Roma 5:21 - Sura Malelaha

²¹ Hangkoia, dosami au makuasa i lalu katuwonda tauna, alanda ope-opehe hangangaa rahuku mate hai ragaakihe hangko i Pue Ala. Agaiana ide-ide, kabulanami laluna Pue Ala au makuasa i lalu katuwonta. Hangko i kabulana laluna Pue Ala, Naimbamoke manoto i peitaNa hai Naweike katuwo maroa au bara mokahopoa i lalu Yesu Kerisitu Amputa.

Roma 5:21 ပူးပေါင်းရင်းမြစ်များ

Matiu 25:46

Napahopo Yesu lolitaNa, Nauli, “Ope-ope tauna au kadake iti ina ratendehe i lalu naraka hai rahuku hawe i hae-haena, hai tauna au manoto ina molambihe katuwo maroa au bara mokahopoa.”

Yohane 1:14

Ngkora iti mewali manusia, hai maida i olonta i dunia ide. Hai ikami, kiitami kamahilena kuasaNa. KuasaNa iti Nalambi hangko i UmaNa, lawi iami AnaNa HaduduaNa. LolitaNa tou mpuu, hai tongawa ope-ope kabulaNa laluNa irikita.

Yohane 10:28

Kuweihe katuwo maroa au bara mokahopoa, hai manotomi kadanda ina rahuku. Bara ara hadua au peisa mamperampaihe hangko i taieNgku.

Roma 4:13

Hangkoia Pue Ala modandi i Burahima hai i pemuleana kaina mokuasainda dunia. Tunggaiana Pue Ala bona Burahima hai pemuleana mewali manoto anti pepoinalainda alana molambihe apa au Nadandi iti. Barahe molambi apa au nadandi Pue Ala anti pampeulainda Aturana Musa.

Roma 5:12

Dosa mesua i lalu dunia melempo i hadua tauna au moliungi hawana Pue Ala. Dosa iti mopaara kapate i lalu dunia, alana kapate morumpa ope-ope tauna, lawi ope-ope tauna madosami.

Roma 5:14

Agaiana nauri nodo, mepongka i Adama hawe i nabi Musa, kapate mangulelemi i ope-ope tauna. Kehapiri poliunginda hawana Pue Ala bara nodo au nababehi Adama, batena matehe nodo Adama. Adama iami pandirina Yesu, hadua tauna au ina hawe i boko.

Roma 5:17

Anti peliungina tauna au hadua iti, kapate mokuasai ope-ope tauna anti pohintuwunda hai tauna au hadua iti. Agaiana melumbu mpuu kamaroana babehiana tauna au hadua, iami Yesu Kerisitu! Hema pea au mepoinalai Iria molambihe kuasa hai katuwo maroa au bara mokahopoa. Iti ralambi anti kabulana laluna Pue Ala, lawi mahile mpuu kamaahiNa irikita. Ia moimbake manoto i peitaNa anti pohintuwuta hai Yesu Kerisitu.

Roma 6:12

Ido hai kuweikau lolita, halalu: inee tapogiangaa dosa mokuasai katuwonta i dunia ide; inee tapeulai peundeana lalunta au kadake.

Roma 6:14

Ikita, barapoke nakuasai dosa, bara anti pampeulainta Aturana Musa, agaiana anti pampeulainta kabulana laluna Pue Ala.

Roma 6:16

Niisato halalu, pandirina, ane mengkoruke i hadua tauna hai mampeulaike hawana, napohawimoke tauna iti. Nodo wori hai dosa, ane mampeulai liliuke peundeana lalunta au kadake, napohawimoke dosa. Kahopoana ina molambike kapate au mogaakike hangko i Pue Ala hawe i hae-haena. Agaiana ane mengkoruke i Pue Ala, mewalike taunana Pue Ala au mampeulai peundeaNa.

Roma 6:23

Hema au mobabehi dosa batena molambi hurungina, hai hurungina iti iami kapate au mogaakike hangko i Pue Ala. Agaiana anti kabulana laluna Pue Ala irikita, ido hai Naweike katuwo maroa au bara mokahopoa. Kabulana laluNa iti tahumba anti pohintuwuta hai Kerisitu Yesu, Amputa.

Roma 8:10

Agaiana ikita, ane arami Kerisitu i lalunta, kehapiri watanta ide mate lawi madosa, tanoananta batena molambi katuwo maroa au bara mokahopoa, lawi manotomoke i peitana Pue Ala.

Titu 2:11

Kabulana laluna Pue Ala tongawami i ope-ope tauna, lawi Nabungkahimi rara bona peisake tehorema hangko i huku dosanta.

Ibarani 4:16

Ido hai halalu, ineemoke langa. Peisamoke mohungkuki Pue Ala i kadera kadatuaNa au i suruga bona modokoke kamaahiNa, hai Natulungike hangko i kabulana laluNa i tempona au taparaluu.

1 Peturu 5:10

Hai ane liumi kapari au hampalai iti, Pue Ala ina mopahandai apa au makura irikamu. Lempona, Ia ina mopakaroho pepoinalaimi, mopamanoto tuwomi hai mopatetida lalumi. Lawi Pue Ala iami pongkana ope-ope ahi. Ia mokakiokau mewali anaNa bona anti pohintuwumi hai Kerisitu, ina molambikau kirami i lalu kamahilena tuwoNa au bara mokahopoa.

2 Peturu 1:1

Sura ide hangko iriko, Simo Peturu hawina hai surona Yesu Kerisitu, kupakatuakau halalu au mepoinalai i Yesu Kerisitu. Yesu Kerisitu iami Pue Ala au mohoremake hangko i huku dosanta. Anti kamanotona Pue Ala, Napopewalimokau taunaNa au mepoinalai Iria, himbela hai ikami suroNa.

1 Yohane 2:25

Hai idemi dandiNa irikita: katuwo maroa au bara mokahopoa.