Mataayo 27:54 - Eriiraghano Eriihë

⁵⁴ Akamara omokoro o bhaashirikare haghirohamu na bhano ꞉bhaare bharamochonga Yesu hano bharooche ekerighito na aghande ghoose ghano gharweriire, bhaghatiina chwee, bhakabhugha, “Mahëënë, omooto uno naare Omoona o Ryobha!”

Mataayo 27:54 ပူးပေါင်းရင်းမြစ်များ

Mataayo 26:63

Amare Yesu tagharokiiri ghyokyose. Niho Omuchaama Omokoro uyo akamobhoorera wiiki akabhugha, “ˆNeghakoriishi ariingʼa kwo riina re Ryobha rino reenyi ihöru, notobhoorere aribha iye niiye Kirisito, Omoona o Ryobha.”

Mataayo 27:36

Mbe, bhaghiikara hayo hayo kubha bhamochonge.

Mataayo 27:40

“Kana! Iye, ꞉noobhughiri kubha nokuhaanyura Erisëngërö re Ryobha na koryabhëka wiiki gho chaasiko ishato! Ibheere, wiitoori iye mwene. Aribha iye n‑Omoona o Ryobha onyi, nwike mo‑musarabha!”

Mataayo 27:43

Iwe naghwitëngʼëra Eryobha, wiiki naare arasiikëra arabhugha, ‘Eni n‑Omoona o Ryobha.’ Mbe, Eryobha ndemotoori ibheere aribha remosiighiri hëënë.”

Mataayo 27:51

Hayo hayo, omwando uno ore oteniini Mwisëngërö oribhiri Ahaghiro Ahatööbhiyu ha Hatööbhiyu, oghachaaruka chambaara ibhere koru ighoro mbagha haase. Wiiki ꞉haare ne ekerighito ghekoro kino ꞉ghiighëriri amatare ghabhaaruke.

Mataayo 4:3

Niho Erishambu rekaacha komusaki, rerabhugha, “Aribha iye n‑Omoona o Ryobha onyi, ghabhoorere amabhohe ghano ghiigharure ghabhe emighaate.”

Mataayo 8:5

Hano Yesu asöhiri mo‑moghya o Kabherenawumu, omokoro umu o bhaashirikare akaacha ghusabha Yesu amusakeri,

Maariko 15:39

Omokoro o bhaashirikare uno are imeeriire ambërë e Yesu, hano arooche kebhuno Yesu akuure, akabhugha, “Mahëënë, omooto uno naare Omoona o Ryobha!”

Ruuka 22:70

Abhagharuka na abhakangati bha Bhayahuuti, bhakamobhoori Yesu wiiki, “Kana ibheere, iye niiye Omoona o Ryobha?” Yesu akabhagharokeri akabhugha, “Kana niinyu bheene mobhughiri kubha eni neeni!”

Yohana 19:7

Abhayahuuti bhakamugharokeri bhakabhugha, “Itu ntoonyi no omoghiro, na kurëngʼaana no omoghiro uyo, nakwëndëru ghwitu, gho kubha naghwighamba kubha n‑Omoona o Ryobha.”

Amaköri gha Bhatomu 10:1

Naare‑ho omooto umu mo‑moghya o Kayisaariya omokoro o bhaashirikare, eriina reeche Korineeriyo. Iwe naare omwimeereri o rikinda re bhaashirikare eriighana rimu, koru mo-rikinda eriikoro re bhaashirikare rino reere rerabherekeru, Kiitaariya.

Amaköri gha Bhatomu 2:37

Abhaato bhayo, hano bhooghwire amangʼana ghayo, ghakabhangʼuuta chwee mo‑metema gheebho. Bhakamobhoori Bheetero na abhatomu abhaghëndi bhaache bhakabhugha, “Abhahiiri bhiito, ibheere tukörë bhu?”

Amaköri gha Bhatomu 21:32

Hayo hayo akiimoki abhaashirikare bhaache haghirohamu na abhakoro abhande bha bhaashirikare, bhaaghaye bharahe mo‑bhaato bhayo. Abhaato bhayo hano bhabharooche abhaashirikare bhayo bhaanyi haghirohamu no omontomonkoro waabho uyo, bhaghatigha komurööna Bhawuro.

Amaköri gha Bhatomu 23:17

Niho Bhawuro akamobherekera omokoro umu o bhaashirikare bhayo, akamobhoorera akabhugha, “Nomohire omobhureni uno kwo montomonkoro waanyu, gho kubha naanyi na angʼana ekomobhoorera.”

Amaköri gha Bhatomu 23:23

Akamara omontomonkoro uyo o bhaashirikare akabhabherekera abhakoro bhabhere bhano bhaanyi haase yaache, akabhabhoorera, “Musëëmë abhaashirikare amaghana abhere bhano bhaaghuye kwo maghoro, haghirohamu na abhande miröngö mohungate bhano bhaaghuye gho chabharaasi, na abhande amaghana abhere bhano bhaaghuye bhaanyi na amatimo. Bhoose bhayo mbaakoru hano mo‑chaasa ishato che bhotiko, gho ghiri bhaghëndë mo‑moghya o Kayisaariya.

Amaköri gha Bhatomu 27:1

Hano bhamariri bhakahatëka kubha tughëndë na ameeri mo‑se e Itaariya. Niho Bhawuro na abhabhöhu abhande bhakahaanu kwo mokoro umu o bhaashirikare, eriina reeche Yuriyo, o rikinda re bhaashirikare bha Kayisaari Aghosito.

Amaköri gha Bhatomu 27:43

Amare omokoro waabho uyo ꞉nëëndiri kobhotoori obhuhöru bho Bhawuro, akabharëki abhaashirikare bhayo bhataköra hangʼu. Niho akabhabhoorera abhaato bhoose bhano bhaghotora kurabhacha bhashame kwirëkërë mo‑manche, bharabhache mbagha bhatëënyë bhahike mo‑se ayoomu.

Abharuumi 1:4

amare gho kohetera Akörö ino enyi Intööbhiyu, Eryobha ꞉ndeemwahwire kubha Omoona o Ryobha uno anyi no obhotoro bhoose, hano remoryokiri koru mo‑bhaku. Yesu Kirisito uyo niwe Omutëmi wiito.

Obhohunyurëru 11:13

Mo‑riibhagha riyo riyo, ase ekarighitera chwee, eriiteneka rimu ghwi ikomi re moghya reghasarëka. Ekerighito kiyo, gheghaghëri abhaato ebheku mohungate (7,000) bhaaghaku, na abhande bhoose bhano bhasaaghiri bhaghatiina chwee, bhakareghongi Eryobha re Mwishaaro.