40 Ɓaá, eceg m̀wɛɛ́n ǹdíí a ŋga kɛ́ li sɔ́, ag kɛ láá lí ɓɔŋ lí ɓáŋ ɓaɛŋ é?»
Ɛnɛ́ éceg ɛ́ mpumu yá kɔlan, ɔ óm ɓáɓɔŋle ɓɛ́ɛ́ á yóg ɓaɛŋ nɛ́ bí sɔ́la nyɛ́ ɛ́jɛ̄ɛ̄ jóga.
Bú byeé nyɛ, bú pámɛ́ nyɛ á ǹdíí, bú ól nyɛ.
Ɓakanʼyɛ ɓatíi-nsúlé la ɓacɛ́ŋ bí lílōmɛ bú pélē nyɛ̄ nɛ́: «Ag kɛ li ól lí bíŋ bíɓēɓéyɛ bí ɓáɛŋ ɛ́h ɓɛ́ ɓé ŋgɔ́ɔ́, la nyɛ́ á tí ɓaɛŋ ɓatám nsɔ́n á ǹdíí wɛ́ɛ́, ɓá bí ɓɛ́ bíg tíi nyɛ́ ɛ́jɛ̄ɛ̄ jóga kí éceg yá kɔlan.»
Ɓaá yéé m̀wɛɛ́n ǹdíí a ŋga kɛ́ li ɓɔŋ é? Ag kɛ li sɔ́, a ól ɓáŋ ɓaɛŋ, a tí ǹdíí wɛ́ɛ́ ɓáɛŋ ɓatám.
Ɓaá, mut a ŋga yáŋa Mɔɔ́n Ɔlolómɛ̄ a ŋgá kɛ́ ɓé li kuh lí ékɔ́ghɛ ɛ́ ŋga lóo yéŋ é? Kasig nyɔ́ŋ mut a ŋgá ditɛ ɓé mícii mí ésaa-líat mí má so míɓē mɛ́ɛ́. Ag óŋo M̀búl Mpúán nyɔ́ a yíhɛ́ ɓɛ́hɛ nɛ́ Ɔlolómɛ̄ a byɛ́ɛ́ elɔ́ŋgɔ m̀mím.