2 Abhatesaronike 1:8 - Eriiraghano Eriihë

⁸ Yesu niwe akobharööna bhoose bhano bhakoryanga Eryobha na bhano bhataaghosooka Angʼana yaache Anchömu.

2 Abhatesaronike 1:8 ပူးပေါင်းရင်းမြစ်များ

Mataayo 25:41

“Niho nekobhabhoorera bhaare bhaanyi okubhökö koone gho kumosi nebhughe, ‘Mondwere hano inyu bhano Eryobha riihiimiri! Moghi mo‑mororo o miishe ghyose uno Eryobha riisëëmiri gho ghiri e Rishambu na bhamarayika bhaache.

Mataayo 25:46

“Niho abhaköri bha masari bhaare bhaghutanura na ghuye ghoteneru ekiina ke miishe ghyose. Amare bhaare abhahëënë, mbaghusöha mo‑bhuhöru bho miishe ghyose.”

Yohana 3:19

Ghoteneru ekiina niko kuno, obhwero mbwichiri mo‑se, amare abhaato bhaaru mbasiighiri kubha mo‑kengʼuuri ghokera kubha mo‑bhwero, gho kubha amaköri ghaabho m‑mabhe.

Yohana 8:19

Niho Amabharisaayo bhakamobhoori Yesu bhakabhugha, “Kana, Iso hayi anyi?” Yesu akabhagharokeri akabhugha, “Inyu motanyeche eni, koru Taata waane motamweche. Erabha mongamënyiri eni, mongamumënyiri na Taata waane woose.”

Amaköri gha Bhatomu 6:7

Angʼana e Ryobha ëkëëndërëra ghusancha mo‑bhaato. Wiiki ekirëngërë ke bhaghëndi bha Yesu ghëkëëngëra chwee iyo Yerusareemu, na koru erikinda ikoro re bhachaama bhakamokumi Yesu.

Abharuumi 1:28

Mbe, gho kubha abhaato mbaangiri korimënya Eryobha, ryose ndebhatighiri bhabhe bharatambana amiihëëbhö ghaabho ghano ghakobharumeeri. Ibheere mbaghuköra amangʼana ghano ghataakurëngʼaanera ghuköru.

Abharuumi 1:5

Gho kohetera ghokooche Eryobha ndeheere aghareeya e kubha omotomu o Mutëmi Yesu, kubha nebharaghaneri Angʼana Anchömu abhaato bhoose bha matöngö, bhabhönë komokumi na komosooka.

Abharuumi 10:16

Koru hangʼu, taanyi Abhiisiraeri bhoose bhayiisheriiri na koyesooka Angʼana Anchömu iyo, abhaaru ꞉mbaayaangiri. Omurööti Isaaya ꞉naabhughiri kubha, “Omutëmi, n‑niwe uno ꞉akumiri amangʼana ghiito?”

Abharuumi 15:18

Eni nteeghosiikëra angʼana yoyoose ayende, amare ghaare Kirisito aköriri kohetera ghokoone. ꞉Naaköriri abhaato bha matöngö bharesooke Eryobha, kohetera amangʼana ghano neere nerasiikëra ne emeremo ghino neere neraköra.

Abharuumi 16:26

na kohetera mo‑Mandëkö Amatööbhiyu gha abharööti, angʼana iyo nimënyuru kwo bhaato bha amatöngö ghoose mo‑se. Eryobha re miishe ghyose niryo rihatëkiri angʼana iyo iraghanibhu mo‑bhaato bhoose, kubha bhayo bhoose bhatore komokumi na komosooka Omutëmi Yesu.

Abharuumi 6:16

Moteeche kubha, moriiruusi kwo mooto na ghuköra ghano akwënda, niho mookubha moramosooka kinya abhasësë bhaache? Mbe, kinya mookubha moriiruusi ghuköra amasari, mookubha abhasësë bha masari, na kino ghekobhabhöna n‑oroko. Amare aribha moriiruusi koresooka Eryobha, mookubha abhasësë bha Ryobha, na kino ghekobhabhöna n‑eriimanya rino reenyi re bhuhëënë.

1 Abhakorinto 15:34

Musëëmë kuhökëri obhongo bhoonyu wiiki kinya bhuno mokwëndëru, na ghotigha ghuköra amasari, gho kubha abhamu ghate yaanyu bhataryeche Eryobha. Neghosiikëra ghayo, kubha nebhasooki.

2 Abhakorinto 10:5

Ntoghusari amangʼana ghoose gha bhuröngö, na gha kwihacha ghano ghakuhööchërëra abhaato bhatarimënya Eryobha. Wiiki ntoghugharura amiihëëbhö ghoose amabhe, kubha ghamosooke Kirisito.

Abhagharatiya 3:1

Inyu Abhagharatiya abharaghaanu! N‑niwe abharoghiri? Yesu Kirisito ꞉naaghamburu haheero ambërë yaanyu kubha namamburu.

Abhagharatiya 4:8

Inyu hayo ekeenyuma motarimënyiri Eryobha. Eriibhagha riyo, moore abhasësë bha misambu ghino ghetaanyi Eryobha.

1 Abhatesaronike 4:5

Motabha na ghwighomba kobhe kinya abhaato bhano bhataryeche Eryobha.

Abheebhuraaniya 10:27

Mbe, ntusaaghiri toraghanya kwo bhotiini ghoteneru ekiina ke Ryobha kwo mororo muhaari uno okobhasireekereri abhaato bhoose bhano bhakoryanga Eryobha.

Abheebhuraaniya 10:30

Ntweche Eryobha ꞉ndeebhughiri kubha, “Korehani asiire n‑emeremo gheene, eni niwe nehaarehani asiire.” Wiiki ꞉ndeebhughiri kubha, “Omutëmi Waryobha nakobhatenera ekiina abhaato bhaache.”

Abheebhuraaniya 11:8

Obhokumi ꞉mbuuköriri Abhurahamu akaresooka Eryobha, hano remobhooriire kubha aru mo‑se yaache, aghi mo‑se ino Eryobha ꞉reemuraghiri komuha. Abhurahamu akaru mo‑se yaache, nangabha taamënyiri hano aghuye.

Abheebhuraaniya 12:29

gho kubha Eryobha riito ndeenyi kinya omororo muhaari uno oghweki na ghosireekereri kimu.

Abheebhuraaniya 2:3

Aribha ꞉ghaaköruru hangʼu ghokoobho, kana, itu ntoghotora bhu kuhöna ghoteneru ekiina aribha totaaghotereera obhotoori obhokoro kinya bhuno? Omutëmi Yesu niwe uno asëëmiri kuraghani obhotoori bhuyo na abhaato bhano ꞉bhooghwire, ꞉mbaahëënëhiri ghokwito kubha m‑mahëënë.

Abheebhuraaniya 5:9

Kurëngʼaana na ghayo, Eryobha rekamohikeerani na kurëngʼaanera kubha simoka e bhotoori bho miishe ghyose gho ghiri e bhaato bhoose bhano bhakomosooka.

1 Bheetero 1:2

Korwera kare, Taata Waryobha nabhamënyiri na kobhaahura gho ghiri yaache. Akörö yaache nebhaköriri mubhe abhatööbhiyu, kubha momosooke Yesu Kirisito na komusu kwo masaahë ghaache. Nëköbhëëndëra aghareeya no omurëmbë kwo bhwaru, ghibhe na niinyu.

1 Bheetero 3:6

Omukari o ghetuubhaani n‑Saara, omukari o Abhurahamu. Iwe naare aramosooka omosubhe waache bhoheene, aramobherekera omutëmi. Bhuure bhuure inyu bhoose, aribha moghuköra amachömu ino motaaghotiina ghyokyose, mbe, mobheere abhaana bhaache.

1 Bheetero 4:17

Mumënyë kubha, eriibhagha re ghoteneru ekiina ˆrekahika, ne Eryobha ndeghusëëma ghotenera ekiina abhaato bhaache. Ibheere, aribha ghoteneru ekiina ngoghusëëmëra ghokwito itu bhano toonyi abhaato bhaache, kana nibhu ekubha kwo bhano bhakwanga Angʼana Anchömu e Ryobha?

2 Bheetero 3:7

Wiiki kwo ngʼana iyo iyo Eryobha ꞉ndeetindekiri erishaaro na ase ino, bhiiche bhyekibhu no omororo. ꞉Ndeebhetooriri gho ghiri e rosiko ruure abhaato bhano bhataakoresooka Eryobha bhaghoteneru ekiina na ghosireekereru.

Yuuta 1:7

Wiiki, mohiite ghano ꞉ghaabhabhwine abhaato bha meghya ghe Sotoma na Ghomora, na bha meghya ghe haghuhe. Bhayo ꞉mbaaköriri amangʼana ghaare ghaare kinya bhamarayika bhayo ꞉bhaaköriri. Mbaare bharaköra obhutaari na ghutambana amiigha gha mobhere kinya etaakwëndëru na kebhuno ꞉bhaatëëmuru. Ghoteneru ekiina koobho, nkoore ghosireekereru no omororo na kuyo nkubheere eghetuubhaani ghe nchagho e mororo o miishe ghyose kwo bhaato bhoose.

Obhohunyurëru 20:10

Mbe, Erishambu, rino rebhangʼiiniri, ndekurëkëru mo‑nyancha e mororo muhaari chwee. Hayo niho ahaghiro hano bharëkiire oghotyenyi ghuure no omurööti wuure o bhuröngö. Ibho mbakunyaakibhu iyo obhotiko no omwishe, emiishe ne emiishe.

Obhohunyurëru 21:8

Amare abhatiini, na bhano bhataakorekumi Eryobha, na bhano bhakorikarari Eryobha, na abhiiti, na abhataari, na abhaturutumbi, na abhasëngëri bha misambu, na abharöngö, bhayo bhoose ahaghiro haabho n‑anyancha e mororo muhaari chwee. Na ruyo niro oroko ro kabhere.”

Obhohunyurëru 6:10

Niho chaakörö chiyo, cheghaköra eriireghe cherabhugha, “Oo Omutëmi, Omutööbhiyu no Omuhëënë, ngwake ˆoghakëëchëra! Nyingake oghotenera ekiina abhaato bha se na korehani asiire e ghotwita?”