Abheebhuraaniya 2:10 - Eriiraghano Eriihë

¹⁰ Eryobha niryo ꞉riitëëmiri ebheghiro bhyose na kobhetoora kinya bhuno bheenyi. ꞉Ndeesiighiri remohikeerani Yesu uno anyi simoka e bhotoori gho nchëra e kunyaakibhu, kubha rebhasöhi abhakumi bhaaru mo‑bhokumi bhooche obhokoro.

Abheebhuraaniya 2:10 ပူးပေါင်းရင်းမြစ်များ

Ruuka 13:32

Yesu akabhagharokeri, “Herote uyo n‑ambwe! Mughëndë momobhoorere, ‘Mööhi! Reero na tabhoori, nekuhëëbha emisambu koru mo‑bhaato, na kobhahöri amabhabharu ghaabho, no orosiko ro ghatato, nekohikeerani omoremo waane.’

Ruuka 2:14

“Eryobha re Mwishaaro reghongibhu! No omurëmbë ubhe mo‑se yoose, kwo bhaato bhano Eryobha resiighiri!”

Ruuka 24:26

Kana yëndiiru Kirisito abhönë anyaako ino, akeere kubhöna obhokumi bhooche obhokoro.”

Ruuka 24:46

Wiiki akabhabhoorera akabhugha, “Yandëkuru kubha Kirisito nakunyaakibhu na ghwitu, no orosiko ro ghatato, nakoryoka koru mo‑bhaku.

Yohana 11:52

Wiiki Yesu taaghoku gho ghiri e ritöngö riyo eryene chiri, amare kubha abhakome abhaana bha Ryobha bhano bhasanchiri, kubha bhabhe haghirohamu.

Yohana 19:30

Hano Yesu asamiri adivaayi iyo, aghasiikëra akabhugha, “Emeremo gheene ghekahikeerana!” Mbe, akahiinya omutu, aghaye mo‑bhaaru.

Amaköri gha Bhatomu 3:15

Mbe, mokamwita uno anyi omutangi o bhuhöru! Amare Eryobha rekamoryoki koru mo‑bhaku, na niitu n‑abhiibhateri bha koryoka kooche toonyi.

Amaköri gha Bhatomu 5:31

Rekamoghongi na komuha omweya gho komotoora eribhaara reeche re kwiro, abhe Omukangati no Omotoori. Eryobha ꞉ndiiköriri hangʼu kubha retukörë itu Abhiisiraeri totighe inkongʼorimu amasari ghiito, twabhëru.

Abharuumi 11:36

Eryobha niryo ꞉riitëëmiri ebheghiro bhyose. N‑kohetera ghokooche ebheghiro bhyose mbekwëndërëra kubha‑ho, ne ebheghiro bhyose mbeenyi‑ho gho ghiri e bhokumi bhooche obhokoro. Eryobha reghongibhu emiishe ghyose! Hawubhaabha.

Abharuumi 9:23

꞉Ndiiköriri hangʼu, kubha ribhönë kwërëki obhokumi bhooche obhokoro gho ghiri e bhaato bhano ꞉riisëëmiri bhasongʼaane changori cheeche. ꞉Ndiisëëmiri korwera kare kobharëëta ghokooche bhabhe nawe mo‑bhokumi bhooche obhokoro.

1 Abhakorinto 2:7

Amangʼiini ghano tokuraghani n‑gha kebhisere ke Ryobha. Amangʼiini ghayo n‑obhorwachi bho Ryobha bhuno bhoore bhobhisuru mo‑bhaato. Eriibhagha Eryobha reere rekeere ghutëëma ase, ꞉ndyëëndiri kuhökëri amangʼiini ghayo, kubha retughöötani mo‑bhokumi bhooche obhokoro.

1 Abhakorinto 8:6

Amare ghokwito, ndeenyi‑ho Eryobha rimu hangʼu, niryo Taata, niryo ꞉riitëëmiri ebheghiro bhyose, itu ntokumanya gho ghiri yaache. Wiiki naanyi‑ho Omutëmi umu hangʼu, niwe Yesu Kirisito, ne ebheghiro bhyose ꞉mbiitëëmuru gho kohetera ghokooche, wiiki itu ntoonyi abhahöru kurëngʼaana nawe.

2 Abhakorinto 3:18

Ibheere itu bhoose bhano totaaghwikundekeri mo‑bhosho ne eghitambara, ntokwërëki obhokumi obhokoro bho Mutëmi kinya ekiröri. Omutëmi uno anyi Akörö, nahaatugharura totuubhaane nawe. Naakubha aratugharura koru obhokumi obhokoro mbagha kohika obhokumi obhokoro chwee.

2 Abhakorinto 4:17

Neghosiikëra hangʼu, gho kubha anyaako yiito n‑ihoho na n‑e riibhagha ighuhe hangʼu. Wiiki, neghotusëëmëra obhokumi obhokoro bho miishe ghyose. Obhokumi obhokoro bhuyo m‑bhokoro chwee, mboghotuköra korighi anyaako ino, n‑egheghiro ghesuuhu hangʼu.

2 Abhakorinto 5:18

Ghano ghoose ngakorwera kwo Waryobha uno ꞉atomiri Kirisito atutëmëërani itu nawe. Na niitu natoheere emeremo ghe kuraghani obhoghwani bhuyo.

2 Abhakorinto 6:18

Neekubha Iso waanyu, na niinyu mookubha abhaana bhaane bha ghesubhe na bha ghikari. Hangʼu nibhu Omutëmi Waryobha o Bhotoro Bhoose, akobhugha!”

Abhagharatiya 3:26

Ibheere inyu bhoose n‑abhaana bha Ryobha moonyi gho nchëra e ghokumi koonyu, gho kubha mughöötiine na Kirisito Yesu.

Abhaebheeso 2:7

Hangʼu nibhu akwënda kwërëkani kwo bhaato bha riibhagha rino rekuucha, obhwaru bho ghareeya yaache ino etaanyi ne ekirëngërë, ino retoheere kwo bhuchömu gho ghughöötana kwito na Kirisito Yesu.

Abhaebheeso 3:10

Nebhatoorere haheero kubha, gho nchëra e riikanisa, abhakangati na bhano bhaanyi no obhotoro mo‑se ino etaakorighibhu, bhamënyë amangʼiini gha Ryobha ghano ghaanyi gha manga maaru.

Abhakorosaayi 3:4

Obhuhöru bhoonyu mbokurëëtu na Kirisito. Eriibhagha rino akorighibhu, niho na niinyu moghusanga haghirohamu nawe mo‑bhokumi bhooche obhokoro.

2 Timotewo 2:10

Gho ghayo, neghoghumereri ghoose gho ghiri e bhaato bhano bhaahwiru ne Eryobha bhabhe abhaato bhaache. Neghuköra hangʼu, kubha bhoose bhasongʼaane obhotoori kohetera Kirisito Yesu, na ghusanga obhokumi bhooche obhokoro bho emiishe ghyose.

Abheebhuraaniya 12:2

Tubhe toramumööhërëri Yesu, gho kubha niwe asëëmiri obhokumi bhwito, wiiki nakobhohikeerani. Iwe ꞉naaghumeriiri oroko ro musarabha, tarooche chaasoni gho ghiri e ghuchömëru kuno koore ambërë yaache. Ibheere niikeere eribhaara re kubhökö gho kwiro re ghetumbe ghe ghitëmi ke Ryobha.

Abheebhuraaniya 6:20

Yesu nakangatiri na ghusöha ahaghiro hayo gho ghiri yiito. Nawe akabha Omuchaama Omokoro o miishe ghyose, kinya bhuno Merikiseteeki are.

Abheebhuraaniya 7:26

Omuchaama Omokoro anga uyo nakwëndëru chwee ghokwito gho kubha iwe m‑Mutööbhiyu, na taanyi ni isörö, wiiki taaköriri amasari ghoghoose ghaare. Eryobha ndemwahwire koru mo‑bhaköri bha masari, rekamotiiri ghuye Mwishaaro.

Abheebhuraaniya 7:28

Kurëngʼaana ne emeghiro ghe Musa, abhaato mbaare bharatooru kubha abhachaama abhakoro, nangabha ꞉bhaare bharataasi mo‑mangʼana maaru. Amare hano eriibhagha irë rehetiri, Eryobha ꞉ndiirahiiri hano remotooriri Omoona waache kubha Omuchaama uno ahikeriine emiishe ghyose.

1 Bheetero 1:12

Eryobha ndebhahunyuriire abharööti bhayo kubha, amangʼana ghano ꞉bhaare bhararööta, ghataare ghaghaabho abheene, amare n‑gho ghiri yaanyu. Amangʼana ghano ꞉bhaabhughiri, nigho muraghaniiru na abhaato bhano bhabharëëtiire Angʼana Anchömu ighoro e Yesu Kirisito kwo bhotoro bho Akörö Ahörëëru ino etomuru koru Mwishaaro. Amangʼana ghayo, koru bhamarayika mbaghwighomba chwee ghoghamënya.

1 Bheetero 5:1

Ibheere neghosiikëra na niinyu abhagharuka bha riikanisa. Eni n‑omugharuka mughëndi waanyu neenyi, na nerooche kwo miisho ghaane bhuno Kirisito anyaakiru. Wiiki, eni neghusanga na niinyu mo‑bhokumi obhokoro bhuno ˆbhoghatingʼi korighibhu. Gho ghayo ˆnekabhasasaama inyu,

1 Bheetero 5:10

Eryobha rino reenyi na aghareeya yoose, ndebhabherekiire ghusanga obhokumi bhooche obhokoro bho miishe ghyose, gho ghughöötana na Kirisito. Amare moramara kunyaaka kwo riibhagha ighuhe, iryo eryene ndekobhaköngʼi, ndekobhaha changuru, na kobhaköngʼëërëri.

Obhohunyurëru 4:11

“Omutëmi wiito ne Eryobha riito, nurëngʼaaniire ghoghongibhu, na ghosooku na kubha no obhotoro bhoose. Iye niiye utëëmiri ebheghiro bhyose, gho ghosiigha koocho ꞉mbiitëëmuru, wiiki niho bheenyi.”

Obhohunyurëru 7:9

Hano ghayo ghahetiri, nekarighi eriirighi erende. Nekarighi erikinda ikoro re bhaato rino retaare reratoru kubharu. Abhaato bhayo mbaare bha chaase choose, na bha matöngö ghoose, na abhahiiri bhoose na bha bhighambo bhyose. Bhiimeeriire ambërë e ghetumbe ghe ghitëmi, na ambërë e Moona o Ngʼöndu. Bhabheekiri chandachana cheero na mbaare bhaghöötëriire amato gha mitëndë.