Abhagharatiya 3:28 - Eriiraghano Eriihë

²⁸ Gho ghayo, bhotaanyi‑ho obhwahukani ghate e Muyahuuti no omooto o matöngö, hamu omusësë no omooto huuru, hamu omosubhe no omukari. Bhoose murëngʼiine, gho kubha mughöötiine na Kirisito Yesu.

Abhagharatiya 3:28 ပူးပေါင်းရင်းမြစ်များ

Yohana 10:16

Eni neenyi na changʼöndu echende chino chetaanyi che mo‑mowaara uno, choose nekwëndëru nechirëëtë. Changʼöndu chiyo choose nchekorimënya eriiraka reene. Gho nchëra iyo, ndeekubha erikinda rimu, no omoriishi umu.

Yohana 11:52

Wiiki Yesu taaghoku gho ghiri e ritöngö riyo eryene chiri, amare kubha abhakome abhaana bha Ryobha bhano bhasanchiri, kubha bhabhe haghirohamu.

Yohana 17:11

Eni nteekubha wiiki mo‑se ino, amare ibheere ˆnekaacha ghokoocho. Amare ibho mbakwëndërëra kubha mo‑se ino. Oo Taata Omutööbhiyu, ˆneghaghusabha obhachonge kwo bhotoro bho riina reecho rino oheere, kubha bhabhe egheghiro kimu kinya bhuno itu toonyi.

Abharuumi 1:16

Eni nteekorighi chaasoni kuraghani Angʼana Anchömu iyo, gho kubha nibho obhotoro bho Ryobha bhuno bhoghotoori abhaato bhoose bhano bhakomokumi Yesu, korwera mo‑Bhayahuuti mbagha mo‑bhaato bha matöngö.

Abharuumi 3:22

Abhaato bhoose bhano bhakomokumi Yesu Kirisito, Eryobha ndekobhabhara kubha abhahëënë ambërë yaache, gho kohetera obhuhëënë bho Yesu. Taahukiini omooto wowoose,

Abharuumi 8:1

Mbe, ibheere Eryobha retaakobharööna abhaato bhano bhaghöötiine na Kirisito Yesu.

Abharuumi 9:24

Mo‑bhaato bhayo nibho itu bhano rebherekiire. Retabherekiire Abhayahuuti abheene, amare koru abhaato bha matöngö.

1 Abhakorinto 7:14

Neghosiikëra hangʼu, gho kubha Eryobha ndekomosongʼaana omosubhe uno ataanyi omokumi, gho ghiri e mukari waache. Hangʼu hangʼu omukari uno taanyi omokumi, Eryobha ndekomosongʼaana gho ghiri e mosubhe waache. Aribha etangabheere hangʼu, abhaana bhaanyu bhatangabheere abhaana bha Ryobha, amare ibheere n‑abhaana bha Ryobha.

1 Abhakorinto 7:19

Ghusaaru hamu ghotigha ghusaaru ghotaanyi no obhwëra. Egheghiro kino keenyi no obhwëra n‑ghughööta emeghiro ghe Ryobha.

Abhagharatiya 3:14

Natotooriri, kubha orubhango runo ahaabhuru Abhurahamu, robhahikere abhaato bha matöngö kohetera Yesu Kirisito. Mbe, ibheere itu bhoose ntoghotora ghosongʼaana Akörö Ahörëëru ino Eryobha ꞉riiraghiri ghotuha gho nchëra e komokumi Yesu Kirisito.

Abhagharatiya 3:26

Ibheere inyu bhoose n‑abhaana bha Ryobha moonyi gho nchëra e ghokumi koonyu, gho kubha mughöötiine na Kirisito Yesu.

Abhagharatiya 4:14

Nangabha kunyaakibhu kwo mobhere waane ꞉nguughëriri musakibhu, amare inyu motantaraahiri hamu konyanga. Amare kino ꞉muuköriri n‑konyiishereri kinya bhuno mongamwisheriiri marayika o Ryobha, hamu kinya Kirisito Yesu omwene.

Abhagharatiya 5:24

Abhaato bhano bhaghöötiine na Kirisito Yesu, bhatahakangatu na simoka yaabho e masari haghirohamu na amiigha ghaabho amabhe. N‑kinya bhamambiri simoka yaabho e masari mo‑musarabha o Yesu.

Abhagharatiya 5:6

Mbe, aribha tughöötiine na Kirisito Yesu, ghusaaru hamu kwanga ghusaaru ghotaanyi ne ekebhune ghyokyose. Egheghiro ke bhwëra n‑obhokumi bhwito bhuno bhohaaköra emeremo kwo bhosiighi.

Abhaebheeso 1:1

Anyaarubha ino neyandëkiri eni Bhawuro, uno nebherekiiru kubha omotomu o Yesu Kirisito, kwo mënda gha Ryobha. ˆNekabhaandëkëra inyu abhatööbhiyu bha Ryobha bhano mumanyiri Ebheeso, bhano momokumiri Kirisito Yesu.

Abhaebheeso 4:4

Itu bhoose ntoonyi kinya omobhere umu na ꞉ntoobhwine Akörö Ahörëëru imu, kinya bhuno eriitëngʼërö rino mobherekiiru ne Eryobha reenyi rimu.

Abhabhiribhi 1:1

Anyaarubha ino neyandëkiri eni Bhawuro haghirohamu na Timotewo omutamishi mughëndi waane o Kirisito Yesu. Ntokobhaandëkëra inyu amasikoofu na amashemaasi, haghirohamu na abhatööbhiyu bha iyo Bhiribhi bhano mughöötaniibhu na Kirisito Yesu.

Abhakorosaayi 1:4

Ntoghuköra hangʼu gho kubha ntooghwire kebhuno momokumiri Kirisito Yesu, na kinya obhosiighi bhoonyu bhoonyi kwo bhaato bhaache.

Abhakorosaayi 3:11

Gho ghayo, bhotaanyi‑ho bhwahukani bho Muyahuuti hamu omooto o matöngö, uno asaaruru, hamu uno atasaaruru, uno aghutaraahu na uno atasömiri, omusësë hamu uno ataanyi omusësë. Amare Kirisito niwe akohikeerani ghoose, wiiki naanyi moose e bhoose.

1 Timotewo 1:12

Nekomwitabheri Kirisito Yesu Omutëmi wiito, gho kubha ꞉naandooche kubha muhëënë neenyi, akanyaahura kubha omutamishi waache na kuuha obhotoro bho ghuköra emeremo gheeche. Nekomwitabheri, gho kubha ꞉naandooche kubha nekurëngʼaanera kubha omutamishi waache,

2 Timotewo 1:1

Anyaarubha ino neyandëkiri eni Bhawuro. Eni netomuru kwo mënda gha Ryobha kubha omotomu o Kirisito Yesu, kubha niraghani angʼana e bhuhöru. Eryobha ꞉ndiiraghiri kubha, obhuhöru bhuyo mbokubhönëka gho komokumi Kirisito Yesu.