Roma 4:25 - Sura Malelaha

²⁵ Yesu itimi au mokira wataNa rapapate mohuru salanta. Hai roo indo, Pue Ala mopatuwo hule Yesu bona mewalike manoto i peitaNa.

Roma 4:25 ပူးပေါင်းရင်းမြစ်များ

Matiu 20:28

Hangangaa nipeulai poantiKu, Iko Ana Manusia. Lawi tunggaiaKu mai i dunia ide, baraNa mai mewali topohawa. Agaiana kamaiNgku i dunia ide bona mewaliNa hawi, hai bona mohuhuna wataNgku rapapate mohuru salanda tauna bosa.”

Roma 3:25

Moula popakanotona Pue Ala, Yesu rapapate hai waheNa tebumbuha. Iti nababehi Pue Ala bona Yesu rahuku mohalea dosa manusia bona teampungi dosanta ane mepoinalaike Iria. Hangko damani Yesu mate, Pue Ala bara mohuku manusia au madosa anti kasabaraNa.

Roma 5:18

Mewali, anti kamanawona Adama, ope-ope tauna masalami hai hintoto rahuku. Nodo wori, anti hambua babehia au manoto iami kapatena Yesu i kau mombehape, ope-ope tauna peisa manoto i peitana Pue Ala hai molambi katuwo maroa au bara mokahopoa.

Roma 8:3

Barake peisa tekabaha hangko i kuasa dosa lawi bara tabuku moula aturana Musa anti kamaledenta. Agaiana apa au bara peisa tababehi i atura agama anti kamaledenta, Napopewalimi Pue Ala, i potuduNami mai AnaNa i dunia mewali manusia. WataNa AnaNa Napahimbela hai wata manusia au madosa. Hai AnaNa iti mokira wataNa rapapate mohuru dosa manusia. Mewali, hangko i kapateNa, Pue Ala monangi kuasa dosa au ara i manusia.

1 Korintu 15:17

Hai ane Kerisitu bara rapatuwo hule, bara mobundu pepoinalaimi hai barakau ina tekabaha hangko i huku dosami.

2 Korintu 5:15

Lawi tunggaiana Kerisitu mate mohuru dosa ope-ope tauna bona ikita au tuwo manike i dunia ide barapoke moula peundeata haduduanta, agaiana moulamoke peundeana Kerisitu, au matemi mohuru dosanta hai au rapatuwo hulemi.

2 Korintu 5:21

Kerisitu, bara madosa, agaiana napahimbela Pue Ala tauna madosa hai Napahaleangi dosanta. Tunggaiana Pue Ala bona ikita au mohintuwu hai Kerisitu raimbamoke manoto i peitaNa.

Galatia 1:4

Pue Yesu mokirami wataNa rapapate mohuru dosanta bona tekabahake hangko i kuasa dunia au kadake ide. Iti Nababehi moula peundeana Pue Ala Umanta.

Galatia 2:20

Hai ide-ide barapona tuwo moula peundeaku haduduangku, agaiana Kerisitumi au tuwo i lalu katuwongku. Mewali, tangangku mani tuwo i dunia ide, batengku mepoinalai i Anana Pue Ala au mampokakaiana hai au mokira wataNa rapapate bona mewalina manoto i peitana Pue Ala.

Galatia 3:13

Ikita ope-ope hintoto napaharara Pue Ala, lawi moliungike Aturana Musa. Agaiana nauri nodo, Nakabahamoke Kerisitu hangko i pepaharara iti. Teuki i lalu Sura Malelaha hangkoia node: “Ane ara tauna au rapapate i kau mombehape, manoto tauna iti harara i Pue Ala.” Mewali, kapatena Kerisitu i kau mombehape, mopahuruke molambi pepaharara hangko i Pue Ala au katouana hangangaa morumpake.

Epesu 5:2

I babehianta alo-alona, hangangaa maahike i ranganta, nodo Kerisitu maahimi Irikita. Anti kamaahiNa irikita, Ia mokira wataNa rapapate mopahuruke. Babehia iti mopakatana laluna Pue Ala, nodo popenomba mawongi au rahuhu Iria.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Ibarani 8:3

Ope-ope Tadulako Mpenomba Mahile raangka bona mohuhu binata hai popenomba ntanina i Pue Ala. Nodo wori, Yesu Tadulako Mpenomba Mahilenta hangangaa mohuhu popenombaNa i Pue Ala, iami wataNa haduduaNa.

Ibarani 9:28

Nodo wori, Kerisitu hambela pea mohuhu wataNa i Pue Ala mohalea dosa tauna bosa. Hai hambela tempo, Ia ina mai i karombelana i dunia ide. Kamaina iti, barapi mai mohalea dosanta. Agaiana mairi moanti katehorema i tauna au mampepegia kahaweNa.

1 Peturu 1:21

Anti kahaweNa, ido hai mepoinalaikau i Pue Ala au mopatuwo hule Yesu hangko i kapate hai mowei katuwo mahile Iria, alana mepoinalaikau hai meharungakau i Pue Ala.

1 Peturu 2:24

Yesu haduduana mohalea huku dosanta i karapapateNa i kau mombehape bona tekabahake hangko i kuasa dosa hai tuwoke moula peundeana Pue Ala. KapateNa iti moanti katuwo maroa irikita.

1 Peturu 3:18

Lawi ara wori hadua au molambi kapari, iami Kerisitu. Ia hambela pea mokira wataNa rapapate bona mohalea dosa manusia. Ia au bara ara salaNa mopahuruke au masala bona moantike i Pue Ala. Ia rapapate, agaiana rapatuwo hule anti kuasana Inao Malelaha.

1 Yohane 2:2

Hai Iami au mate mewali pahuruna watanta bona Pue Ala moampungi dosanta. Hai bara pea dosanta au Nahuru, agaiana dosanda wori tauna i humalele dunia.

Pampetudungia 1:5

hai hangko i Yesu Kerisitu, Sabi au manoto. Iami au nguru-nguruna tuwo hule hangko i kapate hai au makuasa moparenta ope-ope datu i dunia. Yesu mampokakaiake, hai Ia mokira wataNa rapapate bona tekabahake hangko i huku dosanta,

Pampetudungia 5:9

Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.

Pampetudungia 7:14

Kuhanai: “Barahe kuisa, ampu. Nuuliangaa wongkoia.” Nauliangaana: “Ihira iti, tauna au mamporaraimohe au rauli Tempo Pepopeahi-ahi au Rumihi Ntepuu. Hampinda rabahoi hai wahena Ana Dimba bona mewali bula.