Abhabhiribhi 1:12 - Eriiraghano Eriihë

¹² Mbe, bhahiiri bhaane, nekwënda mumënyë bhoheene kubha ghoose ghano ghambwine, ngantooriri chwee kuraghani Angʼana Anchömu.

Abhabhiribhi 1:12 ပူးပေါင်းရင်းမြစ်များ

Ruuka 21:13

Hayo niho mokubhöna omweya o kuraghani angʼana yaane.

Amaköri gha Bhatomu 8:4

Abhaghëndi bha Yesu bhano ꞉bhaasanchiri, bhaakabha bhareeghi abhaato Angʼana Anchömu e Yesu haghiro hoose hano bhaghiire.

Abharuumi 8:28

Ntweche kubha, mo‑ghoose Eryobha ndehaabhakörëra amachömu abhaato bhoose bhano bharesiighiri, bhano rebhabherekiire kurëngʼaana na amënda ghaache.

Abharuumi 8:37

Amare nangabha ghayo ghoose ghaghotubhöna, itu ntokeere toonyi no obhokindi bhokoro, gho kubha Kirisito natosiighiri.

Abhabhiribhi 1:5

gho kubha inyu mughöötiine na neeni gho kuraghani Angʼana Anchömu korwera orosiko runo ꞉mooghwire na koyekumi mbagha reero ino.

Abhabhiribhi 1:7

N‑kumangi niituuri hangʼu ighoro yaanyu, gho kubha moonyi mo‑motema waane. Musangiri aghareeya e Ryobha haghirohamu na neeni, erabha nibhöhuru hamu erabha nekwibhateri na koyihëënëhi Angʼana Anchömu.

Abhabhiribhi 2:22

Amare mweche kinya Timotewo ꞉iyëërëkiini kubha m‑mooto muchömu. Nahökiri na neeni mo‑meremo ghe kuraghani Angʼana Anchömu, kinya omoona ni ishe.

Abhabhiribhi 4:15

Kinya mweche inyu Abhabhiribhi, hayo ekimbërë hano niisëëmiri kobharaghaneri inyu Angʼana Anchömu, na hano neruure mo‑mukööwa waanyu o Maketoniya, inyu bheene nibho moore morantoori. Eriikanisa reenyu niryo reere no obhughöötani na neeni mo‑koruusi na kumbönëra ebheghiro.

Abhabhiribhi 4:3

Koru iye uno onyi omutamishi omughëndi waane omuhëënë, neghusabha obhasakeri abhakari bhayo bhabhere bhabhe no obhoghwani. Bhayo bhoose bhabhere ꞉mbiiköngʼiri chwee haghirohamu na neeni kuraghani Angʼana Anchömu e Yesu Kirisito mo‑bhaato. Wiiki abhakari bhayo mbaare bharaköra emeremo haghirohamu na Kireementi na abhahöki bhaghëndi bhaane abhande. Amariina gha bhaato bhayo bhoose ngaandëkuru mo‑Ghitabhu ke Bhuhöru.

1 Timotewo 2:8

Gho ghayo, ahaghiro hoose hano moghwikomana ghusabha, nekwënda abhasubhe hano bhaakubha bharasabha bhaghongi amabhökö ghaabho ighoro, bhakörë hangʼu kwo mukörö mwero ino bhataaghushangʼaana hamu ghukarara.

2 Timotewo 2:9

Gho ghiri e ngʼana iyo, eni nekunyaaka na nibhöhuru ne eminyörörö kinya omuköri o mabhe. Amare angʼana e Ryobha teeghotora kubhöhu.

2 Timotewo 4:17

Amare Omutëmi Yesu naare haghirohamu na neeni. ꞉Naaheere changuru che kuraghani Angʼana Anchömu kwo bhohikeeranu, kubha abhaato bhoose bha matöngö bhayooghu. ꞉Naantooriri mo‑tabhaaribhaari e roko, gho kubha neere kinya uno anyi mo‑monu o ka.