Roma 5:17 - Sura Malelaha

¹⁷ Anti peliungina tauna au hadua iti, kapate mokuasai ope-ope tauna anti pohintuwunda hai tauna au hadua iti. Agaiana melumbu mpuu kamaroana babehiana tauna au hadua, iami Yesu Kerisitu! Hema pea au mepoinalai Iria molambihe kuasa hai katuwo maroa au bara mokahopoa. Iti ralambi anti kabulana laluna Pue Ala, lawi mahile mpuu kamaahiNa irikita. Ia moimbake manoto i peitaNa anti pohintuwuta hai Yesu Kerisitu.

Roma 5:17 ပူးပေါင်းရင်းမြစ်များ

Matiu 25:34

Hai Iko Datu, Kuuliangaahe au ntanda i koanaNgku, ‘Maimokau au nawati UmaNgku! Mesuamokau i lalu poparentaKu. Paidaami Kupasilolonga amiamokau hungka i pewalina dunia hangkoia.

Yohane 10:10

Ane tauna ntanina mouli kaihiranami Datu Topehompo, ihira peisa rapandiri nodo topanangka. Topanangka, mai peahe manangka, mepapate hai mepaope. Agaiana kamaiNgku ide bona manusia molambi katuwo au rumihi kamaroana.

Roma 5:12

Dosa mesua i lalu dunia melempo i hadua tauna au moliungi hawana Pue Ala. Dosa iti mopaara kapate i lalu dunia, alana kapate morumpa ope-ope tauna, lawi ope-ope tauna madosami.

Roma 5:15

Agaiana kabulana laluna Pue Ala irikita melumbu kamahilena hangko peliungina Adama. Anti peliungina Adama, ope-ope tauna batenda mate. Agaiana melumbu mpuu kabulana laluna Pue Ala au Nawei mberoke melempo i hadua tauna, iami Yesu Kerisitu.

Roma 5:20

Tunggaiana Aturana Pue Ala au napahawe Musa, iami bona tongawa mpuu kamasalanda ope-ope tauna, lawi ngkaiami peliunginda i Atura iti. Agaiana nauri rumihi kamahilena dosa manusia, melumbu mani kamahilena kabulana laluna Pue Ala i manusia!

Roma 6:14

Ikita, barapoke nakuasai dosa, bara anti pampeulainta Aturana Musa, agaiana anti pampeulainta kabulana laluna Pue Ala.

Roma 6:23

Hema au mobabehi dosa batena molambi hurungina, hai hurungina iti iami kapate au mogaakike hangko i Pue Ala. Agaiana anti kabulana laluna Pue Ala irikita, ido hai Naweike katuwo maroa au bara mokahopoa. Kabulana laluNa iti tahumba anti pohintuwuta hai Kerisitu Yesu, Amputa.

1 Korintu 15:49

Ide-ide, katuwonta nodo katuwona Adama, lawi watanta ide iami wata au hintoto maida i dunia. I alo au ina mai, hangko tuworike nodo Kerisitu, hai i tempo iti ina molambike wata au hintoto maida i suruga.

1 Korintu 4:8

Ba nipehangu barapi ara kamakurami? Ba nipehangu handami kamarohona pepoinalaimi i Pue? Ba niuli moparentamokau nodo datu, hai ikami surona Pue Yesu barapongkai niparaluu? Kemaroa mpuu halalu ane mewalikau datu bona moparenta woringkai hihimbela hai ikamu.

Pilipi 3:9

hai mohintuwuna hai Ia. Pue Ala moimbana manoto i peitaNa, bara anti peulangku i Aturana Musa, agaiana anti pepoinalaingku i Kerisitu. Mewalina manoto i peitana Pue Ala anti kabulana laluNa, lawi mepoinalaina i Kerisitu.

1 Timotiu 1:14

Nauri mahile dosangku, agaiana melumbu mani kamahilena ahina Pue Ala. Natulungina hangko i kabulana laluNa, alana mampoinalai hai mampokaahina Kerisitu Yesu.

2 Timotiu 2:12

Ane sabarake mohalea kapari anti peulanta Iria, ina moparenta worike hihimbela hai Ia. Agaiana ane tasapuaka peulanta Iria, ina Nasapuaka wori kaikitana taunaNa.

Yakobu 2:5

Halalungku au kupokaahi! Nipehadingi maroa: tauna au meahi-ahi tuwonda i dunia ide napileihe Pue Ala bona mewalihe pebuku i pepoinalainda. Ina molambi sosoranda i lalu poparentaNa moula dandina Pue Ala i tauna au maahi Iria.

1 Peturu 2:9

Agaiana ikamu, halalu, napileimokau Pue Ala au mampopewalikau nodo tadulako mpenomba au mampopolumao bago mpenomba i Datunta. Napatanikau mewali kiraNa hai taunaNa au malelaha. Pue Ala mopileikau hai mokakiokau hangko i kamakaindi mesua i lalu kamabaaNa au merae ntepuu bona mopahawekau bagoNa au maroa i ope-ope tauna.

Pampetudungia 1:6

hai Napopewalimoke taunaNa i lalu poparentaNa. Napopewalimoke tadulako mpenomba au mampopolumao bago penomba i Pue Ala, UmaNa. Yesu Kerisitumi au meawa tuwoNa hai au makuasa hawe i hae-haena. Amin!

Pampetudungia 20:4

Roo indo, kuita bahangkia kadera kadatua au rapohudai tauna au raweihe kuasa mobotusi kara-kara. Kuita wori tanoananda tauna au rabohoki tambolonda anti popangakunda kaYesuna Ampunda hai popahawenda Ngkorana Pue Ala. Tauna iti, barahe hambela menomba i binata au kadake ba i lengge binata iti, hai bara worihe modoko tanda binata i wingkenda ba i taienda. Ido hai tuwo hulehe hai moparentahe hihimbela hai Kerisitu i lalu hasabu parena.

Pampetudungia 20:6

Morasihe hai malelahahe tauna au rapatuwo hule i pearonda tomate au nguru-nguruna. Bara mpuuhe ina rahuku i lalu naraka. Pehuku i lalu naraka iami au rahanga kapate karombelana. Tauna au rapatuwo hule i pearonda tomate au nguru-nguruna ina mewalihe tadulako mpenomba i Pue Ala hai i Kerisitu. Ina moparentahe hihimbela hai Kerisitu i lalu hasabu parena.

Pampetudungia 22:5

Barapi ara kaindi, hai ampu boea iti barapohe moparaluu hulo ba pesimbaki alo, lawi pewangkana Pue Ala au ina mosimbakihe. Hai ina moparentahe nodo datu hawe i hae-haena.

Pampetudungia 3:21

Hema au menangi, ina Kupopohuda hihimbela hai Iko i kadera kadatuaNgku, nodo Iko au menangimoNa, hai mohudaNa moparenta hihimbela hai UmaNgku i kadera kadatuaNa.