1 Abhatesaronike 3:8 - Eriiraghano Eriihë

⁸ Ibheere tokahëëchëra, gho kubha inyu mwimeeriire muköngʼiiri mo‑Mutëmi Yesu.

1 Abhatesaronike 3:8 ပူးပေါင်းရင်းမြစ်များ

Yohana 15:4

Mwikare moose yaane, na neeni neghwikara moose yaanyu. Kinya bhuno eghisaghe ghetaaghotora ghusönga amakorobhese ekyene chiri aribha ghetighöötëriire mo‑musabhiibhu, hangʼu hangʼu motaaghotora ghuköra amiigha gha Ryobha aribha motiikeere moose yaane.

Yohana 15:7

Aribha moghwikara moose yaane na amangʼana ghaane ghiikare moose yaanyu, mbe, musabhe Taata ghyokyose kino mokwënda, na niinyu mokuhaabhu.

Yohana 8:31

Mbe, Yesu akabhabhoorera Abhayahuuti bhaare bhamokumiri akabhugha, “Erabha moghutambana ameeghi ghaane, mahëënë inyu n‑abhaanabheegha bhaane moonyi.

Amaköri gha Bhatomu 11:23

Hano ahikiri iyo, akarighi kebhuno aghareeya e Ryobha ebhiitabhiiri abhaato bhayo. Aghachömëru chwee, akabhatoora omukörö bhaköngʼëri komosooka Omutëmi kwo metema gheebho ghyose.

1 Abhakorinto 15:58

Mbe, abhahiiri bhaane abhasiighani, muköngʼëri mo‑bhokumi bhuyo, motaku omukörö. Mwëndërërë ghuköra emeremo ghe Mutëmi gho ghwiköngʼi chaasiko choose, gho kubha mweche kubha emeremo ghino moghuköra gho ghiri e Mutëmi, ghetaanyi ghe bhoowa.

1 Abhakorinto 16:13

Mutëngë, muköngʼëri mo‑bhokumi, wiiki mubhe abhasubhesubhe na mubhe na changuru.

Abhagharatiya 5:1

Kirisito natotooriri koru mo‑bhusësë kubha tubhe huuru inkongʼorimu. Gho ghayo, mwimeerere muköngʼiiri, motiishereri ghugharuka wiiki mo‑bhusësë bho meghiro.

Abhaebheeso 3:17

kubha gho nchëra e bhokumi, Kirisito abhe ariikara mo‑metema gheenyu. Hayo niho obhosiighi bhooche, bhookubha bhorabhaha changuru che kwimeerera muköngʼiiri kinya omote uno osimiri emerya haase chwee, hamu kinya anyumba ino yabhëkuru ighoro e bhoroso bhuchömu.

Abhabhiribhi 1:21

Ghokoone eni obhuhöru n‑gho Kirisito. Wiiki neraku, ghoku koone n‑obhwëra.

Abhabhiribhi 1:27

Angʼana e hëënë n‑kubha, atëëmö yaanyu irëngʼaane na Angʼana Anchömu e Kirisito. Hano nekuucha kobharighi hamu nenganga kuucha, nibhe nerooghu kubha mokwëndërëra kwimeerera muköngʼiiri na kubha no obhumu, wiiki haghirohamu moonyi gho kunyaakera obhuhëënë bho Angʼana Anchömu bhuno toghokumi.

Abhabhiribhi 4:1

Gho ghayo, abhahiiri bhaane, muköngʼëri kimu kimu gho komwitëngʼëra Omutëmi. Nebhasiighiri na neenyi na amiigha gha korighani na niinyu, bhahiiri bhaane. Inyu niinyu moghughëri nichömëru, wiiki inyu na atuho yaane ino nihaabhuru mo‑meremo ghino ꞉niiköriri.

Abhakorosaayi 1:23

Amare mokwëndëru kwëndërëra koyekumi Angʼana Anchömu, mubhe muköngʼiiri na kubha na changuru. Motiishereri ghotigha eriitëngʼërö rino ꞉moobhwine hano mooghwire Ngʼana Anchömu. Angʼana Anchömu iyo eni Bhawuro nibheere omutamishi waache, wiiki ꞉niiraghiinu mo‑bhaato bhoose bha hano mo‑se.

1 Abhatesaronike 3:7

Bhahiiri bhiito, amangʼana gha bhokumi bhoonyu, ngatoheere omukörö mo‑nyaako yiito yoose.

Abheebhuraaniya 10:23

Twiköngʼi chwee ghoghaghööta ghano toghoghakumi na ghoghitëngʼëra totighe kohombahoomba, gho kubha Eryobha n‑ihëënë mo‑ghano riraghiri.

Abheebhuraaniya 3:14

Gho ghayo ntoghughöötana na Kirisito, erabha tokwëndërëra komwitëngʼëra mbagha antenero e bhuhöru bhwito, kinya bhuno ꞉tuusëëmiri ghokumi.

Abheebhuraaniya 4:14

Mbe, ntoonyi nawe Omuchaama Omokoro, Yesu, Omoona o Ryobha uno aghiire na ghusöha Mwishaaro. Gho ghiri iyo, ntughöötërërë ghano toghokumi.

1 Bheetero 5:10

Eryobha rino reenyi na aghareeya yoose, ndebhabherekiire ghusanga obhokumi bhooche obhokoro bho miishe ghyose, gho ghughöötana na Kirisito. Amare moramara kunyaaka kwo riibhagha ighuhe, iryo eryene ndekobhaköngʼi, ndekobhaha changuru, na kobhaköngʼëërëri.

2 Bheetero 3:17

Mbe, inyu abhasiighani bhaane, mumariri kumënya amangʼana gha bheeghi bhayo abharöngö. Ibheere mwikabhaahe kubha motangʼiinu na amasari gha bhaato bhayo abhiigharori, na bhabharumeeri na ghotigha omurëmbë o bhokumi bhoonyu.

Obhohunyurëru 3:11

Nekuucha ibheerebheere! Moghaghöötërërë bhoheene amachömu ghayo moonyi nagho, kubha omooto ataacha kobhahöka atuho yaanyu.

Obhohunyurëru 3:3

Mohiite ghano mweghuru na ghano mooghwire, moghatambane bhoheene ghayo na motuukuune. Moraanga ghutënga, nekuucha kinya bhuure omwibhi ahaacha, koru motaakumënya eriibhagha rino nekuucha.