Pampetudungia 12:10 - Sura Malelaha

¹⁰ Roo iti, kuhadi hambua wotu i suruga au mololita masisimbuku, nauli, “Hawemi tempona Amputa Pue Ala mowei katehorema i taunaNa, mopatongawa kuasaNa, hai mepongkami moparenta. Hawemi tempona Datu Topehompo au Napilei Pue Ala ina mopatongawa kamakuasaNa. Lawi Datu Tokadake rapopelohomi hangko i suruga; iami au mosalai liliuhe halalunta hampepepoinalai i lindona Amputa Pue Ala.

Pampetudungia 12:10 ပူးပေါင်းရင်းမြစ်များ

Matiu 26:64

Nahanai Yesu, “Tou mpuu, nodo au nuuli iti. Hai Kuuliangaa mbulikau: ina niitaNa Iko Ana Manusia, mohuda ntanda i koanana Pue Ala au makuasa, hai ina niita woriNa mai mendaulu hangko i suruga i wongko gawu.”

Matiu 28:18

Yesu mohungkuki topeguruNa, Nauliangaahe, “Ope-ope kuasa i suruga hai i dunia rahuhuamoNa.

Matiu 6:10

Nupopewalimi poparentaMu i dunia, bona ope-ope tauna mobabehi peundeaMu nodo au mewali i suruga.

Lukasi 11:2

Nauliangaahe Yesu, “Ane mekakaekau, niuli node, Uma, kipomahile hangaMu au malelaha. Nupopewalimi poparentaMu i dunia.

Lukasi 22:31

Roo indo, Yesu mouliangaa Simo Peturu, “Simo! Nupehadingi: Datu Tokadake rawei mpuumi katepaka mokelokau. Nodo pare au ratapihi, ina tepatani au wara hai au moihi.

2 Korintu 12:9

Agaiana Nahanaina: “Bara Kuingihi, agaiana ina Kutulungiko hangko i kabulana laluNgku, iti handami. Lawi hangko i kamaledemu, kuasaNgku ina Kupatongawa i lalu katuwomu.” Ido hai matanana mampomahile kamaledengku, lawi i tempoku malede, Kerisitu mopakaroho watangku hai kuasaNa.

Titu 2:3

Nodo wori towawine au saemohe, nupaturohe bona babehianda hintoto hai tauna au mengkoru i Pue Ala; ineehe manguli au bara tou kana i ranganda, hai ineehe paka maenu-enu. Hangangaa mopaguru liliuhe ranganda bona maroa babehianda.

1 Peturu 5:8

Hangangaa manoto pekirimi hai mainga-ingakau! Lawi Datu Tokadake au mewali iwalimi molulumao nodo hambaa singa au melolo-lolo mohahaoki tauna au ina nahaka. Hangko pelolonato, melangakimi.

Pampetudungia 11:15

Malaeka au kapitu motawuemi tatamburuna. Hai arahe au monganga-nganga i lalu suruga, rauli, “Ide-ide poparenta i dunia i taienami Pue Ala himbela hai Datu Topehompo au Napileimi bona Pue Ala moparenta i hae-haena.”

Pampetudungia 2:26

Hema au menangi, hai mobabehi apa au hintoto hai peundeaKu duuna i kahopoana, ina Kuweihe kuasa himbela hai kuasa au Kudokomi hangko i UmaNgku. Ina Kuweihe kuasa moparenta tauna i humalele dunia. Kamarohona kuasaNgku au Kuweihe iti nodo kamarohona lai besi. Kuasa iti, ina rapopopakarugi ope-ope iwalinda nodo kori tampo au rapengka.

Pampetudungia 7:10

Monganga-ngangamohe, rauli, “Toiami Amputa Pue Ala au mohuda i kadera kadatua! Toiami Ana Dimba! Lawi Ia au mohoremake hangko i huku dosanta, hai moweike katuwo maroa.”