Roma 12:8 - Sura Malelaha

⁸ Tauna au molambi kapande mopakaroho laluna rangana, hangangaa napopolumao mpuu bago iti. Hema au mokira apa pea i hangka rangana, hangangaa nababehi hangko kabulana laluna. Hema au molambi kapande mewali tadulako, hangangaa mewali mpuu tadulako au madota. Hai hema au molambi kapande motulungi rangana au meahi-ahi, hangangaa natulungihe hangko i laluna au matana.

Roma 12:8 ပူးပေါင်းရင်းမြစ်များ

Matiu 25:40

Hai Iko Datu, Kuhanaihe, ‘Bona niisa, apa au nibabehi motulungi halaluNgku, nauri hadua pea halaluNgku au meahi-ahi katuwona, lempona, himbelami hai nibabehi Iriko.’

Suro 11:23

Baranaba iti, tauna au maroa laluna. Ia nakuasai Inao Malelaha hai maroho pepoinalaina. Kahawena Baranaba i Antiokia, matana mpuu laluna, lawi naita kamahilena pewatina Pue Ala irihira au mepoinalai i Yesu. Mewali, Baranaba mopakaroho lalunda, hai nauliangaahe bona mampeulai liliuhe Pue Yesu hangko i lalunda. Ido hai bosa wori to Antiokia mepoinalai i Pue Yesu.

Suro 13:12

Naitami Gubernur apa au mewali iti, tingkara mpuu, lawi tongawami kuasana paturona Pue Ala, hai ia mepoinalai i Pue Yesu.

Suro 13:15

To Yahudi au teruhu inditi mobasahe hangko i Sura Aturana Musa hai hangko i Suranda Nabi. Roo indo, tadulako sou penombaa motudu bahangkia tauna lao mekune i Baranaba hai Paulu, rauli, “Halalu, ane ara lolitami au nipeinao nipaturoangkai, peisatokau mololita.”

Suro 15:32

Hangko inditi, Yudasi hai Silas mahaehe mololita mopaturo halalu hampepepoinalainda hai mohuweki pepoinalainda, lawi ihira iti nabi worihe.

Suro 20:2

I polumaona iti, ia mosondakihe to Sarani, hai napahaweahe ngkaia lolita bona maroho lalunda. Hangko inditi, lao wori i tampo Akaya, tamponda to Yunani,

Suro 20:28

Maroa-roakau datikau madosa, hai nikadipura maroa ope-ope jumaa au napoinalaiakau Inao Malelaha. Hangangaa nikadipurahe, nodo hadua toporewu mamporewu dimbana, lawi Anana Pue Ala mate mobaiari huku dosanda bona mewalihe taunana Pue Ala.

Suro 4:36

Nodo wori au nababehi Yusupu. I pampobaluna tampona, holona nahuhuahe surona Pue Yesu. Yusupu iti iami hadua pemuleana Lewi au maida i lewuto Siprus. Suronahe Pue Yesu mohanga wori Yusupu iti, Baranaba, lempona topepalindo.

Roma 12:13

Nitulungihe rangami hampepepoinalai au ara i lalu kamakuranda. Hangangaa matanakau modoko torare.

Roma 13:6

Idomi hai hangangaa mobaiarike asele bona topoparenta peisa mampopolumao bagonda au napahaleangiahe Pue Ala.

1 Korintu 12:28

Hai irikita au mepoinalai, Pue Ala mopakanotomi bona hadua-hadua ara bagona, kaisa arahe au mewali suroNa, kadua arahe au mopahawe NgkoraNa, hai katalu arahe au mepaturo. Ara worihe au Nawei kuasa mobabehi tanda kuasa. Arahe au Nawei kuasa mepakaoha, arahe au molambi kapande motulungi hangka ranganda, arahe au mewali tadulako, arahe au molambi kapande mololita i lalu basa au hangko i Inao Malelaha.

1 Korintu 14:3

Agaiana hema au mopahawe lolita hangko i Pue Ala, mopaturohe tauna, lawi lolitanda mopakaroho pepoinalainda ranganda, mohuweki lalunda hai mopalindohe.

2 Korintu 1:12

Matana lalungki halalu, lawi kiisa, katuwongki i dunia ide pelumbunami i lalu pohintuwuki hai ikamu, hangko i kabulana mpuu lalungki kipopolumao. Hai apa au kibabehi iti bara hangko i kapande manusia agaiana hangko i kapande au Nakiraiangkai Pue Ala.

2 Korintu 11:3

Agaiana kuperapi ineekau hawe rapakanawo alana barapokau mepoinalai i Kerisitu hangko i lalumi. Nodo ile mokelo Hewa hai lolitana au momi, ara worihe tauna au mampeinao bona moulakau paturonda au mosisala hai pepoinalaimi i Kerisitu.

2 Korintu 8:12

Lawi ane mampeinaoke motulungi ranganta hai mokirake popenombata moula apa au ara irikita, popenombata iti nadoko Pue Ala. Bara Naperapi irikita apa au meliu hangko i pesauruanta.

2 Korintu 9:11

Ikamu ina napoporasikau Pue Ala i hinangka pewati bona bula lalumi i rangami. Mewali, ane kiantimi popenombami i hangka ranganta au meahi-ahi tuwonda, bosa tauna ina manguli ngkaia kamaroana i Pue Ala.

2 Korintu 9:13

Ane moitamohe petulungimi, ina motoiahe Pue Ala lawi anti kamaroana lalumi tongawami kamarohona pepoinalaimi i Ngkora Marasa kana i Kerisitu hai pengkorumi i hawaNa. Ina motoiahe Pue Ala, lawi bula lalumi motulungi tauna iti hai tauna ntanina.

2 Korintu 9:7

Agina hadua-hadua tauna mokira popenombana i sukana kabulana laluna. Ineekau mokira hangko i kasusa lalu, hai ineekau mokira anti karapari-pariami. Lawi Pue Ala mampokaahi tauna au mokira hangko i katana lalu.

Epesu 6:5

Halalungku au mewali hawi, nipeulai hawana ampumi i lalu dunia ide. Nibila hai nipengkoruihe hangko i kabulana lalumi. Nibabehi iti nodo pengkorumi i Kerisitu.

Kolose 3:22

Halalu au mewalikau hawi, nipeulai liliu ope-ope hawana ampumi au i dunia ide. Ineekau mampeulai hawanda i lindonda pea, anti kamampeinaomi ratoia. Agaiana hangangaa mengkorukau i hawanda hangko i kabulana lalumi, lawi mengkorukau i Pue.

1 Tesalonika 2:3

Barakau kiwawaha mampeulai paturo au sala. Bara wori ara tunggaiana lalungki au kadake, hai barangkai mampeinao mopakanawo ba hema pea.

1 Tesalonika 2:8

Anti kakipokaahimi, matana lalungki mopahaweakau Ngkora Marasa hangko i Pue Ala. Hai bara pea ido, mogalori tuwongki kihuhu bona peisakau kitulungi.

1 Timotiu 4:13

Hangko damanina hawe, Sura Malelaha hangangaa nubasaa liliuhe halalunta hampepepoinalai. Hangangaa nupakaroho liliu lalunda hai nupaturohe.

1 Timotiu 5:17

Penatua au maroa pobagonda, hintoto mpuuhe rawei peadai au rombela hangko i tauna ntanina, pelumbunami penatua au mepaturo hai au mopahawe Ngkorana Pue.

1 Timotiu 6:18

Nuweihe lolita bona manoto liliu babehianda, maroa lalunda: motulungihe hangka ranganda hai ineehe bohi.

Ibarani 10:25

Ineeke mokaraohi pogulu-gulu i lalu penomba, nodo au rababehi tauna ntanina, agaiana hangangaa hirampu liliuke menomba bona peisake mombepakaroho mpolalu, pelumbunami i tempo ide, lawi taisa barapi mahae Pue ina hawemi.

Ibarani 13:17

Nipeulaimi hawanda tadulakomi hai mengkorukau irihira. Lawi ihira au mokadipura katuwomi, hai au hangangaa mohanaihe Pue Ala kana i pobagonda. Nipeulai hawanda bona matanahe mobago. Ane bara nipeulai hawanda, ina masusa lalunda, hai ane nodo barapi ina ara pobunduana irikamu.

Ibarani 13:22

Halalu-halalu, kuperapi bona nipehadingi maroa-roa ide paturongku, nauri ihi surangku ide sosoe pea.

Ibarani 13:24

Nipahaweangkai tabeangki i ope-ope tadulakomi hai i ope-ope halalu hampepepoinalaimi inditi. Halalumi hampepepoinalai to Italia mopakatu worihe tabeanda irikamu.

Ibarani 13:7

Hangangaa nikatuinao liliuhe tadulakomi au mopahaweamokau Ngkorana Pue Ala. Nipeita noumba tuwonda hawe i kapatenda, hai nipeulai pepoinalainda.