Roma 3:25 - Sura Malelaha

²⁵ Moula popakanotona Pue Ala, Yesu rapapate hai waheNa tebumbuha. Iti nababehi Pue Ala bona Yesu rahuku mohalea dosa manusia bona teampungi dosanta ane mepoinalaike Iria. Hangko damani Yesu mate, Pue Ala bara mohuku manusia au madosa anti kasabaraNa.

Roma 3:25 ပူးပေါင်းရင်းမြစ်များ

Yohane 6:47

Tou lolitaNgku ide: hema au mepoinalai Iriko, molambihe katuwo maroa au bara mokahopoa.

Suro 14:16

Hangkoia Pue Ala mopalikangaa manusia menomba moula peundeanda haduduanda.

Suro 15:18

Nodomi pangulina Pue au mopakanoto tunggaiaNa hangkoia.”

Suro 17:30

Hangkoia, menombake i anitu. Nauri nodo, barake nahuku Pue Ala. Ia motuko pea mataNa i kantulita iti. Agaiana ide-ide, Natuduhe ope-ope tauna i humalele dunia bona menosohe hangko i dosanda.

Suro 2:23

Hintoto hai tunggaia hai peundeana Pue Ala lawi naisa amimi, rahuhumi Yesu irikamu bona nipapate. Hai nihuhuahe i tauna au kadake rapapate i kau mombehape.

Suro 3:18

Agaiana nauri nodo, hangko i apa au nibabehi iti, tepabukeimi apa au nauli Pue Ala hangkoia au rapahawe ope-ope nabi au manguli: Datu Topehompo hangangaa molambi kapari.

Suro 4:28

Rabotusimi bona mopapatehe Yesu. Agaiana au rababehi iti mopabukei apa au Nupakanoto amimi alana ope-ope mewali moula kuasaMu hai peundeaMu.

Roma 2:4

Tou, laluna Pue Ala maroa, sabara hai mahile ahiNa. Agaiana inee nauli lalumi, “Barake paraluu mobaliki babehianta au kadake.” Nikatuinao, halalu tunggaiana kamaroana laluna Pue Ala bona tepakakau mampenosoi dosami.

Roma 3:26

Agaiana ane Pue Ala bara mohuku manusia au madosa, lempona Ia bara manoto. Mewali i kapatena Yesu, Pue Ala mampetudungia kamanotoNa, lawi dosa manusia nahurumi Yesu. Ido hai taisa kamanotona Pue Ala hai taisa wori Pue Ala ina moimba manoto ope-ope tauna au mepoinalai i Yesu.

Roma 5:1

Mewali, ide-ide manotomoke i peitana Pue Ala anti pepoinalainta. Ido hai maroami pohintuwuta hai Pue Ala anti kanatanga-tangainta Amputa Yesu Kerisitu.

Roma 5:11

Hai bara pea iti, matana mpuu lalunta mampokatana roana Pue Ala au tahumba anti kanapahuruntami Amputa Yesu Kerisitu. Lawi hangko i Yesu Kerisitu, maroami pohintuwuta hai Pue Ala.

Roma 5:18

Mewali, anti kamanawona Adama, ope-ope tauna masalami hai hintoto rahuku. Nodo wori, anti hambua babehia au manoto iami kapatena Yesu i kau mombehape, ope-ope tauna peisa manoto i peitana Pue Ala hai molambi katuwo maroa au bara mokahopoa.

Roma 5:9

Mewali ide-ide, manotomoke i peitana Pue Ala, lawi Yesu matemi mohuru dosanta. Ido hai taisa katekabahantami hangko i karumpuna Pue Ala i alo pebotusi anti kanaperuruintami Yesu Kerisitu.

1 Korintu 5:7

Ane to Yahudi mobabehi ada Posusa Pasa, ope-ope ragi hangangaa raingihi i olonda hangko i sounda, hai hambaa ana dimba hangangaa rasambale mewali popenomba popohompo dosanda. Nodo ragi raingihi hangko i sounda, ikamu wori hangangaa moingihi tauna au madosa iti hangko i olomi bona malelaha tuwomi, lawi ikamu napamalelahamokau Pue Ala. Hai nodo hambaa dimba rasambale i Posusa Pasa, Kerisitu rapapate worimi bona mohompo dosanta.

2 Korintu 5:21

Kerisitu, bara madosa, agaiana napahimbela Pue Ala tauna madosa hai Napahaleangi dosanta. Tunggaiana Pue Ala bona ikita au mohintuwu hai Kerisitu raimbamoke manoto i peitaNa.

Epesu 1:7

Hai wahena Pue Yesu au mabubu i kapateNa, tehompokimoke hangko i huku dosanta, lempona naampungimi Pue Ala hinangka dosanta, hangko i kabulana laluNa au mahile.

Epesu 2:13

Agaiana ide-ide, anti pohintuwumi hai Kerisitu Yesu, katuwomi barapi nodo. Ikamu au hangkoia “karao” hangko i Pue Ala, ide-ide “hungkumokau” lawi Kerisitu mohuhumi wataNa rapapate mopahurukau.

1 Timotiu 1:15

Manoto mpuu lolita au manguli: “Kerisitu Yesu mai i dunia bona mohorema tomadosa hangko i huku dosanda.” Tou mpuu lolita iti hai hintoto tapoinalai. Hai hangko i ope-ope tomadosa, ikomi au melumbu dosangku.

Ibarani 10:4

Lawi wahe japi laki hai towau laki bara peisa moumpahi dosa.

Ibarani 11:14

Tauna au manguli nodo, tongawa hangko i lolitanda apa au rahaoki. Au rahaoki iami tampo au peisa mewali tamponda haduduanda.

Ibarani 11:17

Anti pepoinalaina Burahima, i tempona napetandaka Pue Ala, ia lao mohuhu Isaki anana mewali popenombana. Hangkoia Pue Ala mololita iria, Nauli, “Batena pea pemuleana Isaki au ina raimba pemuleamu moula apa au Kudandiako.” Agaiana nauri nodo, bula laluna Burahima mohuhu anana au haduduana mewali popenombana.

Ibarani 11:7

Anti pepoinalaina, Noho mengkoru i hawana Pue Ala. Pue Ala mouliangaa kaina arana owai meumbala au molaboa dunia. Mewali, kehapiri bara mani naita pewalina, hawana Pue Ala napeulaimi hai nababehimi duanga mahile bona ia hai towawinena hai anana bara mate maliso. Ope-ope tauna i dunia rahuku, agaiana Noho anti pepoinalaina, ia Naimba Pue Ala manoto i peitaNa.

Ibarani 9:28

Nodo wori, Kerisitu hambela pea mohuhu wataNa i Pue Ala mohalea dosa tauna bosa. Hai hambela tempo, Ia ina mai i karombelana i dunia ide. Kamaina iti, barapi mai mohalea dosanta. Agaiana mairi moanti katehorema i tauna au mampepegia kahaweNa.

Ibarani 9:5

I wongko peti iti, ara rombua kerub, kapinda tebinihi mobobongi petuko peti. Hangko i kerub iti, tongawa peawana Pue Ala. Petuko iti rahanga Petauki Podame. Agaiana ope-ope iti ineemi rapambaha inde.

1 Yohane 1:10

Ane tauli barake madosa, mampopodongkomoke Pue Ala, hai NgkoraNa bara ara i lalunta.

1 Yohane 2:2

Hai Iami au mate mewali pahuruna watanta bona Pue Ala moampungi dosanta. Hai bara pea dosanta au Nahuru, agaiana dosanda wori tauna i humalele dunia.

1 Yohane 4:10

Idemi au rauli ahi: bara ikita au nguru-nguruna mampokaahi Pue Ala, agaiana Pue Alari au nguru-nguruna mampokaahike, ido hai motudu mai AnaNa mewali pahuruna watanta bona teampungi dosanta.

Pampetudungia 1:5

hai hangko i Yesu Kerisitu, Sabi au manoto. Iami au nguru-nguruna tuwo hule hangko i kapate hai au makuasa moparenta ope-ope datu i dunia. Yesu mampokakaiake, hai Ia mokira wataNa rapapate bona tekabahake hangko i huku dosanta,

Pampetudungia 13:8

Ope-ope tauna au maida i dunia menomba iria. Au bara menomba iria, batena pearaihe tauna au teuki hanganda i lalu Sura Ngkatuwo hangko damani dunia rapopewali. Sura Ngkatuwo iti, iami surana Ana Dimba au rasambale. I lalu sura iti, teuki hanganda tauna au molambi katuwo maroa au bara mokahopoa.

Pampetudungia 5:9

Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.