Obhohunyurëru 7:14 - Eriiraghano Eriihë

¹⁴ Nekamugharokeri nekabhugha, “Oo omutëmi waane, iye niiye weeche.” Akamboorera akabhugha, “Abhaato bhayo mbakindiri anyaako yiire ankoro. ꞉Mbaahuriri chandachana cheebho kwo masaahë gha Moona o Ngʼöndu, cheekabha cheero chayi.

Obhohunyurëru 7:14 ပူးပေါင်းရင်းမြစ်များ

Mataayo 24:21

Nekobhabhoorera hangʼu gho kubha, mo‑chaasiko chiyo, abhaato mbakubhöna anyaako ihaari chwee ino etaamara irwera korwera hano Eryobha ritëëmiri ase mbagha reero. Wiiki anyaako iyo tekorwera naabha.

Maariko 13:19

Nekobhabhoorera hangʼu gho kubha, mo‑chaasiko chiyo abhaato mbakubhöna anyaako ihaari chwee ino etaamara irwera korwera hano Eryobha ritëëmiri ase mbagha reero. Wiiki anyaako iyo tekorwera naabha.

Yohana 16:33

Nebhughiri ghayo ghoose kubha mubhe no omurëmbë mo‑metema gheenyu, gho kubha moonyi moose yaane. Mo‑se muno mokubhöna anyaako yaaru, amare mwitoore omukörö gho kubha eni neyekindiri ase.”

Amaköri gha Bhatomu 14:22

Haghiro hoose hano bhaghiire ꞉mbaabhatooriri omukörö abhaghëndi bha Yesu, bhakabhabhoorera bhëëndërërë ghokumi amangʼana gha bhuhëënë ghano bheeghuru. Bhakabhatongera bharabhugha, “Ntokwëndëru ghusöha mo‑bhutëmi bho Ryobha gho kohetera anyaako yaaru.”

Abharuumi 5:3

Koru nangabha anyaako yoyoose yiire eghotubhöna, itu ntokwëndërëra ghuchömëru, gho kubha ntweche kubha anyaako nehaarëëta obhoghumereri.

1 Abhakorinto 6:11

Abhande ghate yaanyu hangʼu moore. Amare ibheere, gho kohetera kwo Mutëmi wiito Yesu Kirisito, na gho changuru che Körö e Ryobha, obhobhe bhoonyu mbweghuru, mbomusuru, na kubhareru obhuhëënë ambërë e Ryobha.

2 Abhatesaronike 1:4

Gho ghayo, ntoghosiikëra gho ghesubhe subhe mo‑makanisa gha Ryobha gho ghiri e bhoghumereri no obhokumi bhoonyu bhuno moonyi nabho, mo‑nyaako yoose ino ekobhabhöna.

Abheebhuraaniya 13:12

Nikyo ꞉ghiighëriri Yesu woose akanyaakibhu na ghwitu anche e kehita eghekoro ke mo‑moghya o Yerusareemu, kubha abhamuse abhaato amasari ghaabho gho nchëra e masaahë ghaache.

Abheebhuraaniya 9:14

Amare ibheere amasaahë gha Kirisito ngaanyi na changuru chwee ghokera amasaahë gha chatyenyi chiyo! Gho nchëra e Körö ino enyi e miishe ghyose, iwe ꞉niiruusiri kwo Waryobha kubha amaruusi ghano ghahikeriine. Amasaahë ghaache nigho ghaghotomusa emetema ghiito ighoro e masari ghano ghaghughëri oroko kubha torisëngërë Eryobha rino reenyi ihöru.

1 Bheetero 1:19

Amare, ndebhatooriri gho kuhökëri amasaahë ghano ghaanyi ne eriighori ikoro. Amasaahë ghayo n‑gha Kirisito, iwe naare kinya omoona o ngʼöndu uno ataanyi no obhurëma koru ghosuuheru.

1 Yohana 1:7

Aribha toghwikara mo‑bhwero, kinya bhuure Eryobha reghwikara, niho tookubha no obhumu itu bheene kwo bheene. Wiiki masaahë gha Moona waache Yesu ngaghotweri amasari ghiito ghoose.

Obhohunyurëru 1:5

na koru kwo Yesu Kirisito, ghibhe haghirohamu na niinyu. Uyo niwe omwibhateri omuhëënë. Niwe o mumbërë koryoka koru mo‑bhaku, kubha abhe omukangati o bhatëmi bhoose mo‑se. Yesu niwe atosiighiri aghatusaasura koru mo‑masari ghiito gho nchëra e masaahë ghaache.

Obhohunyurëru 12:11

Ibheere abhakumi bhaghëndi bhiito mbamohichiri kwo masaahë gha Moona o Ngʼöndu, na kwo ngʼana e bhwibhateri bhoobho, mbamohichiri. Bhatatereeriri eriimanya reebho, mbaare bhiisëëmiri ghoku gho ghiri e komokumi Omoona o Ngʼöndu.

Obhohunyurëru 15:2

Wiiki nekarighi egheghiro kino keere kinya anyancha e kiröri ino isangeriini no omororo. Wiiki rubhareka hayo, mbaare bhiimeeriire abhaato bhano ꞉bhaare bhakindiri oghotyenyi ghuure, na asanaamu yaache, haghirohamu no omubharo o riina reeche. Abhaato bhayo mbaare bhaghöötëriire amatingo ghano ꞉bhaare bhahaabhuru ne Eryobha kubha bhamusëngërërë.

Obhohunyurëru 17:6

Nekarighi omukari uyo arëëwuru gho kunyo amasaahë gha bhatööbhiyu bhano bhiituru gho kubha mbaare abhiibhateri bha Yesu. Hano nemorooche, nekaroghoora chwee.

Obhohunyurëru 2:9

Nyeeche anyaako yaanyu no obhuhabhe bhoonyu. Amare mahëënë inyu m‑bhaame moonyi! Wiiki nyeeche amatoki ghano bhaghughamba ighoro yaanyu na bhano bhakwibherekera kubha n‑Abhayahuuti, abhaato bha Ryobha, amare tiyaanyi. Bhayo n‑abhaghëndi bha Rishambu.

Obhohunyurëru 22:14

Ngʼoni abhaato bhano bhakohura chandachana cheebho, kubha bhiisherereru ghusöha omoghya uyo omuhë kohetera ekehita keeche na kurë amakorobhese gha mote o kobhaha abhaato obhuhöru.

Obhohunyurëru 5:9

Bhakamwembera Omoona o Ngʼöndu omwembo omuhë uno ore orabhugha, “Iye nokurëngʼaanera kwimoki eghitabhu kiyo, na kunaanura emehuuri gheeche ghe nyaghame, gho kubha iye ꞉noosinchuru. Amasaahë ghaacho, ghakareghorera Eryobha abhaato bha matöngö ghoose, na bha bhighambo bhyose, na abhahiiri bhoose na chaase choose.

Obhohunyurëru 7:9

Hano ghayo ghahetiri, nekarighi eriirighi erende. Nekarighi erikinda ikoro re bhaato rino retaare reratoru kubharu. Abhaato bhayo mbaare bha chaase choose, na bha matöngö ghoose, na abhahiiri bhoose na bha bhighambo bhyose. Bhiimeeriire ambërë e ghetumbe ghe ghitëmi, na ambërë e Moona o Ngʼöndu. Bhabheekiri chandachana cheero na mbaare bhaghöötëriire amato gha mitëndë.