Yohane 14:28 - Sura Malelaha

²⁸ Nihadimi lolitaNgku inona au manguli: ‘Ina paduNa, hai ina mesule huleNa irikamu.’ Ane nipokaahi mpuuNa, hangangaa nipokatana wori kalaoNgku i UmaNgku, lawi UmaNgku meliu kamahilena tuwoNa pane Iko.

Yohane 14:28 ပူးပေါင်းရင်းမြစ်များ

Matiu 12:18

“Idemi hawiNgku au Kupilei, au Kupokakaia, hai au mopamatana laluNgku. Ina Kuwei InaoNgku Iria. Ia ina mopahawe parentaKu au manoto i ope-ope tauna.

Yohane 10:38

Agaiana ane mobabehiNa bago au hangko i UmaNgku, hangangaa nipoinalaiNa. Kehapiri baraNa nipoinalai, bagoNgku hangangaa nipoinalai. Ane nipoinalaimi pobagoNgku, ina niisa mpuu i lalumi: mohintuwuNa hai UmaNgku, hai UmaNgku mohintuwu hai Iko.”

Yohane 13:16

Tou mpuu lolitaNgku ide: hadua hawi bara meliu karabilana hangko i ampuna. Hadua tudua bara meliu karabilana hangko i tauna au metudu.

Yohane 14:12

Tou mpuu lolitaNgku ide: tauna au mepoinalai Iriko, peisahe mobabehi nodo au Kubabehi, ba melumburi hangko i apa au Kubabehi, lawi ina laomoNa i UmaNgku.

Yohane 14:18

Barakau ina Kupalehi nodo ana toilu. Ina mai huleNa irikamu.

Yohane 16:7

Agaiana katouana, ina molambikau roa ane paduNa! Lawi ane baraNa padu, bara ina hawe Topetulungi. Agaiana ane paduNa, ina Kutudu Topetulungi iti mai irikamu.

Yohane 20:17

Nauli Yesu i Maria, “IneeNa nukingki, lawi bara maniNa mengkaore lao i UmaNgku. Laomoko i halaluNgkuhe, nuuliangaahe ina laomona i UmaNgku hai Umamu wori, Pue AlaNgku hai Pue Ala au nipenombai.”

Yohane 20:21

Nauli mbuli Yesu, “Katinda lalu hawe irikamu. Nodo UmaNgku motuduNa, nodo wori Iko motudukau.”

Yohane 5:18

Hangko inditi, tadulakonda to Yahudi mohaoki liliuhe rara mopapate Yesu. Mobabehihe nodo i Yesu, bara pea anti poliungiNa ada i Alo Pengkarooangaa, agaiana lawi Nauli wori Pue Ala iami UmaNa; lempona, Ia mopahimbela wataNa hai Pue Ala.

Yohane 7:33

I tempo iti, Yesu tangana mololita i tauna bosa, Nauli, “BarapoNa mahae hihimbela hai ikamu, ina mesuleNa lao Iria au motuduNa.

1 Korintu 11:3

Agaiana ara hampaka au hangangaa kupopaingaakau, Kerisitu mewali tadulakonda ope-ope tobalilo. Hai tobalilo mewali tadulakonda towawine. Hai Pue Ala mewali tadulakona Kerisitu.

1 Peturu 1:8

Nauri bara manikau moita Yesu Kerisitu, agaiana, nipokakaiami. Hai ide-ide, bara mani wori niita, agaiana nipoinalaimi. Ido hai matana lalumi, hai kamatanami iti mahile, melumbu hangko i apa au peisa rapololita.

Pampetudungia 1:11

nauli, “Apa au nuita, nuuki i sura hai nupakatuahe jumaa au pitu ide: Epesu, Smirna, Pergamus, Tiatira, Sardis, Filadelfia hai Laodikia.”