Suro 15:28 - Sura Malelaha

²⁸ Halalu, idemi pobotusi au napokana Inao Malelaha, hai au kipokana wori. Kiuliangaakau bona ineekau rapakasusa hai mampopengaa parenta. Batena ide pea au paraluu kipahaweakau:

Suro 15:28 ပူးပေါင်းရင်းမြစ်များ

Matiu 11:30

HawaNgku bara mapari, hai mangaa haleaNgku au Kuweikau nihalea.”

Matiu 23:4

Ihira mopahaleangiahe tauna bosa parenta hai ada agama au mantimi, agaiana bara mpuuhe motulungi tauna bosa mampeulai parenta hai ada iti.

Yohane 16:13

Ane hawe Inao Malelaha, Ia au ina moninikau hai mampopaisaakau ope-ope paturo au tou. Ia bara mololita moula peundeaNa. Apa au Nahadi hangko i UmaNgku, iti au Napololita. Hai Ia ina mopahaweakau apa au mewali i alo au ina mai.

Suro 15:19

Napaliliumi Yakobu lolitana, nauli, “Mewali, idemi pelambiaku halalu. Ineeke mopakapari tuwonda tauna au barahe to Yahudi au mengkoruhe i Pue Ala.

Suro 15:25

Ido hai mogombomongkai inde, hai hampepekirimongkai mopilei bahangkia rangangki au kitudu lao irikamu hihimbela hai Baranaba hai Paulu au kipokaahi.

Suro 15:8

Hai Pue Ala, au moisa lalu tauna, modoko tauna au barahe to Yahudi, hai Ia mopakanoto tunggaiaNa iti i kaNaweinda Inao Malelaha nodo au mewali irikita hangkoia.

Suro 16:4

Hangko inditi, meangkamohe Paulu, Silas hai Timotiu. I ope-ope boea au rapolumaongi, mopahawe liliuhe i to Sarani pobotusinda surona Pue Yesu hai penatua-penatua i Yerusale, hai mopaturohe bona hinangka hawa au rapakanotomi hangangaa rapeulai.

Suro 5:32

Ikamimi sabina hinangkana iti, ikami hai Inao Malelaha, au nawei Pue Ala i ope-ope tauna au mengkoru i hawaNa.”

1 Korintu 14:37

Ane arahe tauna au manguli, “Molambina kapande mopahawe lolita hangko i Pue Ala,” ba “Molambina kapande hangko i Inao Malelaha,” tauna iti hangangaa mopangaku apa au kuuki ide iami parenta hangko i Pue.

1 Korintu 7:25

Ide-ide kupaturoahe tauna au bara mani motambi. Paturongku ide bara parenta hangko i Pue Yesu. Agaiana kupaturokau moula pekiringku, hai peisana rapoinalai, lawi naangkana Pue mewali suroNa anti ahiNa.

1 Korintu 7:40

Agaiana meliu kamaroana ane barapi motambi. Iti pelambiaku pea. Agaiana kupekiri paturongku ide napahaweana Inaona Pue Ala au ara i lalungku.

1 Tesalonika 4:8

Ido hai ane ara tauna au mosapuaka paturo ide, bara manusia au nasapuaka, agaiana Pue Alari au nasapuaka! Tunggaiana Pue Ala moweike Inao Malelaha bona malelaha tuwonta.

1 Peturu 1:12

Hai Pue Ala mampopaisaahe nabi-nabi hangkoia barahe mopahawe bambari kana i watanda haduduanda. Agaiana ikamuri au ratunggai. Hai ide-ide, apa au rapahawe nabi-nabi hangkoia, rapahawemi i kanoto-notoana irikamu, lawi aramohe tauna au mopahaweakau Ngkora Marasa melempo i kuasana Inao Malelaha au hangko i Pue Ala. Mogalori malaeka, mampeinao worihe moisa kana i katuwo maroa au nihumba iti.

Pampetudungia 2:24

Agaiana arakau hanggaa i Tiatira au bara mampeulai paturo au kadake iti, hai bara niunde mampegurui au rauli, ‘Kapangisana Datu Tokadake au tewuniangi’. Mewali Kuuliangaakau, barapi ina Kutambai haleami hai parenta ntanina.