Suro 21:24 - Sura Malelaha

²⁴ Mewali, hangangaa laoko hihimbela hai ihira i Souna Pue Ala mobabehi ada agama mpobahoi wata, hai hangangaa nubaiari holo binata popenombanda bona peisamohe mogundi weluanda moula dandinda. Ane nodo, ina manoto i ope-ope tauna kadana tou bambari au rahadi kana i pepaturomu. Lawi nupeulaitomani Aturana Musa.

Suro 21:24 ပူးပေါင်းရင်းမြစ်များ

Yohane 11:55

I tempo iti, hungkumi alo mahile agama Yahudi au rauli Alo Posusa Pasa. Hangko damani alo mahile iti, bosa tauna hangko i boea-boeana lao i Yerusale bona mobahoihe watanda moula ada agamanda.

Yohane 3:25

Hambela tempo, mombehehemohe bahangkia topeguruna Yohane hai hadua to Yahudi, mampombehanaingi ada mpobahoi moula agamanda.

Suro 18:18

Mahae mani Paulu maida i Korintu, hangko mepalakanari i halalu hampepepoinalaina. Roo indo, ia mengkahemi i kapala tahi lao i tampo Siria, hihimbela hai Priskila hai Akwila. Agaiana hangko damanihe meangka, Paulu mampopekou hampai weluana i boea Kengkrea, tanda kamopabukeinami dandina i Pue Ala. Hai moula adanda to Yahudi, ane hopomi tempo podandi, hangangaa rakou weluanda.

Suro 21:26

Napeulai mpuu Paulu paturonda iti. Ido hai kahalona laomi hihimbela hai rangana au iba mobabehi ada agama mpobahoi wata. Roo indo, mesuami Paulu i lalu Souna Pue Ala mopahawe i tadulako mpenomba kaimpirana ina hopo alo-alo pobahoi watanda. Lawi ane hopomi tempo pobahoi watanda, Paulu hai rangana au iba iti hangangaa mesua i lalu Souna Pue Ala hai moantihe popenombanda hadua-hadua.

Suro 24:18

Tangangku moanti popenombaku iti, bahangkia to Yahudi molambina i Souna Pue Ala. I tempo iti, roomona mobabehi ada mpobahoi wata moula ada agamangki. Bara bosa tauna au hihimbela hai iko i tempo iti, hai barato wori ara pogewo-gewo.

1 Korintu 9:20

Ane mobambarina Ngkora Marasa i to Yahudi, mewalina nodo hadua to Yahudi bona bosa to Yahudi kuanti mepoinalai i Kerisitu. Ane iko hihimbela hai tauna au moula Aturana Musa, moula worina Atura iti. Katouana barana tetaka i Aturana Musa, agaiana kupeulai mpuu bona tauna iti kuanti mepoinalai i Kerisitu.

Galatia 2:12

Nguru-nguruna ia bara mampopontani to Yahudi hai tauna au barahe to Yahudi, lawi ia biasa maande hihimbela hai halaluna hampepepoinalai au barahe to Yahudi. Agaiana i kahawenda bahangkia rangana Yakobu hangko i Yerusale, Peturu mokaraohihe halaluna hampepepoinalai au bara to Yahudi. Kahopoana, barapi mau maande hihimbela hai ihira, lawi langa rasalai to Yahudi au hangko hawehe.