2 Abhakorinto 12:20 - Eriiraghano Eriihë

²⁰ Ibheere neghotiina kubha, eriibhagha rino nekuucha bhowaanyu, nekobhabhöna moonyi na atëëmö ino etaaghunchömëri eni. Riyo ndeghughëri nikörë ghano ghataakobhachömëri inyu. Neghotiina kubha neghotora kobhabhöna moonyi ne eriireghe, no obhusööhu, no oghukarara, no obhunyawumu, no obhori bho bhaato, na kwibhora amangʼana, no obhwihachi na amahë.

2 Abhakorinto 12:20 ပူးပေါင်းရင်းမြစ်များ

Abharuumi 1:29

Mbiichwire amasari gha manga maaru, mbaghuköra amabhe haghare haghare, wiiki m‑bhiighombi bha bheghiro, na mbaanyi ne eriihari. Mbasiighiri eriihë, obhwiti no obhokobhooshani. Mbaghosiikëra obhuröngö na mbaanyi no omukörö mobhe. M‑bhari bha bhaato,

Abharuumi 1:30

na m‑bha amatoki, na mbahaarirëgha Eryobha. Bhataaghotereera amangʼana gha bhaghëndi bhaabho, wiiki n‑abhaato bha mitu miköngʼu na mbiihachi. Eriibhagha ryose mbaghutabhara anchëra ahë e ghuköra amabhe. Bhataaghosooka abhiibhori bhaabho,

Abharuumi 2:8

Amare ndekobhakararera na kobharööna abhaato bhano bhakwanga obhuhëënë na ghuköra amabhe, gho kurëngʼaana no obhusööhu bhoobho.

1 Abhakorinto 1:11

Bhahiiri bhaane, abhaato nyarebhe bha mo‑nyumba e Kiroowe mbambooriire kubha bhotaanyi‑ho obhoghwani ghate yaanyu.

1 Abhakorinto 14:33

Neekubha hangʼu, kinya enyi mo‑makanisa ghoose gha bhaato bha Ryobha, gho kubha Eryobha riito retaanyi re nyööri, amare n‑de murëmbë.

1 Abhakorinto 5:2

Ngwake inyu mokwihacha? Ngʼoni mongitumatiri na komoruusi omooto uno aghuköra ghayo ghate yaanyu!

2 Abhakorinto 1:23

Ghano neghosiikëra n‑gha mahëënë, koru Eryobha ndyeche! Ntigharokiri bhowaanyu iyo Korinto, gho kubha ntyëndiri kunyahaara emetema gheenyu.

2 Abhakorinto 10:2

ˆNekabhasasaama kubha, hano nekuucha iyo bhowaanyu, motanköra kubha muhaari. Neghosiikëra hangʼu, gho kubha nyeeche neghotora kubha muhaari kwo bhaato bhoose bhano bhaghwituuri kubha itu n‑gha mo‑se ino toghutabhara.

2 Abhakorinto 10:6

Hano mookubha momosookiri inkongʼorimu, itu ntookubha tumariri ghwisëëma ghutëma anchagho amangʼana ghoose ghano ghataanyi gha sooko.

2 Abhakorinto 12:21

Neghotiina kubha eriibhagha nekuucha bhowaanyu wiiki, Eryobha reene ndeghuköra nerighi chaasoni ambërë yaanyu. Neekubha na amacheeche korighi abhaato bhaaru ghate yaanyu bhano ꞉bhaaköriri amasari ekeenyuma, bhakeere ghotuukuuna. Bhakeere bhaanyi na atëëmö imbe e bhutaari, no obhoghonchu na amangʼana aghande gha chaasoni ghano ꞉bhaare nagho.

2 Abhakorinto 13:2

Hano niichiri bhowaanyu mara e kabhere, ꞉neebhabhooriire kubha, hano nekuucha bhowaanyu wiiki, nteekubha ne ebheghongi na abhaato bhano bhaköriri amasari. Ibheere nangabha neenyi kurë, ˆnekabhabhoorera riyo wiiki kubha, nteekubha ne bheghongi ghokoobho na kwo bhande bhoose.

2 Abhakorinto 2:1

Gho ghayo, ꞉neerooche mo‑motema waane kubha, netagharuka bhowaanyu, kubha netaghëri mubhe na amacheeche wiiki.

Abhagharatiya 5:15

Amare aribha mokoromana na kwiyire kinya chatyenyi, mwikabhaahe kubha motaacha ghwisireekereri.

Abhagharatiya 5:26

Totiihacha bhoowa, totanaahana koru korigherani eriihari.

Yakobho 4:11

Abhahiiri bhaane, motabha moratëmana amasörö, gho kubha, omooto woose uno aghutëma amasörö mughëndi waache, hamu komotenera ekiina, naakubha ataraahiri emeghiro ghe Ryobha. Aribha oraghitaraaha emeghiro, nekwërëki kubha toghesookiri emeghiro, amare nubheere omoteni o kiina o kobhiihera meghiro ghiyo.

1 Bheetero 2:1

Mbe, motighe obhobhe bhoose, no obhuröngö bho manga ghoose, na amangʼana amabhe ne eriihari, koru kobhiiherana.

2 Bheetero 2:18

Mbaghosiikëra amangʼana gha bhwihachi na ghano ghataanyi ne ekebhune, na gho ghutambana amiigha ghaabho amabhe gha mobhere mbahaatëgha abhaato bhano bhakumiri kwo riibhagha ighuhe, na ghutaana na abhaato bhano bhikareriire obhobhiihi.

Yuuta 1:16

Abhaato bhayo mbahiingʼunyerangʼunyera na kwirereeri, bharatambana amiigha ghaabho amabhe. Mbiihachi chwee, na mbahaasiikëra amangʼana gha ghuchömëri abhaato gho ghiri e kwibhönëra obhwëra.