Yohana 12:27 - Eriiraghano Eriihë

²⁷ “Ibheere ˆneghasëëma kubha na amacheeche chwee mo‑körö yaane. Nebhughe ke? Kana, nebhughe, ‘Oo Taata, ˆneghaghusabha ontoori kwo riibhagha re nyaako ino?’ Tiyaanyi, nteeghotora ghusabha hangʼu, gho kubha niichiri kunyaaka mo‑se ino.

Yohana 12:27 ပူးပေါင်းရင်းမြစ်များ

Mataayo 11:25

Eriibhagha riyo Yesu aghasabha, “Oo Taata, ˆoghachömi, iye Omutëmi o Mwishaaro na ase yoose, gho kubha, amangʼana ghano, nobhabhisiri bhano bhaanyi na amangʼiini na abhasömi, amare okabhahunyurera abhaato bhano bhakwinyööhi ghokoocho kinya abhaana abhasuuhu.

Mataayo 11:26

Oo Taata, ghano ghoose n‑kurëngʼaana na amënda ghaacho.”

Mataayo 26:42

Yesu akabhatigha wiiki na ghuye mara e kabhere ghusabha Eryobha akabhugha, “Oo Taata waane, aribha anyaako ino teeghotora koru ghokoone, mbe, ukörë kinya bhuno okwënda.”

Mataayo 26:45

Akamara aghagharuka kwo bhaanabheegha bhaache, akabhabhoorera akabhugha, “Mokeere momisiri chandöörö na koweera? Mööhi! Eriibhagha re nyaako yaane ndehikiri. Eni Omoona o Mooto neghotooru mo‑mabhökö gha abhaköri bha masari.

Ruuka 22:44

Eriibhagha riyo Yesu naare mo‑bhororo bhwaru chwee, bhokamuköra iköngʼi ghusabha Eryobha. Hano are arasabha Eryobha, akaru ebhigheri bhetuubhiine na amasaahë, bheekabha bheratoonya haase.]

Ruuka 22:53

Chaasiko choose neere haghirohamu na niinyu Mwisëngërö, amare motangöötiri! Amare ibheere, rino niryo eriibhagha reenyu, re bhukangati bho Rishambu.”

Yohana 11:41

Mbe, bhakareruusi eriibhohe riyo. Yesu aghagharaamereri Mwishaaro, aghasabha Eryobha akabhugha, “Oo Taata, neghoghwitabheri gho kubha nooghwire amasabhi ghaane.

Yohana 12:23

Yesu akabhagharokeri akabhugha, “Eriibhagha reene eni, uno neenyi Omoona o Mooto, kubhöna obhokumi obhokoro ˆrekahika.

Yohana 13:21

Hano Yesu amariri kobhugha ghayo, aghiitumata chwee mo‑körö yaache, akabhugha haheero kubha, “Mahëënë ˆnekabhabhoorera, umu ghate yaanyu nakuucha ahaane mo‑mabhökö gha bhabhisa.”

Yohana 18:37

Mbe, Bhiraato akamobhoori akabhugha, “Kana, m‑mahëënë kubha iye n‑omutëmi?” Yesu akamugharokeri akabhugha, “N‑iye ˆokabhugha kubha eni n‑omutëmi. Eni niibhwiru mo‑se ino, wiiki niichiri kubha nebheeghi abhaato obhuhëënë. Omooto wowoose uno aghutambana obhuhëënë, naghoghooghu amangʼana ghaane.”

1 Timotewo 1:15

Angʼana e hëënë ino ekwëndëru abhaato bhayiishereri n‑kubha, “Kirisito Yesu ꞉niichiri mo‑se, kubha atoori abhaato bha masari.” Ghate e bhaato bha masari, eni niköriri amasari ghokera bhoose.

Abheebhuraaniya 2:14

Mbe, gho kubha abhaana bhano mbaanyi ne emebhere na amasaahë, Yesu woose ꞉niichiri anyi no omobhere kinya emebhere gheebho. ꞉Naaköriri hangʼu kubha gho nchëra e roko rooche, achekinde changuru che Rishambu rino reenyi no obhotoro bho ghughëri abhaato bhabhe bharaku.

Abheebhuraaniya 5:7

Eriibhagha Yesu are mo‑se ino, ꞉naasabhiri, na ghusasaama na korera chwee ambërë e Ryobha rino reenyi na changuru che komotoori koru mo‑roko. Eryobha ndyoghwire amasabhi ghaache gho ghiri e kwinyööhi kooche.