Yakobu 2:18 - Sura Malelaha

¹⁸ Manoto ara au ina manguli node, “Hadua tauna meharunga i pepoinalaina, hai tohaduana meharunga i babehiana au maroa.” Agaiana kuuli: ane bara maroa babehiamu, bara ina raita pepoinalaimu iti. Hangko i babehiangku au maroa, ina kupopaitaa woriko pepoinalaingku i Pue.

Yakobu 2:18 ပူးပေါင်းရင်းမြစ်များ

Roma 14:23

Agaiana ane ara hadua tauna au bata-bata laluna moande bau ba paande ntanina, hai kahopoana naande pea, lempona madosa, lawi au nababehi iti bara moula apa au napoinalai i laluna. Mewali, ane tababehi apa au bara moula pepoinalainta i Pue, babehianta iti tapodosa.

Roma 3:28

Lawi idemi patoana lolitangku: ikita mewali manoto i peitana Pue Ala anti pepoinalainta, bara hangko i babehianta au maroa moula Aturana Musa.

Roma 4:6

Paturo ide himbela hai lolitana Datu Daudi hangkoia. Lawi Daudi mampololita kana i kamorasinda tauna au nadoko Pue Ala, hai au Naimba manoto i peitaNa, agaiana bara anti kamaroana babehianda.

Roma 8:1

Mewali, ide-ide barapi ara pehuku irikita au mohintuwumoke hai Kerisitu Yesu.

Roma 9:19

Mewali, ina ara tauna au manguli, “Ane nodo, moapari hai Pue Ala mosalai babehianta au kadake, lawi babehianta iti moulato popakanotoNa haduduaNa?”

1 Korintu 13:2

Ane rapana, molambina kapande mopahawe lolita hangko i Pue Ala hai molambina ope-ope kapande hangko i Pue Ala au bara raisa rangangku, hai ane maroho pepoinalaingku pane kubuku mopalimba bulu, agaiana bara maahi lalungku, bara mpuu ara bunduna katuwongku.

2 Korintu 5:17

Mewali, hema au mohintuwu hai Kerisitu, ia mewalimi manusia au wou. Katuwona au hangkoia liumi; ia molambimi katuwo au wou.

2 Korintu 7:1

Halalu-halalu au kupokaahi, anti kanaweinta Pue Ala dandiNa iti, ido hai hangangaa takabaha hinangkana au moantike i babehia au kadake, maroa au i watanta ba i lalunta. Hangangaa mampeulai mpuuke peundeana Pue Ala, hai hangangaa langake mobabehi apa pea au bara moula peundeaNa.

Galatia 5:6

Ane mohintuwuke hai Kerisitu Yesu, bara ara bunduna ratileke ba barake ratile; batena pea mepoinalaike i Yesu. Hai ane maahike i ranganta, pepoinalainta iti ina tongawa.

1 Timotiu 1:5

Tunggaiana paturongku ide bona ikita ope-ope mombepokaahike. Hangangaa mombepokaahike hangko i lalunta au malelaha, hangko i kabulana lalunta hai hangko i kamarohona pepoinalainta i Pue Ala.

Titu 2:7

Hai oio, Titu, ope-ope babehiamu hangangaa mewali pandiri. Ane mepaturoko, mepaturoko hangko i lalumu mpuu, hai hangangaa manoto babehiamu.

Ibarani 11:31

Anti pepoinalaina, Rahab bara rapapate nodo tauna au hambomboeana au barahe mengkoru i Pue Ala. Rahab iti, hadua towawine au bara maroa babehiana. Agaiana i temponda bahangkia surodado to Isaraeli lao mampendenga boea Yeriko, nadokohe i souna, hai natulungihe.

Ibarani 11:33

Anti pepoinalainda: mampopengkoruhe datu, moparentahe i kanoto-notoana, molambihe apa au nadandi Pue Ala, mokamumuhe nganga singa,

Ibarani 11:6

Mewali taisa mpuu: bara ara tauna au napokatana Pue Ala ane bara mepoinalai Iria. Lawi tauna au mohungkuki Pue Ala hangangaa raisa i lalunda: Pue Ala tou-tou mpuu ara, hai batena ina mowei hurungina au maroa i ope-ope tauna au tou-tou mohaoki Pue.

Yakobu 2:14

Halalu-halalu! Apami bunduna ane tauli mepoinalaike i Pue, agaiana babehianta bara moula peundeaNa. Ane nodo pepoinalainta, barake ina tehorema.

Yakobu 3:13

Ane ara tauna i olomi au maroa pekirinda hai au manoto lalunda, iti hangangaa rapatongawa i babehianda au maroa au mesuwu hangko i lalunda au mengkaiwoi moula apa au hintoto i tauna au manoto lalunda.