2 Abhakorinto 9:13 - Eriiraghano Eriihë

¹³ Emeremo ghiyo ngekwërëki kubha inyu n‑abhatamishi bhachömu, na kohetera ghayo, abhaato mbakoreghongi Eryobha. Mbakoreghongi gho ghiri mbakorighi kebhuno mokoyesooka Angʼana Anchömu ighoro e Kirisito. Wiiki mbakoreghongi hano bhakorighi obhusambaaroku bhoonyu gho nchëra e ghusanga ebheghiro bheenyu haghirohamu nabho na abhande bhoose.

2 Abhakorinto 9:13 ပူးပေါင်းရင်းမြစ်များ

Mataayo 5:16

Hangʼu hangʼu ne emirëngaari gheenyu ngekwëndëru ghirëngaari kwo bhaato, kubha bhabhönë korighi amaköri ghaanyu amachömu, bhamoghongi Iso waanyu uno anyi Mwishaaro.

Mataayo 9:8

Hano abhaato bhano ꞉bhaare hayo bhagharooche ghayo, bhakahagha na ghotiina chwee. Bhakareghongi Eryobha rino reheere abhaato obhotoro bhonga bhuyo.

Ruuka 6:46

“Ngwake mokomberekera, ‘Omutëmi, Omutëmi,’ amare amangʼana ghano ˆnekabhabhoorera, motaaghoghaköra?

Yohana 15:8

Abhaanabheegha bhaane bha hëënë mbahaasönga amakorobhese maaru. Gho ghiri iyo abhaato mbakumënya kinya Taata anyi mokoro.

Amaköri gha Bhatomu 11:18

Hano Abhayahuuti bhayo bhooghwire ghayo, bhataare na re ghugharokeri. Bhakaritöghösi Eryobha bhakabhugha, “Kana, Eryobha ndebhaheere abhaato bha matöngö aghande omweya o ghotuukuunera amasari ghaabho, kubha bhabhönë obhuhöru bho miishe ghyose!”

Amaköri gha Bhatomu 4:21

Hano bhamariri kobhatiini Bheetero na Yohana bhakabhatighooroka. Abhakoro bhayo bhatarooche anchëra e kobharööna, gho kubha abhaato bhoose mbaare bharareghongi Eryobha chwee ighoro e kiraghe kiyo.

Abharuumi 10:16

Koru hangʼu, taanyi Abhiisiraeri bhoose bhayiisheriiri na koyesooka Angʼana Anchömu iyo, abhaaru ꞉mbaayaangiri. Omurööti Isaaya ꞉naabhughiri kubha, “Omutëmi, n‑niwe uno ꞉akumiri amangʼana ghiito?”

Abharuumi 12:8

Omooto uno ahaabhuru ekihaano ghe ghughambisani bhaghëndi bhaache, akörë hangʼu. Omooto uno ahaabhuru ekihaano ghe ghusambaarukera abhaato, abhasambaarukere kwo mukörö mwero. Omooto uno ahaabhuru ekihaano ghe ghukangata, akangate gho ghwiköngʼi chwee. Wiiki omooto uno ahaabhuru ekihaano ke bheghongi, abharigheri ebheghongi abhaato gho ghuchömëru.

Abharuumi 15:31

Munsabhere kubha, abhaato bha mukööwa o Yuteya bhano bhakwanga komokumi Yesu Kirisito, bhataacha ghunkörëra amabhe. Wiiki munsabhere kubha abhakumi bha iyo Yerusareemu, bhiishereri ghosongʼaana obhotoorereri bhuno nekobhahirera koru kwo bhaato bha matöngö.

Abharuumi 16:26

na kohetera mo‑Mandëkö Amatööbhiyu gha abharööti, angʼana iyo nimënyuru kwo bhaato bha amatöngö ghoose mo‑se. Eryobha re miishe ghyose niryo rihatëkiri angʼana iyo iraghanibhu mo‑bhaato bhoose, kubha bhayo bhoose bhatore komokumi na komosooka Omutëmi Yesu.

2 Abhakorinto 10:5

Ntoghusari amangʼana ghoose gha bhuröngö, na gha kwihacha ghano ghakuhööchërëra abhaato bhatarimënya Eryobha. Wiiki ntoghugharura amiihëëbhö ghoose amabhe, kubha ghamosooke Kirisito.

2 Abhakorinto 2:12

Ibheere, hano nehikiri mo‑moghya o Torowa kuraghani Angʼana Anchömu ighoro e Kirisito, nekabhöna Omutëmi amariri ghunkörëra anchëra e ghuköra emeremo gheeche hayo.

2 Abhakorinto 8:4

na ꞉mbaatusasaamiri chwee kubha, tobhahë omweya o ghusanga kobhatoori abhakumi bha Yerusareemu.

2 Abhakorinto 9:14

Niho bhaakubha bharabhasabhera kwo Waryobha kwo mukörö woose, gho ghiri e ghareeya ino etaanyi ne ekirëngërë ino Eryobha rebhaheere inyu.

Abhagharatiya 1:24

Mbe, bhakareghongi Eryobha gho ghiri e ghano rinköriire.

1 Timotewo 6:12

Wiköngʼi kurööna eriihë ichömu re bhokumi bhwito, ughöötërërë obhuhöru bho miishe ghyose. Obhuhöru bhuyo, Eryobha ndebhabherekiire mobhubhönë, na moruusiri obhwibhateri bho mahëënë ambërë e bhiibhateri bhaaru kubha, moghwitëngʼëra kobhubhöna.

1 Timotewo 6:13

Neghaghokumereri ambërë e Ryobha rino reghotoora obhuhöru moose e bheghiro bhyose, na ambërë e Kirisito Yesu uno aruusiri obhwibhateri bho mahëënë ambërë e Bhontiyo Bhiraato, kubha,

Abheebhuraaniya 10:23

Twiköngʼi chwee ghoghaghööta ghano toghoghakumi na ghoghitëngʼëra totighe kohombahoomba, gho kubha Eryobha n‑ihëënë mo‑ghano riraghiri.

Abheebhuraaniya 13:16

Mwëndërërë kobhatoori abhaghëndi na ghusanga nabho ebheghiro bhino moonyi nabhyo, gho kubha ghuköra hangʼu, nigho amaruusi ghano ghaghuchömëri Eryobha.

Abheebhuraaniya 3:1

Gho ghayo, inyu abhakumi abhaghëndi bhaane, bhano Eryobha rebherekiire kubha abhaato bhaache, mwituuri ighoro e Yesu, uno anyi Omotomu o Ryobha wiiki n‑Omuchaama Omokoro uno tokomokumi.

Abheebhuraaniya 4:14

Mbe, ntoonyi nawe Omuchaama Omokoro, Yesu, Omoona o Ryobha uno aghiire na ghusöha Mwishaaro. Gho ghiri iyo, ntughöötërërë ghano toghokumi.

Abheebhuraaniya 5:9

Kurëngʼaana na ghayo, Eryobha rekamohikeerani na kurëngʼaanera kubha simoka e bhotoori bho miishe ghyose gho ghiri e bhaato bhoose bhano bhakomosooka.

1 Bheetero 2:9

Amare inyu n‑orwibhoro orwahöru, na abhachaama bha ghitëmi, na abhaato abhatööbhiyu, na abhaato bha Ryobha eryene, kubha muraghani amaköri amakoro gha Ryobha. Iryo ndebhabherekiire koru mo‑kengʼuuri, moghi mo‑bhwero bhooche obhokoro bho koroghoori.

1 Bheetero 4:11

Aribha omooto anyi na amangʼana gha ghosiikëra, asiikërë kinya n‑kwo Ryobha gharuure. Na aribha omooto aghusakeri abhaghëndi bhaache, abhasakeri kwo bhotoro bhuno bhookoru kwo Waryobha. Gho ghayo, Eryobha ndeghoghongibhu mo‑mangʼana ghoose, gho nchëra e Yesu Kirisito omwene uno anyi no obhokumi obhokoro no obhotoro emiishe ne emiishe. Hawubhaabha.