Pampetudungia 2:23 - Sura Malelaha

²³ Ope-ope tauna au meula iria ina Kupapatehe. Hangko inditi, ina tongawa i ope-ope jumaa kaIkona au moparesa pekiri manusia hai lalu manusia. Ina Kuhurungikau hintoto hai babehiami.

Pampetudungia 2:23 ပူးပေါင်းရင်းမြစ်များ

Matiu 16:27

Hambela tempo Iko Ana Manusia ina maiNa hangko i suruga mampetudungia peawana tuwoNgku au himbela hai peawana tuwona UmaNgku. I tempo iti, bosa wori malaeka ina moulaNa, hai batena Kuhurungi babehianda ope-ope tauna.

Lukasi 16:15

Agaiana nauliangaahe Yesu, “Mampemanotokau i peitana tauna, agaiana Pue Ala moisa ihi lalumi. Lawi apa au nahaoki manusia, itimi au nakahihi Pue Ala.

Yohane 21:17

Hangko inditi, mekune mbulimi Yesu kataluna belana, “Simo, anana Yona, ba nupokaahiNa?” Masusami laluna Peturu, lawi talumi belana Yesu mekune ba nupokaahiNa. Mewali, nauli Peturu, “Pue, Nuisa hinangkana. Nuisa kakupokaahiMu.” Nauli Yesu, “Ane nodo, nukadipurahe dimbaKu.

Yohane 4:16

Nauli Yesu, “Laomoko hampai mokakio tobalilomu, hai mesuleko mai.”

Suro 1:24

Roo indo, mekakaemohe, rauli, “Pue, Nuisa ope-ope lalunda tauna. Yudasi, au mewali suroMu hangkoia, ide-ide manawomi, hai molambimi hurungina hintoto hai babehiana. Ido hai kiperapi, Nutudungia wongkamia kahemana hangko i tauna au rodua ide au Nupilei amimi mopahuru Yudasi.”

Roma 14:12

Mewali, ikita ope-ope hangangaa mohanai Pue Ala kana i babehianta.

Roma 8:27

Hai Pue Ala au moparesa lalu tauna, moisa tunggaiana Inao Malelaha. Lawi Inao Malelaha iti mampekakaea taunana Pue Ala, moula peundeana Pue Ala.

2 Korintu 5:10

Lawi hambela tempo, ikita ope-ope hangangaa molindo Kerisitu bona Naparesa babehianta, hai ikita ope-ope ina molambi hurungina hintoto hai apa au tababehi tanganta mani tuwo i dunia ide.

Galatia 6:5

Lawi ope-ope tauna hangangaa mohalea babehiana haduduana.

Ibarani 4:13

Bara ara hampaka au tewuni i peitaNa. Hinangkana au ara tepambole hai tongawa Iria. Hai Iria hangangaa tapangaku ope-ope babehianta.

1 Peturu 1:17

Halalu, ane niuli Pue Ala iti, Umami, hangangaa mengkorukau i Pue Ala tempomi mani maida i dunia ide, nodokau topolilo. Lawi Pue Ala au nipouma iti, iami Topobotusi kara-karanda ope-ope tauna moula babehianda, hai Ia bara mampopontani tauna.

Pampetudungia 2:11

Hema au motalinga, hangangaa mampehadingi apa au nauli Inao Malelaha i ope-ope jumaa. Hema au menangi, bara mpuuhe ina rahuku i naraka au rahanga kapate karombelana.”

Pampetudungia 2:7

Hema au motalinga, hangangaa mampehadingi apa au nauli Inao Malelaha i ope-ope jumaa. Hema au menangi, Kupaliu mpuu maande wua kau ngkatuwo i Bonde Paradesi i suruga.”

Pampetudungia 20:12

Hai kuitahe tomate au rapatuwo hulemohe, maroa au koi ba au mahile tuwonda, meangkahe i lindo kadera kadatua iti. Tauna au mate maliso i tahi hai ope-ope tauna au ara i paidaa tomate, meangkamohe ope-ope i lindo kadera kadatua iti. Hai rabungkahimi sura, inditi teuki ope-ope babehianda. Mewali, ope-ope tomate au rapatuwo hulemohe ina rahukuhe hintoto hai apa au teuki i lalu sura iti, karahukunda moula babehianda. Hai rabungkahi worimi sura au hambuana, hangana Sura Ngkatuwo.

Pampetudungia 22:12

Nauli Pue Yesu, “Barapi mahae ina hawemoNa, hai ina Kuhurungi babehianda ope-ope tauna hintoto hai apa au rababehi.

Pampetudungia 6:8

Kuita hambaa dara au mabada-bada. Tauna au mesawi i dara iti rahanga “Kapate,” hai au meusu i bokona rahanga “Paidaa Tomate.” Ihira iti raweihe kuasa mopapate hangkira iba hangko i ope-ope tauna. Arahe au rapapate i lalu pombeala, arahe au mate laloara, arahe au mate narumpa haki, hai arahe au rapapate binata au maseke.