Suro 14:3 - Sura Malelaha

³ Maidamohe Paulu hai Baranaba bahangkia kamahaena i wanua iti. Barahe langa mopahawe bambari kana i Pue. Pue moweihe kuasa mobabehi tanda au metingkarai bona manoto i ope-ope tauna katouna Ngkora Marasa au raanti. Ngkora Marasa iti mampololita kabulana laluna Pue Ala au mowei katuwo maroa i manusia.

Suro 14:3 ပူးပေါင်းရင်းမြစ်များ

Markus 16:20

Hangko inditi, laomohe topeguruNa mopahawe Ngkora Marasa iumba-umba pea. Naporangaihe Pue i lalu bagonda, hai Napakaroho pobambarinda Ngkora Marasa hai tanda kuasa au metingkarai bona tongawa katouna Bambari au raanti.]

Yohane 4:48

Nauli Yesu i tauna iti, “Ikamu au maida i tampo ide, ane kebarakau moita tanda kuasa, barakau ina mepoinalai!”

Suro 13:46

Agaiana Paulu hai Baranaba pebaihe mouliangaa to Yahudi iti, “Katouana, Ngkorana Pue Ala nguru-nguruna hangangaa rapahawe hampai irikamu to Yahudi, agaiana bara nidoko. Ikamu haduduami au mopakanoto kadami hintoto molambi katuwo maroa au bara mokahopoa. Ido hai ina kipalehimokau lao i tauna au barahe to Yahudi!

Suro 2:22

Hai napaliliu mbuli Peturu lolitana, nauli, “Halalungku to Yahudi! Nipehadingi apa au kuuliangaakau ide. Au kutunggai iami Yesu to Nasare. Ia pea au napilei hai napakanoto Pue Ala mewali TopobagoNa au Malelaha. Iti niisa lawi anti kuasana Pue Ala, Pue Yesu mobabehi ngkaia tanda kuasa hai tanda au metingkarai i olomi.

Suro 20:24

Kehapiri nodo, barapi kupekiri watangku bona peisana moparoo bago au napoinalaiana Pue Yesu. Pobagongku ide, mopahawe Ngkora Marasa au mopatongawa kabulana laluna Pue Ala irikita.

Suro 20:32

Ide-ide, halalu, kupekakaeakau i Pue Ala bona Nakadipurakau. Kuweikau lolita bona mampeulai liliukau Ngkorana Pue au mopakanotoake kabulana laluna Pue Ala irikita. Lawi Pue Ala pea au makuasa mopakaroho lalunta hai moweike pewati au Napasilolongaamohe tauna au Napatani mewali anaNa au malelaha.

Suro 4:31

Karoonda mekakae, modua-duami sou au rapaidai, hai nakuasaimohe Inao Malelaha. Ido hai bai mpuumohe mopahawe Ngkorana Pue Ala i tauna bosa.

Suro 5:32

Ikamimi sabina hinangkana iti, ikami hai Inao Malelaha, au nawei Pue Ala i ope-ope tauna au mengkoru i hawaNa.”

Roma 1:16

Barana maea mopahawe Ngkora Marasa. Lawi hema pea au mampoinalai Ngkora Marasa iti, kuasana Pue Ala mohoremahe hangko i huku dosanda, nguru-nguruna i to Yahudi, hawe-hawe wori i tauna au barahe to Yahudi.

1 Tesalonika 2:2

Niisami tuntukana halalu! Hangko damaningkai hawe i boeami, rapopeahi-ahingkai hai rakakabosaingkai i wanua Pilipi. Hai nauri raewangkai tauna, Pue Ala mopakaroho lalungki datingkai langa mopaliliu pobagongki mopahaweakau Ngkora Marasa au hangko i Pue Ala.

Ibarani 2:4

Hai Pue Ala mopakaroho ntepuu posabinda, lawi Naweihe kuasa mobabehi ngkaia pakana tanda kuasa hai tanda au metingkarai. Hai Nawei worihe kapande au montani-ntani hangko i Inao Malelaha moula peundeaNa.