2 Abhatesaronike 3:16 - Eriiraghano Eriihë

¹⁶ Ibheere, Omutëmi Yesu omwene uno anyi omutangi o murëmbë, abhe arabhaha omurëmbë eriibhagha ryose gho chanchëra haghare haghare. Iwe abhe haghirohamu na niinyu bhoose.

2 Abhatesaronike 3:16 ပူးပေါင်းရင်းမြစ်များ

Mataayo 1:23

“Mööhi! Omuukë uno ataamara amënya omosubhe naghughëgha anda, nawe nakwibhora omoona o ghesiite! Nabho mbakomoroka eriina reeche Emanweri.” Egheteemoro keeche, “Eryobha ndeenyi haghirohamu na niitu.”

Mataayo 28:20

Wiiki mobheeghi ghoghaghööta ghoose ghano nebherekeriiri inyu. Mööhi! Neekubha haghirohamu na niinyu eriibhagha ryose mbagha mo‑ntenero e se.”

Ruuka 2:14

“Eryobha re Mwishaaro reghongibhu! No omurëmbë ubhe mo‑se yoose, kwo bhaato bhano Eryobha resiighiri!”

Yohana 14:27

Hano neghutanura, nekobhatighera omurëmbë, omurëmbë waane nekobhaha. Omurëmbë uno taanyi kinya uno okoru mo‑se. Motiitumata mo‑metema gheenyu, wiiki motatiina ghyokyose.

Yohana 16:33

Nebhughiri ghayo ghoose kubha mubhe no omurëmbë mo‑metema gheenyu, gho kubha moonyi moose yaane. Mo‑se muno mokubhöna anyaako yaaru, amare mwitoore omukörö gho kubha eni neyekindiri ase.”

Abharuumi 1:7

ˆNekabhaandëkëra inyu abhakumi bhoose bhano moonyi iyo Ruumi. Eryobha ndebhasiighiri chwee, na ꞉ndeebhabherekiire kubha mubhe abhaato bhaache abhatööbhiyu. Nëköbhëëndëra aghareeya no omurëmbë koru kwo Waryobha Taata wiito, na kwo Mutëmi wiito Yesu Kirisito, ghibhe haghirohamu na niinyu.

Abharuumi 15:33

Eryobha rino rekobhaha omurëmbë, ribhe haghirohamu na niinyu bhoose. Hawubhaabha.

Abharuumi 16:20

Eryobha rino rekobhaha omurëmbë, ndeghughëri moritachera haase Erishambu ghano matiko, na kobhaha obhokindi ighoro yaache. Aghareeya e Mutëmi wiito Yesu Kirisito, ibhe haghirohamu na niinyu. [Hawubhaabha.]

1 Abhakorinto 14:33

Neekubha hangʼu, kinya enyi mo‑makanisa ghoose gha bhaato bha Ryobha, gho kubha Eryobha riito retaanyi re nyööri, amare n‑de murëmbë.

2 Abhakorinto 13:11

Ibheere, abhahiiri bhaane, masaraamu! Mubhe bhaghöröröku, na mwighambisani, na mubhe no obhumu, na mubhe no omurëmbë. Eryobha ryose rino reenyi no obhosiighi no omurëmbë ndeekubha haghirohamu na niinyu.

Abhaebheeso 6:23

Nëköbhëëndëra inyu abhahiiri bhaane omurëmbë, no obhosiighi haghirohamu no obhokumi koru o‑Taata Waryobha na kwo Mutëmi wiito Yesu Kirisito.

1 Abhatesaronike 3:11

Ntokomusabha Waryobha, Taata wiito omwene, na Yesu Omutëmi wiito, atusëëmërë anchëra e kuucha bhowaanyu.

1 Abhatesaronike 5:23

Eryobha eryene niryo reghotuha omurëmbë, rebhamuse inyu mo‑ghoose. Reghechonge emetema gheenyu no obhuhöru bhoonyu ne emebhere gheenyu, kubha mubhe motaanyi ni isörö mbagha kohikera eriibhagha re kuucha Omutëmi wiito Yesu Kirisito.

2 Abhatesaronike 3:18

Aghareeya e Mutëmi wiito Yesu Kirisito, ibhe haghirohamu na niinyu bhoose.

2 Timotewo 4:22

Omutëmi Yesu abhe haghirohamu na niiye. Aghareeya yaache ibhe haghirohamu na niinyu bhoose.

Bhiremooni 1:25

Nëköbhëëndëra aghareeya e Mutëmi Yesu Kirisito ibhe haghirohamu na niinyu.

Abheebhuraaniya 13:20

Mbe, Eryobha re murëmbë ꞉ndeemoryokiri Omutëmi wiito Yesu, Omoriishi Omokoro o changʼöndu, gho ghiri ekubha ꞉niitiri amasaahë ghaache ghano ghahëënëhiri eriiraghano re miishe ghyose.

Abheebhuraaniya 7:2

Iwe Abhurahamu akaruusi imu ghwi ikomi mo‑bheghiro bhino ahökiri abhatëmi bhaare mwihë na komuha Merikiseteeki. Eriina re Merikiseteeki egheteemoro keeche, “Omutëmi uno anyi no obhuhëënë,” wiiki eriina re “Omutëmi o Sareemu” egheteemoro keeche, “Omutëmi o murëmbë.”