Roma 9:30 - Sura Malelaha

³⁰ Mewali node: tauna au barahe to Yahudi barahe mohaoki rara bona mewalihe manoto i peitana Pue Ala. Agaiana arahe hantanga au mewali manoto i peitaNa. Pue Ala mopakanotohe i peitaNa anti pepoinalainda.

Roma 9:30 ပူးပေါင်းရင်းမြစ်များ

Roma 10:10

Anti pepoinalainta i Yesu hangko i lalunta, ido hai Naimbamoke Pue Ala manoto i peitaNa. Hai anti katapangakunami Yesu i lolitanta, ido hai tehoremamoke hangko i huku dosanta.

Roma 10:20

Hai bara langa-langa Yesaya mopahawe Ngkorana Pue Ala node: Nauli Pue Ala, “Tauna au baraNa rahaoki, ihirari au molambiNa. Hai tauna au baraNa rakakio, Kupopaisaamohe kahemaNgku.”

Roma 10:6

Agaiana ara wori lolitana Musa au manguli: ikita mewali manoto i peitana Pue Ala anti pepoinalainta. Nauli node, “Inee nuuli i lalumu: ‘Hema au ina mengkahe lao i suruga? Hema au ina mendaulu lao i paidaa tomate?’ ” Lawi barake paraluu mengkahe i suruga mohaoki katuwo maroa, lawi Kerisitu mendaulumi mai irikita hai bara worike paraluu mendaulu i paidaa tomate mohaoki katuwo maroa, lawi Kerisitu tuwo hulemi hangko i kapate.

Roma 3:5

Mewali, babehiana manusia au bara manoto mopatongawa kamanotona Pue Ala. Agaiana inee tapehangu Pue Ala bara manoto ane Nahukuke anti babehianta au kadake. Arahe manusia au mampehangu nodo,

Roma 4:11

Burahima ratile aminami mepoinalai. Karatilena iti mewali pea tanda kamanotona i peitana Pue Ala. Mewali, tongawami irikita Burahima mewali manoto i peitana Pue Ala anti pepoinalaina nauri barato ratile. Ido hai peisa tauli Burahima rapouma tauna au barahe to Yahudi au mepoinalai i Yesu, lawi kehapirihe bara ratile moula Aturana Musa, batena mewalihe manoto i peitana Pue Ala anti pepoinalainda au himbela hai Burahima.

Roma 4:13

Hangkoia Pue Ala modandi i Burahima hai i pemuleana kaina mokuasainda dunia. Tunggaiana Pue Ala bona Burahima hai pemuleana mewali manoto anti pepoinalainda alana molambihe apa au Nadandi iti. Barahe molambi apa au nadandi Pue Ala anti pampeulainda Aturana Musa.

Roma 4:22

Anti pepoinalaina iti, ara teuki i lalu Sura Malelaha hangkoia au manguli, “Pue Ala moimba Burahima manoto i peitaNa.”

Roma 4:9

Pewati au napololita Daudi iti bara pea rahumba tauna au ratile, agaiana rahumba worihe tauna au bara ratile. Lawi nodo au roomi kuuli inona, Pue Ala moimba Burahima manoto anti pepoinalaina.

Roma 5:1

Mewali, ide-ide manotomoke i peitana Pue Ala anti pepoinalainta. Ido hai maroami pohintuwuta hai Pue Ala anti kanatanga-tangainta Amputa Yesu Kerisitu.

Roma 9:14

Agaiana inee tapehangu Pue Ala bara manoto ane Ia mopilei au hadua hai mosapuaka au hadua! Bara tou lolita iti!

Roma 9:31

Agaiana to Isaraeli, mahaemohe mopari-pari bona mewalihe manoto i peitana Pue Ala i pampeulainda Aturana Musa, agaiana bara rahumba au rahaoki iti lawi bara rabuku mampeulai atura iti.

Galatia 2:16

Nauri nodo, kiisa kadana babehiangki au maroa ba pampeulaingki Aturana Musa au mopamanotongkai i peitana Pue Ala. Ane taunde mewali manoto i peitana Pue Ala, hangangaa mampoinalaike Kerisitu Yesu. Ido hai mepoinalaimongkai i Kerisitu bona mewalingkai manoto i peitana Pue Ala. Barapi kiharunga peulanta i Aturana Musa, lawi bara ara hadua tauna au mewali manoto i peitana Pue Ala anti peulana i parenta-parenta au ara i Aturana Musa.

Galatia 3:24

Aturana Musa monini hai mokampaike duuna Kerisitu mai i dunia bona Napatongawa Pue Ala kamanotonta i peitaNa, lawi mepoinalaimoke i Kerisitu.

Galatia 3:8

Mepongka hangkoia arami tunggaiana Pue Ala mopamanoto tauna au barahe to Yahudi ane mepoinalaihe. Ido hai i lalu Sura Malelaha, Pue Ala nguru-nguruna mopahawe Ngkora Marasa i Burahima, nauli, “Anti kaoiona, ina Kuwatihe ope-ope tauna i dunia.”

Galatia 5:5

Agaiana ikita halalu, anti peninina Inao Malelaha, meharungake i Pue Ala au mopamanotoke i peitaNa anti pepoinalainta i Kerisitu Yesu. Hai batena iti au taharunga.

Epesu 2:12

I tempo iti, barakau mohintuwu hai Kerisitu. Ikamu tauna au tepairaoa; barakau teimba to Yahudi au napileihe Pue Ala mewali taunaNa. Bara ara kirami i lalu dandina Pue Ala i to Isaraeli. Tuwokau i dunia ide, bara ara peharungami, hai barakau moisa Pue Ala.

Pilipi 3:9

hai mohintuwuna hai Ia. Pue Ala moimbana manoto i peitaNa, bara anti peulangku i Aturana Musa, agaiana anti pepoinalaingku i Kerisitu. Mewalina manoto i peitana Pue Ala anti kabulana laluNa, lawi mepoinalaina i Kerisitu.

1 Timotiu 6:11

Agaiana oio Timotiu, hawinamoko Pue Ala. Nupakarao tuwomu hangko i ope-ope babehia au nodo. Nupari-pari mampeulai babehia au manoto hai mengkoruko i Pue Ala. Nupakaroho pepoinalaimu i Kerisitu hai kamaahimu i hangka rangamu, mantahako i lalu kapari hai Nupamaalusu poantimu i hangka rangamu.

Ibarani 11:7

Anti pepoinalaina, Noho mengkoru i hawana Pue Ala. Pue Ala mouliangaa kaina arana owai meumbala au molaboa dunia. Mewali, kehapiri bara mani naita pewalina, hawana Pue Ala napeulaimi hai nababehimi duanga mahile bona ia hai towawinena hai anana bara mate maliso. Ope-ope tauna i dunia rahuku, agaiana Noho anti pepoinalaina, ia Naimba Pue Ala manoto i peitaNa.

1 Peturu 4:3

Lawi mahae gagamokau mobabehi babehianda tauna au barahe moisa Pue. I tempo iti, merikai babehiami, moulakau peundeana lalumi au kadake, malangu-langukau, mosusa liliukau, masurokoakau, hai menombakau i anitu au bara hintoto rapenombai.