuka 24:49

“Mutëghëërërë! Nekobharëëtëra ighoro yaanyu eriiraghano re Taata waane, eriiraghano riyo n‑Akörö Ahörëëru. Amare, mughanye mo‑moghya uno o Yerusareemu, mbagha muhaabhu obhotoro koru Mwishaaro.”

Ruuka 3:22

Akörö Ahörëëru ekamwikëra kinya egheghuuti na ghwikara ighoro yaache. Niho eriiraka koru Mwishaaro rekabhugha, “Iye n‑Omoona waane omosiighani, uno neghuchömëru na niiye!”

Yohana 1:33

Eni ntemumënyiri kubha n‑niwe, amare Eryobha rino rentomiri kubhatiisa abhaato kwo manche ndembooriire, ‘Omooto uno Akörö yaane eghwika na ghwikara ighoro yaache, uyo niwe akubha arabhabhatiisa abhaato gho Akörö Ahörëëru.’”

Yohana 12:16

Eriibhagha riyo, abhaanabheegha bha Yesu bhataamënyiri ghayo. Amare hano Yesu aryokiri, bhakahiita kubha ghano ghaandëkuru ighoro yaache, nibhu abhaato ꞉bhaamuköriire.

Yohana 14:16

Mbe, na neeni nekomusabha Taata kubha abhahë Omotoorereri owonde, kubha ikare na niinyu emiishe ghyose.

Yohana 14:25

“Nebhabhooriire ghoose ghayo eriibhagha nekeere neenyi haghirohamu na niinyu.

Yohana 15:26

“Hano akuucha ghokoonyu Omotoorereri, uno nekomotoma ghokoonyu koru o‑Taata, niyo Akörö Ahörëëru e hëënë ino ekoru o‑Taata, neghungambëra obhuhëënë ighoro yaane.

Yohana 16:7

“Nekobhabhoorera inyu obhuhëënë kubha, ngʼoni ghokoonyu eni neghi o‑Taata, neraanga ghuye, Omotoorereri wuure taaghotora kuucha ghokoonyu. Amare aribha neraghe, nekomotoma ghokoonyu.

Yohana 2:22

Hano aryokiri koru mo‑bhaku, abhaanabheegha bhaache bhakahiita amangʼana ghano ꞉abhughiri. Gho ghayo, bhaghakumi amangʼana ghano ghaandëkuru mo‑Mandëkö Amatööbhiyu, na amangʼana ghano Yesu ꞉abhughiri.

Yohana 20:22

Niho akabhahuuteri omwika, akabhabhoorera akabhugha, “Mosongʼaane Akörö Ahörëëru.

Yohana 6:45

Yandëkuru mo‑Mandëkö Amatööbhiyu kubha, ‘Eryobha ndekobheeghi abhaato bhoose.’ Mbe, omooto wowoose uno aghutëghëërëra na kwegha koru gho Taata, nakuucha ghokoone.

Yohana 7:39

Yesu naare arasiikërëra ighoro e Körö Ahörëëru, ino abhaato bhoose bhano bhakomokumi Yesu, mbakoyesongʼaana. Eriibhagha riyo, Eryobha ndeere rekeere ghotoma Akörö yaache ghokoobho, gho kubha Eryobha ndeere rekeere kwërëki haheero obhokumi obhokoro bho Yesu.

Amaköri gha Bhatomu 1:2

mbagha orosiko runo aghëghuru ghuye Mwishaaro. Hano are akeere ghughëghu, akabhaha abhatomu bhaache bhano are ahwire, amëërëkërëri gho nchëra e Körö Ahörëëru, ighoro e meremo ghino bhaghuköra.

Amaköri gha Bhatomu 1:4

Orosiko rumu, hano Yesu atëmëriine haghirohamu na abhatomu bhaache, akabharaghereri akabhugha, “Motaru mo‑moghya o Yerusareemu, mwikare‑mu, mbagha hano mokuhaabhu Akörö ino Taata ꞉abharaghiire inyu, kinya bhuno neere nebhabhooriire.

Amaköri gha Bhatomu 1:8

Amare, mokuhaabhu changuru hano Akörö Ahörëëru ekuucha ghokoonyu, mookubha abhiibhateri bhaane mo‑moghya o Yerusareemu na ahaghiro ahande hoose ha Yuteya, na Samaariya, mbagha mo‑se yoose.”

Amaköri gha Bhatomu 11:16

Nekahiita angʼana yiire Omutëmi ꞉atobhooriire, ‘Yohana ꞉naabhatiisiri abhaato kwo manche, amare inyu mokubhatiisu gho Körö Ahörëëru.’

Amaköri gha Bhatomu 13:2

Hano bhaare bharasëngëra Omutëmi na kwiyima ebhiinyakurë, Akörö Ahörëëru ekabhabhoorera ekabhugha, “Monyaahurere Bharinaabha na Sawuri mo‑meremo ghino nebhabherekeriire.”

Amaköri gha Bhatomu 13:4

Mbe, Bharinaabha na Sawuri hano bhaare bhamariri ghotomu na Akörö Ahörëëru, bhaaghaye mo‑moghya o Serewukiya. Hano bharuure hayo bhaghaköra orughëndö no obhwato ghuye mo‑gheghinga re Kiibhuro.

Amaköri gha Bhatomu 15:28

Mbe, Akörö Ahörëëru na niitu ntorooche kubha, totabhaghëghi emerigho eghende, ghabhe n‑amangʼana ghano agheene.

Amaköri gha Bhatomu 15:8

Eryobha niryo ryeche ghoose ghano ghaanyi mo‑metema ghe bhaato, ndyërëkiri kubha abhaato bha matöngö bhoose ndebhiisheriiri, gho kubha bhoose mbahaabhuru Akörö Ahörëëru, bhuure bhuure kinya itu Abhayahuuti tuhaabhuru.

Amaköri gha Bhatomu 16:6

Bhawuro na abhaghëndi bhaache bhayo, Akörö Ahörëëru neere ebharëkiri kubha bhataacha kuraghani angʼana e Ryobha mo‑mukööwa o Asiya. Gho ghayo, bhakaheta mo‑mikööwa ghe Bhirighiya na Gharatiya.

Amaköri gha Bhatomu 2:33

Eryobha riyo rekamoghongi na komuha omweya, niikeere eribhaara reeche re kwiro. Akamara Taata Waryobha akamuha Yesu Akörö Ahörëëru kinya bhuure are amuraghiri, Yesu woose aghatwikeri Akörö iyo. Ibheere ghano gharweriire, nigho ghano moghogharighi na ghoghooghu.

Amaköri gha Bhatomu 2:4

Abhaato bhayo bhoose bhaghiichoribhu Akörö Ahörëëru, bhaghasëëma ghosiikëra mo‑bhighambo haghare haghare, kinya bhuure Akörö Ahörëëru ꞉ëbhëërëkëriiri.

Amaköri gha Bhatomu 20:28

Akörö Ahörëëru nebhatooriri mubhe abhiimeerereri bha bhaato bhaache. Gho ghayo, mubhe moriichonga inyu bheene, mubhe morachonga ne eriikanisa reeche, gho kubha eriikanisa riyo, Eryobha ndereghoriri kwo masaahë gha Moona waache kobhatoori.

Amaköri gha Bhatomu 20:35

Gho ghayo, neere nerabhëërëki kubha ntokwëndëru tubhe torahöki kwo bhigheri, kubha tubhönë ebheghiro bhe kobhatoori abhaato bhano bhataaghotora. Eriibhagha ryose mohiite amangʼana ghano Omutëmi Yesu omwene abhughiri, ‘Ngʼoni abhaato bhano bhakoruusi, ghokera bhano bhakuhaabhu.’”

Amaköri gha Bhatomu 28:25

Ngaanyi‑ho amangʼana aghande ghano Bhawuro asiikiire ghaghaghëriri Abhayahuuti bhayo bhatooghwana abheene ko bheene, bhaghasancha bharahakaana. Bhawuro akëëngëra kobhabhoorera arabhugha, “Akörö Ahörëëru ꞉neesiikiire bhoheene na bhasookoro bhiito gho nchëra e murööti Isaaya erabhugha,

Amaköri gha Bhatomu 5:3

Bheetero akamobhoorera, “Iye Ananiya! Kana Erishambu ndewusöhëriire omotema waacho, ekirëngërë ghe kobhoorera obhuröngö Akörö Ahörëëru. Nobhughiri chambiiri chino n‑choose, eriibhagha noobhisiri eribhaara re chambiiri chino obhwine gho ghoghori omoghondo waacho.

Amaköri gha Bhatomu 7:51

Siteebhano akëëndërëra kobhugha, “Inyu m‑bha mitu miköngʼu moonyi! Emetema gheenyu na amatu ghaanyu nganga gha bhaato bhano bhataaghokumi. Chaasiko choose mokoyanga Akörö Ahörëëru, kinya bhuure bhasookoro bhaanyu ꞉bhaaköriri!

Amaköri gha Bhatomu 7:55

Eriibhagha riyo, Siteebhano akabha ichoriibhu Akörö Ahörëëru, akamööhi ighoro Mwishaaro, akarighi obhokumi obhokoro bho Ryobha, na Yesu imeeriire eribhaara re kwiro re Ryobha.

Abharuumi 14:17

Amangʼana amachömu mo‑bhaato bha bhutëmi bho Ryobha taanyi ighoro e kurë hamu kunyo, amare n‑ghuköra ghano Eryobha rekwënda, kubha no omurëmbë na kumanya gho ghuchömëru. Ghayo ghoose ngaakubha kwo bhotoorereri bho Körö Ahörëëru.

Abharuumi 15:13

Eryobha niryo toghwitëngʼëra kubha ndeghuköra ghoose ghano ꞉reeturaghiri. Gho ghayo, nekobhasabhera kubha, rebhahë omurëmbë chwee na ghuchömëru kwaru hano mokwëndërëra korekumi. Hayo niho mookubha ne eriitëngʼërö ikoro, rino moonyi naryo gho changuru che Körö Ahörëëru.

Abharuumi 15:16

kubha nibhe omutamishi o Kirisito Yesu kwo bhaato bha matöngö. Nihaabhuru emeremo ghe bhuchaama ghe kobharaghaneri Angʼana Anchömu koru kwo Waryobha, kubha bhabhe kinya amaruusi ghano ghakoretegheri Eryobha, ghano ghamusuru na Akörö Ahörëëru.

Abharuumi 5:5

Amiitëngʼërö ghayo ghataaghotora ghotosooki, gho kubha Eryobha ndehomiri obhosiighi bhooche mo‑metema ghiito, kohetera Akörö yaacheAhörëëru.

1 Abhakorinto 12:3

Mbe, ˆnekabhabhoorera kubha omooto wowoose uno aghukangatu na Akörö e Ryobha taaghotora kobhugha kubha, “Yesu ihiimu.” Wiiki taaghotora kobhugha kubha, “Yesu n‑Omutëmi,” aribha atakangaturu na Akörö Ahörëëru.

1 Abhakorinto 6:19

Moteeche kubha, emebhere gheenyu n‑Erisëngërö re Körö Ahörëëru ino enyi moose yaanyu, ino Eryobha rebhaheere? Mbe, inyu emebhere ghiyo taanyi ghe gheenyu, amare n‑ghe Ryobha,

2 Abhakorinto 6:6

Wiiki ntokwërëki kubha itu n‑abhatamishi bha Ryobha mo‑bhughöröröku, na mo‑bhumënyi, na mo‑bhoghumereri, na mo‑bhuhöriicho, na gho nchëra e ghukangatu na Akörö Ahörëëru, na mo‑bhosiighi bho hëënë,

Abhaebheeso 1:13

Inyu bhoose abhaato bha matöngö, ꞉muughöötiine na Kirisito hano mooghwire angʼana e hëënë na koyekumi, niyo Angʼana Anchömu e bhotoori bhoonyu. Eryobha ryose gho kwërëki kubha inyu na abhaato bhaache moonyi, rekabhatoorera ekingʼöchö gho kobhaha Akörö Ahörëëru ino ꞉reeturaghiire.

Abhaebheeso 1:17

Nekwëndërëra korisabha Eryobha re Mutëmi wiito Yesu Kirisito, Taata o bhokumi obhokoro, abhahë inyu Akörö yaache kubha mubhe na amangʼiini no obhohunyurëru, motore korimënya bhoheene.

Abhaebheeso 4:30

Motiitumati Akörö Ahörëëru e Ryobha, gho kubha Akörö iyo n‑ekingʼöchö ke Ryobha ghokoonyu kubha inyu n‑abhaato bhaache moonyi, mbagha orosiko runo Eryobha rekuucha kobhatingori.

1 Abhatesaronike 4:8

Gho ghayo, omooto wowoose uno akwanga ameeghi ghano, taakomwanga omooto, amare nakoryanga Eryobha, rino rekobhaha inyu Akörö yaache Antööbhiyu.

2 Timotewo 1:14

Angʼana e bhuhëënë ino uhaabhuru na Yesu, oyighöötërërë gho changuru che Körö Ahörëëru ino enyi moose yiito.

Tiito 3:5

Retaaköriri hangʼu gho kubha amaköri ghiito ango n‑gha hëënë ꞉ghaare, amare n‑gho changori cheeche okwene. Ndetomusiri obhobhe bhwito, kuyo niko okwibhoru okuhë. Wiiki ndetoheere eriimanya eriihë gho nchëra e Körö Ahörëëru.

Abheebhuraaniya 10:15

Akörö Ahörëëru nekuhëënëhi amangʼana ghano ghokwito kubha n‑gha hëënë hano ekobhugha kubha,

Abheebhuraaniya 2:4

Eryobha ryose ndeere rerahëënëhi obhotoori bhuyo gho kobhaha abhaato bhayo obhotoro bho ghuköra ebhyërëkërëri ne ebhiraghe ne ebheroghooro bhe manga maaru. Wiiki ꞉ndeebhahööhiri abhakumi ebhihaano bhe Körö Ahörëëru kurëngʼaana na amënda ghaache.

Abheebhuraaniya 3:7

Gho ghayo mbe, kinya Akörö Ahörëëru ekobhugha kubha, “Reero, aribha morooghu eriiraka re Ryobha,

Abheebhuraaniya 9:8

Akörö Ahörëëru nehaatwërëki kubha anchëra e ghusöha Ahaghiro Ahatööbhiyu ha Hatööbhiyu ekeere ghwighoru kwo bhaato abhande gho kubha, eriibhuru riire e rimbërë rekeere reraköra emeremo.

1 Bheetero 1:12

Eryobha ndebhahunyuriire abharööti bhayo kubha, amangʼana ghano ꞉bhaare bhararööta, ghataare ghaghaabho abheene, amare n‑gho ghiri yaanyu. Amangʼana ghano ꞉bhaabhughiri, nigho muraghaniiru na abhaato bhano bhabharëëtiire Angʼana Anchömu ighoro e Yesu Kirisito kwo bhotoro bho Akörö Ahörëëru ino etomuru koru Mwishaaro. Amangʼana ghayo, koru bhamarayika mbaghwighomba chwee ghoghamënya.

2 Bheetero 1:21

Nekobhugha hangʼu gho kubha, ghataanyi‑ho amangʼana gha bhurööti ghano ghakorwera mo‑miigha gha mooto. Amare abhaato ꞉mbaaruusiri obhurööti koru kwo Waryobha bharakangatu na Akörö Ahörëëru.

1 Yohana 2:20

Amare inyu, Omutööbhiyu Yesu nabhaheere Akörö yaache, ibheere inyu bhoose mweche obhuhëënë.

1 Yohana 2:27

Inyu motakongʼiinu, gho kubha Kirisito nabhaheere Akörö Ahörëëru, ino eghwikara moose yaanyu. Iyo niyo ekobheeghi ghoose, ameeghi ghaache n‑gha mahëënë, ghataanyi gha bhuröngö. Gho ghayo, teekwëndëru kubha omooto abheeghi. Kinya bhuure Akörö ebheeghiri, ibheere mwëndërërë kubha no obhumu na Kirisito.

1 Yohana 5:7

Wiiki Akörö Ahörëëru neghoghaghambera ghayo kubha n‑nga hëënë, gho kubha Akörö Ahörëëru niyo obhuhëënë.

Yuuta 1:20

Amare inyu abhasiighani bhaane, muköngʼëri mo‑bhuhëënë bho bhokumi bhoonyu bhuno bhoonyi obhutööbhiyu chwee, na mubhe morasabha kwo bhotoro bho Körö Ahörëëru.

Obhohunyurëru 2:11

Uno anyi na amatu atëghëërërë amangʼana ghano Akörö Ahörëëru eghoghabhoorera amakanisa. Omooto wowoose uno aghokinda amasaki, omororo o miishe ghyose tookomoturi naabha. Omororo uyo n‑oroko ro kabhere.’”