၂ ကောရိန္သု 12:6 - ဓမ္မသစ်ကျမ်း ဓနုဘာသာစကား

⁶ ငါဟ ဝါကြွားရန် အလိုဆိရင်လည်း အမန်ဟိုသာ ပြောမယ်ဖြစ်ယွေ့ မိုက်မဲသောသူဖြစ်မယ် မဟုတ်၊ အားပေမဲ့ စသူမျှ ငါ့ဟို မျော်ရတာထက် အဲဟာမဟုတ်ရင် ငါ့အကျောန်းဟို ကြားရတာထက် ပိုယွေ့ ငါ့ဟို မထင်မြင်မိစေရန် ငါမဝါကြွားဘဲ နေမယ်။

၂ ကောရိန္သု 12:6 ပူးပေါင်းရင်းမြစ်များ

ရောမ 9:1

ခရစ်တော်နှိုက် အမန်တရားဟို ငါ ပြောအယ်။ ငါ ဝါဝူး။ ငါတတ်တိုင်း သိသောစိတ်ဟ သန့်ဆှင်းသော ဝိညာဉ်တော်အားဖြင့် အတည်ပြုအယ်။

၁ ကောရိန္သု 3:5

အာပေါလုဟ စသူလုန်း။ ပေါလုဟ စသူလုန်း။ ငါလို့ဟ ဘုရားသခင်ရဲ့ အစေခံများ ဖြစ်ယွေ့ နင်လို့ ယုံကြည်လာစေရန် ပြုစုပေးကြသူများ ဖြစ်အယ်။ ငါလို့တဦးစီဟို သခင်ဘုရား ခွဲဝေ သတ်မှတ်ပေးသော တာဝန်အသီးသီးဟို ထမ်းဆောင်ကြရအယ်။

၂ ကောရိန္သု 1:18

ဘုရားသခင်ဟ သစ္စာနဲ့ ပြေ့စုံတာနဲ့အညီ နင်လို့အား ငါလို့ပြောသော စကားဟ တချိန်တည်းတွင် “ဟုတ်အယ်” နဲ့ “မဟုတ်ဝူး” ဟု ဖြစ်အယ်မဟုတ်။

၂ ကောရိန္သု 11:16

တဖန် ငါဆိုတာဟ ငါ့ဟို သူရူးဖြစ်အယ်ဟု စသူမျှ မထင်မှတ်စေနဲ့။ အားပေမဲ့ နင်လို့ဟ အဲသို့ ထင်မှတ်ခဲ့ရင် ငါနှိုက် ဝါကြွားစရာအခွင့် ကတစ်မျှဆိစေရန် ငါ့ဟို သူရူးအဖြစ်ပင် လက်ခံကြလော့။

၂ ကောရိန္သု 11:31

ငါဟ ဝါမပြောကျောန်းဟို သခင် ယေရှုရဲ့ ခမည်းတော်ဖြစ်သော ထာဝရ မင်္ဂလာဆိလဲ့ ဘုရားသခင် သိအယ်။

၂ ကောရိန္သု 12:11

ငါဟ သူရူးလို ပြုလေပီ အားပေမဲ့ နင်လို့ဟ ငါ့ဟို သူရူးဖြစ်အောန် ပြုကြအယ်။ နင်လို့ဟ ငါ့ဟို ထောက်ပံ့ပေးသင့်သူများ ဖြစ်အယ်။ ငါဟ မရေရာသောသူ ဖြစ်စေကာမူ နင်လို့ရဲ့ ထူးမြတ်လဲ့ တမန်တော်များထက် ပစာလိုနဲ့မျှ မညံ့။

၂ ကောရိန္သု 12:7

ငါမျော်ရသော အံ့ဖွယ်သော ရူပါရုံများကျောန့် ငါ့ကိုယ်ဟို အထင်မကြီးစေရန် ငါဟ မိမိကိုယ်ခန္ဓာတွင် နာကျင်သော ဝေဒနာဟို ခံစားနေရအယ်။ အဲအရာဟ စာတန်ရဲ့ တမန်လို ငါ့ဟို ဒဏ်ခတ်ယွေ့ ငါ့ရဲ့ မာန်မာနဟို ချိုးနှိမ်အယ်။

၂ ကောရိန္သု 5:13

ငါလို့ဟ ရူးသွပ်လေပီလော၊ ရူးသွပ်ရင် ဘုရားသခင်အဖို့ ဖြစ်အယ်။ အဲဟာမဟုတ်ရင် မရူးသွပ်ရင် နင်လို့အဖို့ ဖြစ်အယ်။

၂ ကောရိန္သု 7:14

ငါဟ နင်လို့အကျောန်းဟို သူ့အား ဝါကြွားခဲ့သော်လည်း နင်လို့ဟ ငါ့ဟို စိတ်ပျက်စေခြင်း မဆိခဲ့။ ငါလို့ဟ နင်လို့အား မန်ကန်သောအရာဟို အစဉ်အမြဲ ပြောခဲ့လဲ့နည်းတူ တိတုဟို ငါလို့ ဝါကြွားသောအရာဟလည်း ဟုတ်မန်ကျောန်း ထင်ဆှားခဲ့ပီ။