2 Abhakorinto 3:18 - Eriiraghano Eriihë

¹⁸ Ibheere itu bhoose bhano totaaghwikundekeri mo‑bhosho ne eghitambara, ntokwërëki obhokumi obhokoro bho Mutëmi kinya ekiröri. Omutëmi uno anyi Akörö, nahaatugharura totuubhaane nawe. Naakubha aratugharura koru obhokumi obhokoro mbagha kohika obhokumi obhokoro chwee.

2 Abhakorinto 3:18 ပူးပေါင်းရင်းမြစ်များ

Yohana 1:14

Angʼana iyo ekabha omooto, aghiikara ghateghate yiito. Itu bhoose tokabhorighi obhokumi bhooche obhokoro, obhokumi bhooche obhokoro iwe uno anyi Omoona omwene chiri o Taata, niichwire aghareeya no obhuhëënë.

Yohana 12:41

Isaaya ꞉naabhughiri ghayo gho kubha ꞉naarooche gho kurë obhokumi obhokoro bho Yesu na kobhugha amangʼana ghaache.

Yohana 17:22

Obhokumi obhokoro bhuno oheere eni, nebhaheere abhaanabheegha bhaane, kubha bhabhe egheghiro kimu, kinya bhuno itu toonyi egheghiro kimu.

Yohana 17:24

“Oo Taata, nekwënda kubha bhano oheere bhabhe haghirohamu na neeni hano neekubha, kubha bhabhorighi obhokumi bhoone obhokoro bhuno oheere, gho kubha ꞉nuushamiri ghonsiigha koru ase ekeere ghutëëmu.

Abharuumi 12:2

Moteegha chaasughara che bhaato bha mo‑se ino, amare motighe Eryobha righarure emetema gheenyu, kubha mubhe na amiihëëbhö amahë. Hayo niho mokwegha kumënya kebhuno Eryobha rekwënda mukörë. Mokumënya n‑amangʼana ghaahë ghano ghaanyi amachömu, na ghano ghakoretegheri, wiiki na ghano ghahikeriine.

Abharuumi 13:14

Amare ibheere, mo‑riimanya reenyu ryose, mubhe morakangatu no Omutëmi Yesu Kirisito. Motiishereri koru hasuuhu ghukangatu na simoka yaanyu e masari moratambana amiigha ghaanyu amabhe.

Abharuumi 8:29

Eryobha ꞉ndiimënyiri abhaato bhaache korwera hano ase ere ekeere ghutëëmu. Bhayo nibho Eryobha ꞉ryaahwire korwera kare bhabhe kinya Omoona waache Yesu Kirisito. ꞉Ndiiköriri hangʼu kubha Omoona waache abhe omutange ghate e bhahiiri bhaaru.

Abharuumi 8:4

Eryobha ꞉ndiiköriri hangʼu, kubha amangʼana ghoose gha bhuhëënë ghano ghakwëndëru mo‑meghiro ghahikeeranu na Yesu gho ghiri yiito. Itu ntoghukangatu na Akörö Ahörëëru, na totaaghukangatu wiiki na simoka yiito e masari.

Abharuumi 8:7

Abhaato bhano bhaghukangatu na simoka yaabho e masari, bhayo n‑abhabhisa bha Ryobha. Bhataaghughööta emeghiro gheeche, bhataaghotora ghoghighööta.

1 Abhakorinto 13:12

Kinya bhuno tookorighi ibheere, ntokorighi ebheghiro kinya bhekundekiiru ne eghetu, amare toramara ntokobherighi bhyose haheero. Ibheere nyeeche hasuuhu hangʼu, amare nekumara nimënyë ghoose bhoheene, kinya bhuno Eryobha reenyeche eni.

1 Abhakorinto 15:49

Kinya bhuno totuubhiine na Ataamu, uno atëëmuru koru mwiröbhë, hangʼu hangʼu ntoghotuubhaana na Kirisito, uno aruure Mwishaaro.

2 Abhakorinto 3:17

Mbe, Omutëmi niwe Akörö, hano enyi Akörö e Mutëmi haanyi no obhohuuru.

2 Abhakorinto 4:4

Angʼana Anchömu timënyuru mo‑bhaato bhano gho kubha, Erishambu rino reenyi omutëmi o se ino, ndehunyiri obhongo bho bhano bhataakomokumi Yesu. ꞉Ndiiköriri hangʼu kubha bhakindu korighi obhwero bho Angʼana Anchömu e bhokumi obhokoro bho Kirisito, uno anyi eghetuubhaani ke Ryobha.

2 Abhakorinto 4:6

Eryobha rino ꞉reebhughiri kubha, “Obhwero bhurëngaari mo‑kengʼuuri,” niryo riyo rirëngaariri mo‑metema ghiito, na ghotuköra tumënyë obhokumi bhooche obhokoro bhuno bhokurëngaari mo‑bhosho bho Yesu Kirisito.

2 Abhakorinto 5:17

Omooto wowoose uno akubha aghöötiine na Kirisito, naakubha omooto omuhë, gha kare ngahetiri, ibheere ngabheere amahë!

Abhagharatiya 6:15

Ghusaaru hamu kwanga ghusaaru, ghotaanyi ne ekebhune ghyokyose. Egheghiro ke bhwëra n‑ghuköru obhuhë ne Eryobha.

Abhakorosaayi 3:10

mobheekiri atëëmö ahë. Atëëmö ahë iyo nehaabha eraköru bhuhë kurëngʼaana ne eghetuubhaani keeche eryene rino reyebhombiri, kubha morimënyë bhoheene.

1 Timotewo 1:11

Ameeghi ghayo gha hëënë ngahaabhönëka mo‑Ngʼana Anchömu, ino ekwërëki obhokumi obhokoro bho Ryobha rino reghoghongibhu. Angʼana iyo niyo ꞉niihaabhuru ne Eryobha neyiraghani.

Tiito 3:5

Retaaköriri hangʼu gho kubha amaköri ghiito ango n‑gha hëënë ꞉ghaare, amare n‑gho changori cheeche okwene. Ndetomusiri obhobhe bhwito, kuyo niko okwibhoru okuhë. Wiiki ndetoheere eriimanya eriihë gho nchëra e Körö Ahörëëru.

Yakobho 1:23

Mbe, gho kubha omooto woose uno aghutëghëërëra angʼana yaache, amare ataköra kinya ekobhugha, uyo natubhiine kinya omooto uno akwimööhi obhosho bhooche mo‑kiröri.

1 Yohana 3:2

Abhasiighani bhaane, ibheere itu n‑abhaana bha Ryobha, amare timënyuru haheero bhuno tookubha. Koru hangʼu ntweche kubha eriibhagha rino Kirisito aghugharuka wiiki, ntoghotuubhaana nawe, gho kubha ntokomorighi kinya anyi.