1 Abhakorinto 6:18 - Eriiraghano Eriihë

¹⁸ Gho ghayo, mwisache obhutaari. Amasari aghande ghoose ghano omooto aghuköra ngaanyi anche e mobhere waache, amare omooto uno aghuköra obhutaari, uyo naghuköra amasari ighoro e mobhere waache omwene.

1 Abhakorinto 6:18 ပူးပေါင်းရင်းမြစ်များ

Abharuumi 1:24

Gho ghiri iyo, Eryobha ndebhatighiri bhabhe bharatambana amiigha ghaabho amabhe, bharakörërana amangʼana gha chaasoni mo‑mebhere gheebho.

1 Abhakorinto 6:9

Moteeche kubha abhaato abhabhe bhataakobhughabha obhutëmi bho Ryobha? Motingʼiina! Abhataari, abhaato bhano bhaghusëngëra chasanaamu, koru abhasubhe bhano bhakomisi na abhasubhe bhaghëndi bhaabho,

2 Abhakorinto 12:21

Neghotiina kubha eriibhagha nekuucha bhowaanyu wiiki, Eryobha reene ndeghuköra nerighi chaasoni ambërë yaanyu. Neekubha na amacheeche korighi abhaato bhaaru ghate yaanyu bhano ꞉bhaaköriri amasari ekeenyuma, bhakeere ghotuukuuna. Bhakeere bhaanyi na atëëmö imbe e bhutaari, no obhoghonchu na amangʼana aghande gha chaasoni ghano ꞉bhaare nagho.

Abhagharatiya 5:19

Mbe, amangʼana ghano ghaghuköru na amiigha amabhe ghano ghaanyi haheero, nigho ghano, obhutaari, no obhoghonchu, na ghuköra amangʼana gha chaasoni,

Abhaebheeso 5:3

Ibheere inyu motaköra obhutaari, koru obhoghonchu bhobhoose bhuure hamu obhwighombi bho bheghiro, gho kubha amangʼana ghanga ghayo ghataakwëndëru mo‑bhaato abhatööbhiyu.

Abhakorosaayi 3:5

Mbe, mute kurë amangʼana gha mo‑se ino ghano ghaanyi moose yaanyu, kinya obhutaari, no obhoghonchu, no omuraka, na amiihëëbhö amabhe, no oghwighomba ebheghiro. Obhwighombi bhonga hangʼu, n‑kinya ghusëngëra asanaamu taanyi Eryobha.

1 Abhatesaronike 4:3

Eryobha ndekwënda mubhe abhatööbhiyu, motighe ghuköra obhutaari.

1 Abhatesaronike 4:5

Motabha na ghwighomba kobhe kinya abhaato bhano bhataryeche Eryobha.

2 Timotewo 2:22

Ungʼösë amiigha gha bhobhureni, wiköngʼi ghutambana ghano Eryobha rekwënda, ubhe no obhokumi, no obhosiighi no omurëmbë. Ughöötërërë ghayo, haghirohamu na bhoose bhano bhakomusabha Omutëmi kwo mukörö mwero.

Abheebhuraaniya 13:4

Obhokwiri mbokwëndëru ghosooku na abhaato bhoose, wiiki omosubhe no omukari bhiikabhaahane no obhutaari gho kubha Eryobha ndekobhatenera ekiina abhaato bhoose bhano bhaghuköra obhutaari.

1 Bheetero 2:11

Abhasiighani bhaane, inyu m‑bhaghëni moonyi na abhaheti mo‑se ino. Gho ghayo nekobhasasaama kubha, motiishereri amiigha ghaanyu amabhe, ghano ghaghokindana na niinyu, ghabhakinde.