Elōg-Fílípi 1:20 - Esaa-líat ɛ́ péná

²⁰ Ákaa ɛ́sɛ, li oŋle la yé ɛ́sɛ mi ŋga láaŋke la ehép, li oŋle la lipitá mi byɛɛ́, mi ŋgá kɛ ɓé ma lí wú lí mbɔɔla. Ndí, lipitá jáma lí ŋgí yáhɛ jɔ́ lísɛ, ányúū nɛ, ɛ́ ɓɛ́ lɛn, ɛ́ ɓɛ́ eceg ɛ́sɛ, lipém lí Nyɔ́-a-Pɔ́hlɛ líg kɛ li ɛ́nyéne á nyúū yáma, li loole la éniŋ yáma tɔ la nyɛ̄mb yama.

Elōg-Fílípi 1:20 ပူးပေါင်းရင်းမြစ်များ

Yohánɛs 21:19

Yésus a pɔ́tɔ́ɔ́ náŋ á lí yɛ́ɛ́lene lí Pétlos yɔɔ́yɔ́ɔ patí nyɛmb a ŋga kɛ́ li wú, nyí ɛ ŋga tíi Ɔ́lolómɛ̄ lipém. Ámbúh náŋ aá la nyɛ́ nɛ́: «ōŋ ma.»

Misɔ́n mí Ɓáōmɓɛ 20:24

Ndí ányúū yáma, eniŋ yáma ɛ́h byɛ́ɛ́ ɓé nsɛ́ŋ tɔ wá. Miɔ́ŋɔ máma mí lɛ́ nɛ́ mi pám la ŋgómán wama la nsɔ́n wama á lísūg, bí Ɛtáŋɛ Yésus a byéehɛ́ ma, nyúŋ ŋgómán la nyúŋ nsɔ́n nɛ bí lɛ́ li tíi lí mbóŋ nyí Pɔ́l M̀ɓɛɛŋ nyí ediŋ Ɔ́lolómɛ̄.

Misɔ́n mí Ɓáōmɓɛ 21:13

Ndí, nyɛ́ ɔ pélē ɓɛ́hɛ nɛ́: «Ányúū yéé miní ŋga ɓɔ́tɛ ma m̀mím la liwú jáná é? Má, mag yéɓe nɛ́ mi kágɓɛ́ɛ, mi wúēlé ki á Yélūsalɛm á joó lí Nyɔ́ŋ-Ɛsáŋɛ́ Yésus.»

Misɔ́n mí Ɓáōmɓɛ 4:31

Ɛnɛ́ ɓá manɛ́ míkánɛ, ndáá nyí bí ɓɛ́ɛ́ bí kɔtánɛ yu póghan. Ɓɔ́ bísɛ bú yál la M̀búl Mpúán, bú ɓōtlé lí lɛgɛ lí Eɓaŋgá Ɔ́lolómɛ̄ ɛ́h ɓɛ́ ɓé woŋ tɔ wá.

Elōg-Lóma 12:1

Á élōgyāŋ, kasig Ɔlolómɛ̄ a ŋga kɔnle ɓɛ́hɛ ŋgɔ́ɔ́, mag sɔ́hye hɔ́ ɓɛ́nɛ nɛ́: miní tí nyɛ́ ɓɛ́nɛ-mɛ̄n kaa byoóm bí nsúlé. Li ɓotle vɔ́ŋɔ́ɔ miníg ógle nyɛ́, miníg ɓɛ́ jā ɛ́ɓɛ̄ɛ̄ la li ɓɔŋ lí yé ɛ́ ŋga nyɛ́ɛle nyɛ́. Nyíŋ patí li ɓégɛ lí nyɛ nɛ ɛ kɔɔ́.

Elōg-Lóma 5:5

la ki nɛ́ lipitá lí ŋgá yɛ́ɛ ɓé, átɔm nɛ́ M̀búl Mpúán nyɔ́ a tíéɓɛ́ ɓɛ́hɛ, a yáhɛ́ mímīm máhá la ediŋ Ɔ́lolómɛ̄.

Elōg-Lóma 6:13

Miníh byelénégé ɓé pɛ bijo byáná bí nyúū á lí ɓɔŋ lí áɓē, miníh yaanɛ́gɛ́ ɓé byɔ kaa biɓɔŋlé bí mísɔ̄n míh tɛ́ɛ́ ɓé. Ndí, kaa ɓot ɓá ɓógyéné á nyɛmb li timan á éniŋ, la bijo byáná bí nyúū, bí bí lɛ́ biɓɔŋlé bí mísɔ̄n mí tɛ́ɛ́ sim, miní níŋgí á nsɔ́n á Ɔ́lolómɛ̄.

Elōg-Lóma 6:19

Mag nyɔŋle ŋget á mam mí ŋga lóo á póla ɓot-bí-bínam, á li ɓɔŋ nɛ́ miní sɔ́ŋtánɛ m̀ɓɛɛŋ. Nlemlem kaa miní yaanɛ́ɛ bijo byáná bí nyúū míyɔ̄ŋ mí mísɔ̄n mí nyɛ́gā la mí mí mpuŋgú, misɔ́n mí mí ŋgí óm ɓɛ́nɛ á lí ndɔ́gɓéne lí Ɔ́lolómɛ̄. Nyí vɔ́ŋɔ́ɔ, miní yáanɛ́ byɔ́ míyɔ̄ŋ mí mísɔ̄n mí étɛ̄l-sim yé ɛ́ ŋga yáanɛ ɓɛ́nɛ ɓápūán.

Elōg-Lóma 8:19

Átɔm nɛ́, biveglé bísɛ bí lɛ́ lí laaŋke átē a evéhé nɛ́ Ɔlolómɛ̄ a yíhɛ́ ɓanzáá bí lɛ́ ɓɔ́ɔ̄n ɓɛ́ɛ́.

Elōg-Lóma 9:33

ákaa yá ciiɓɛ́ nɛ́: «Léɓyán, mag tɛ́ɛ́yɛ ŋgɔg ɔɓag á tísɔn nyí Síon, liáá lí ŋgɔg lí ŋga ɓɛ́h ɓot. Ndí nyɔ́ la nyɔ́ a ŋga ɛ́gɓéne jɔ́, m̀ɓá a ŋgá kɛ ɓé lí tám.»

Elōg-Kɔlínto 1 15:31

Á élōgyāŋ, ɛ lɛ́ mbálɛ nɛ́ nyɛmb ɛ tɛ́ɛ́ ma ɔ́sū ɔlɔ́ sig, ányúū nɛ miní lɛ́ ewáhlé-ŋgáŋ yáma á ŋ̀atanɛ́ la Yésus Kilístus Ɛtáŋɛ wahá.

Elōg-Kɔlínto 1 6:20

Mut wa a lɛ nyɔ́ a sálá díyɛ ŋgandag á lí kɔpɔ lí ɓɛ́nɛ. Ɓéghánɛ hɔ́ Ɔ́lolómɛ̄ la nyuú yāná!

Elōg-Kɔlínto 1 7:34

la náŋ, m̀mím wɛ́ɛ́ wá kaaɓan. Nlemlem ki, mindígá nyɔ́ āh byɛ́ɛ́ ɓé nlóm la ŋgɔn mindígá, bíg nyɔŋ eceg la mam mí Nyɔ́ŋ-Ɛsáŋɛ́. Bíg somo li ɓɛ́ elɔŋ la nyɛ́ nɛ́ ɓam ɓam. Ndí mindígá a lɔ́mɓɛ́ɛ ag nyɔŋ eceg la mam mí ŋkɔŋ-á-sí, ag somo nɛ̄-láá a nyɛ́ɛ́lé nlóm wɛ́ɛ̄.

Elōg-Kɔlínto 2 10:8

Tɔ ɓɔ̄ŋ nɛ́ mag loohan lí ɓɔŋ lí éyāt ányúū ŋguu nyí Nyɔ́ŋ-Ɛsáŋɛ́ a tí ɓɛ́hɛ, náŋ ag ɓɛ́ ányúū lí ólɓɛ lí ɓɛ́nɛ á ŋyéɓé, ndí ah ányúū li cɛ́hɛ lí ɓɛ́nɛ ɓé, náŋ a ŋgá kɔnɛ ɓé mā mbɔɔla.

Elōg-Kɔlínto 2 3:12

Kasig bi byɛɛ́ nyíŋ nyaa lipitá, ányúū náŋ nɛ́ bi ŋgá kɔn ɓé woŋ tɔ wá.

Elōg-Kɔlínto 2 4:10

Bi ɓáág bi ɓɛ́gɛ nyɛmb nyí Yésus á nyúū yāhá, á lí ɓɔŋ nɛ́ eniŋ yɛ́ɛ́ yɔ́g ɛ́ ɛ́nyéné ɓɛ́hɛ á nyúū.

Elōg-Kɔlínto 2 5:15

La ki nɛ́, Nyɔ́-a-Pɔ́hlɛ a wú ányúū ɓot bísɛ, á lí ɓɔŋ nɛ́ ɓá bí lɛ́ á éniŋ, bíh niŋíg ɓé pɛ ányúū yāɓá ɓɔ́-mɛ̄n, ndí bí nīŋ ja ányúū nyɛ́ mut a wú, la nyɛ́ ɔ pāhyé ányúū yāɓá.

Elōg-Kɔlínto 2 7:14

Á mbálɛ, kíyáɓɛ́nɛ mi ɓáág ma yátɓéne nyɛ́ ányúū yāná, ɛnɛ ányúū nɛ manáh kɔnɛ ɓé mā ɔ́sɔ̄n ndí, ákaa ɓaá mwuan biíg laga ɓɛ́nɛ mbálɛ, eyát bi byɛ́ɛ̄ ányúū yāná ɔ́sū ví Títo ɛ́ byɛ́ɛ́ etɔ.

Elōg-Kɔlínto 2 7:4

Mi byɛ́ɛ́ lipitá lícɛ̄ŋ la ɓɛ́nɛ, eyát mi byɛɛ́ ányúū yāná ɛ́ lɛ́ écɛ̄ŋ, mi yáhɛ la akwáá, tɔ la ndutu yáhá ɛ́sɛ, mag sophɛ la mivag.

Elōg-Fílípi 1:14

Jɔ́ nɛ́, ɛnɛ́ jogo lícɛ̄ŋ lí ɓáyēɓe lá ɛ́n ma á m̀ɓog, lú kóndyé lí tiŋɓé la Nyɔ́ŋ-Ɛsáŋɛ́, la li ɓɛ́la lí míkūndá á lí camanɛ lí Éɓaŋgá Ɔ́lolómɛ̄ ɛ́h ɓɛ́ ɓé woŋ tɔ wá.

Elōg-Fílípi 2:17

Ndí, tɔ yá pám ja nɛ́ micii máma má nyɛ́ɛ lí kómɓɛ ákaa likaale lí ŋga ɓátle á nsúlé nyú á lɛ́ nsɔ́n miní ŋga sál ányúū ŋyéɓé wáná, náŋ ag kɔnɛ jā ma mívag, mi sōphɛ́ ki elɔŋ la ɓɛ́nɛ bísɛ.

Elōg-Kólóso 1:24

Nyí vɔ́ŋɔ́ɔ, mag kɔn mivag la bisɔghe mi ŋga kūh ányúū yāná. Bisɔghe bí yégléé nɛ́ Yésus Kilístus a kūh, má mag kūh byɔ ányúū Eɓasɛ yé ɛ́ lɛ́ nyúū nyí Kilístus.

Elōg-Tésaloníka 1 5:23

Ɔlolómɛ̄ nyɔ́ a ŋga tíi nsaŋ nyɛ́-mɛ̄n a púɛ́ ɓɛ́nɛ nɛ́ ɓam, a tát m̀búl wáná, liɓɛ́ɛg jáná la nyúū yāná nɛ́ ndí miní ɓɛ́ ŋgíla ɔnɛ́g á misɔ́ mí Ɛtáŋɛ wahá Yésus Kilístus.

Pétlos 1 4:16

Ndí, kíyáɓɛ́nɛ mut ag sɔghe ányúū nɛ a yéɓe la Nyɔ́-a-Pɔ́hlɛ, āh nyɛɛ ɓé li kɔn lí ɔ́sɔ̄n, ndí a ɓégɛ́ jā Ɔlolómɛ̄ nɛ a ɓɛ́gɛ joó lí kilístɛn.

Yohánɛs 1 2:28

La náŋ, á ɓɔ́ɔ̄n ɓáma, miní ɓɛ́ la nyɛ́ á lí ɓɔŋ nɛ́ eceg a ŋga kɛ́ li sɔ́, ɓɛ́hɛ bísɛ bi ɓɛ́ ŋgíla woŋ, la ki nɛ́ bi táág kɔ̄n ɔ́sɔ̄n á misɔ́ mɛ́ɛ́, kí ɔ nɛ́ŋɓɛ́ ɓɛ́hɛ la nyɛ́.