2 Abhakorinto 10:1 - Eriiraghano Eriihë

¹ Mbe, abhande mbakobhugha kubha, eni Bhawuro m‑muhörëëru neenyi hano neekubha haghirohamu na niinyu, na kubha muhaari neenyi hano neekubha kurë na niinyu. Amare eni ˆnekabhasasaama kwo bhunyööhu na kwo bhuhörëëru bho Kirisito.

2 Abhakorinto 10:1 ပူးပေါင်းရင်းမြစ်များ

Mataayo 11:29

Mwibhöhërë achooki yaane, mweghe ghokoone mbagha hano nekobhasakeri kubha no omurëmbë mo‑metema gheenyu, gho kubha eni m‑muhörëëru wiiki m‑munyööhu neenyi mo‑körö.

Mataayo 21:5

“Obhabhoorere abhaato bha Sayuuni kubha, ‘Mööhi, Omutëmi waanyu nakuucha ghokoonyu, m‑muhörëëru, nakuucha ino atiiriri atikere, na atikere iyo n‑ekimööri.’”

Amaköri gha Bhatomu 8:32

Amandëkö ghano are arasöma, nigho ghano, “꞉Naakangaturu kinya angʼöndu ino eghuye ghosinchu. Aghakira kiri, kinya omoona o ngʼöndu ahaakira hano akubha aranungu amachööki.

Abharuumi 10:20

Wiiki, omurööti Isaaya ꞉naabhughiri kwo bhosubhesubhe amangʼana gha Ryobha kubha, “Abhaato bhano bhataaghuntabhara, nibho mbandooche. Na abhaato bhano bhataakobhoori angʼana yaane, nibho niyëërëkiini ghokoobho.”

Abharuumi 12:1

Ibheere abhahiiri bhaane, mweche kebhuno Eryobha reghotorigheri changori. Gho ghayo, ˆnekabhasasaama kubha, moruusi eriimanya reenyu kwo Waryobha. Mubhe kinya amaruusi ghano ghaanyi amahöru, na amatööbhiyu, ghano ghakoretegheri Eryobha. Ghuköra hangʼu, niyo anchëra e hëënë e korisëngëra.

Abharuumi 15:15

Koru hangʼu, nabhaandëkiire amangʼana aghande mo‑nyaarubha ino kwo bhosubhesubhe, kubha nebhahiiti amangʼana ghayo. Niköriri hangʼu, kurëngʼaana na aghareeya ino Eryobha reheere,

1 Abhakorinto 2:3

Eriibhagha riyo neere nenyuutiri, neere na ahaho, wiiki neere ndasingisa chwee.

1 Abhakorinto 4:10

Abhaato bhaaru mbaghotorighi kubha, itu m‑bharaghaanu toonyi, gho kubha ntokomuhökëri Kirisito, amare inyu mokwirighi kubha moonyi na amangʼiini gho kubha mokomutambana Kirisito. Itu ntokorighibhu kubha, m‑bhatöbhu toonyi, amare inyu mokwirighi kubha moonyi na changuru. Itu ntoghutaraahu, amare inyu mokwirighi kubha, m‑bha ghosooku moonyi.

1 Abhakorinto 4:21

Ibheere, mokwënda nikörë bhu? Kana, niiche bhowaanyu na ahimbo? Ghasi niiche mo‑bhosiighi na akörö e bhuhörëëru?

2 Abhakorinto 10:10

Neghosiikëra hangʼu, gho kubha abhande mbakobhugha, “Chanyaarubha che Bhawuro ncheenyi na amangʼana mahaari, wiiki ncheenyi na amangʼana amaköngʼu. Amare eriibhagha anyi haghirohamu na niitu abha ataanyi ni inguru, wiiki amangʼana ghaache ghano aghosiikëra ghabha ghataanyi na gheghiro.”

2 Abhakorinto 10:2

ˆNekabhasasaama kubha, hano nekuucha iyo bhowaanyu, motanköra kubha muhaari. Neghosiikëra hangʼu, gho kubha nyeeche neghotora kubha muhaari kwo bhaato bhoose bhano bhaghwituuri kubha itu n‑gha mo‑se ino toghutabhara.

2 Abhakorinto 10:7

Mumööhërëri amangʼana ghano ghaanyi ambërë e miisho ghaanyu. Omooto wowoose uno akwirighi kubha iwe n‑o Kirisito, amënyë kubha itu bhoose n‑abhaato bha Kirisito toonyi, kinya iwe.

2 Abhakorinto 11:21

Itu totabhaköriire amangʼana ghayo, gho kubha itu m‑bhahörëëru toonyi chwee. Kwo riyo totaakorighi chaasoni! Ibheere neghosiikëra kinya muraghaanu kubha, aribha anyi‑ho omooto uno akurëngʼaanera kwihacha ighoro e ghyokyose, na neeni nirëngʼaaniire kwihachera kiyo kiyo.

2 Abhakorinto 11:30

Aribha ekwëndëru kwihacha, nekwihacha ighoro e bhutöbhu bhoone.

2 Abhakorinto 12:5

Ibheere nekwihacha ighoro e mooto uyo, amare nteekwihacha kinya bhuno neenyi. Nekwihacha hangʼu ighoro e bhutöbhu bhoone.

2 Abhakorinto 3:12

Ibheere, gho kubha riyo niryo eriitëngʼërö riito, ntokuhöki totaanyi no obhotiini.

2 Abhakorinto 5:20

Ibheere, Kirisito natotomiri ghuköra emeremo gheeche, na gho kohetera ghokwito Eryobha ndekobhasasaama mubhe no obhoghwani naryo. Nikyo gheghughëri torahënërëra ighoro e Kirisito kubha, mubhe no obhoghwani ne Eryobha.

2 Abhakorinto 6:1

Ibheere, gho kubha ntokuhöki emeremo haghirohamu ne Eryobha, ntokobhasasaama kubha aghareeya e Ryobha ino mosongʼaaniri, motayetigha ebhore bhoowa.

2 Abhakorinto 7:4

Neenyi no obhosubhesubhe chwee hano neghosiikëra na niinyu, wiiki nekwihacha chwee gho ghiri yaanyu. Mungambisiini chwee na muköriri nibhe na ghuchömëru kwaru, nangabha tokunyaaka mo‑maaru.

Abhagharatiya 4:13

Mweche kubha hayo ekeenyuma, obhubhabharu bhuno neere nabho, nibho ꞉bhuughëriri nekabhöna omweya o kobharaghaneri Angʼana Anchömu.

Abhagharatiya 5:2

Mutëghëërërë kino eni Bhawuro nekobhabhoorera! Aribha moriishereri ghusaaru gho ghiri e ghughööta emeghiro, hayo Kirisito taakubha ne ekebhune ghyokyose ghokoonyu.

Abhaebheeso 3:1

Kurëngʼaana na amangʼana ghayo, eni Bhawuro nekobhasabhera. Eni nibhöhuru gho ghiri emeremo ghino Kirisito Yesu aheere nebharaghaneri inyu abhaato bha matöngö.

Abhaebheeso 4:1

Mbe, eni uno nibhöhuru gho ghiri e komuhökëri Omutëmi, nekobhasasaama mubhe na asughara ino ekurëngʼaana na amberekerera yaanyu ino Eryobha ꞉reebhabherekeriire.

Abhabhiribhi 4:5

Obhuhörëëru bhoonyu bhumënyu mo‑bhaato bhoose. Omutëmi Yesu haghuhe anyi kuucha.

Abhakorosaayi 1:23

Amare mokwëndëru kwëndërëra koyekumi Angʼana Anchömu, mubhe muköngʼiiri na kubha na changuru. Motiishereri ghotigha eriitëngʼërö rino ꞉moobhwine hano mooghwire Ngʼana Anchömu. Angʼana Anchömu iyo eni Bhawuro nibheere omutamishi waache, wiiki ꞉niiraghiinu mo‑bhaato bhoose bha hano mo‑se.

2 Abhatesaronike 3:17

Eni Bhawuro ˆnekabhaandëkëra amakëërani ghano gho kubhökö koone eni mwene. Kiyo nikyo ekingʼöchö mo‑chanyaarubha cheene choose, nibhu nehaandëka.

Bhiremooni 1:19

Eni Bhawuro, nyandëkiri gho kubhökö koone eni mwene, neghokoreha. Haghirohamu na ghayo nteekwënda ghokohiiti kubha, noonyi na asiire yaane, gho kubha eni nekuraghaniiri Angʼana Anchömu, iye oghatooribhu.

Bhiremooni 1:9

Amare, gho ghiri e bhosiighi nerooche m‑bhoheene konga neghusabhe, eni Bhawuro uno neenyi omugharuka, no omubhöhu gho ghiri e Kirisito Yesu.

1 Bheetero 2:11

Abhasiighani bhaane, inyu m‑bhaghëni moonyi na abhaheti mo‑se ino. Gho ghayo nekobhasasaama kubha, motiishereri amiigha ghaanyu amabhe, ghano ghaghokindana na niinyu, ghabhakinde.

Obhohunyurëru 1:9

Eni Yohana n‑omokumi omughëndi waanyu neenyi. Nighöötiine na niinyu ghoghumereri kunyaaka gho ghiri e Yesu Kirisito no obhutëmi bhooche. Neere nihööchëriiru mo‑gheghinga ke mo‑nyancha kino ghekobherekeru Bhaatimo. ꞉Niihööchëriiru iyo gho ghiri e kuraghani angʼana e Ryobha, na koruusi obhwibhateri ighoro e Yesu.