Matiu 6:20 - Sura Malelaha

²⁰ Agina nibabehi babehia au maroa, lawi ane nibabehi nodo, lempona mowolikau anu-anumi i lalu suruga. Anu-anumi iti bara ina matanta, lawi indora bara ara au mopatagara, bara ara au mopabubu, bara ara au mopakarugi, hai bara ara au mopanangka.

Matiu 6:20 ပူးပေါင်းရင်းမြစ်များ

Matiu 19:21

Nahanai Yesu, “Ane mampeinaoko mampeulai Pue Ala hangko i kabulana lalumu, laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko meula Iriko.”

Matiu 6:19

“Ineekau morampu anu-anu i dunia. Lawi anu-anu i dunia peisa naande bubu ba mewali tagara. Pambolia anu-anumi peisa rabungkahi hai ihina rapanangka.

Markus 10:21

Yesu mototoki tauna iti lawi maahi laluNa, pane Nauliangaa, “Ara mani hampaka au hangangaa nubabehi. Laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko meula Iriko.”

Lukasi 12:33

Ido hai Kuuli, nipobalumi anu-anumi, hai holona niweihe tauna au meahi-ahi tuwonda. Lawi ane nibabehi nodo, mowolikau anu-anumi i lalu kusau au bara peisa mahepa, lempona, i lalu suruga. Anu-anumi iti bara ina matanta, lawi bara peisa rapanangka hai bara peisa naande bubu.

Lukasi 18:22

Kanahadina Yesu lolitana, Naulimi, “Ara mani hampaka au hangangaa nubabehi. Laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko, meulamoko Iriko.”

1 Timotiu 6:17

I tauna au pebuku, nupaturohe bona ineehe mampemahile hai ineehe meharunga i anu-anu dunia, lawi anu-anu dunia batena pea marugi. Agina mepoinalaihe i Pue Ala au moweike ope-ope pewati au bara ara hokana. Iami au tapokatana.

1 Timotiu 6:19

Lawi ane nodo babehianda, himbela peahe hai morampu anu-anu au maroa i lalu suruga, hai batena molambihe katuwo au maroa ntepuu.

Ibarani 10:34

Maahi lalumi i tauna au ratarunggu anti peulanda i Pue Yesu. Ane anu-anumi rarampaki, bara nipokaehua. Agaiana batemi matana, lawi niisa kaarana au rapasilolongaakau i suruga au meliu kamaroana hai au bara mokahopoa.

Ibarani 11:26

Naunde Musa rakakabosai anti pepoinalaina i Datu Topehompo au ina mai pane molambi peawana datu i tampo Masiri. Lawi ia meharunga liliu i Pue Ala bona mohumba hurungina au mahile i bokona.

Yakobu 2:5

Halalungku au kupokaahi! Nipehadingi maroa: tauna au meahi-ahi tuwonda i dunia ide napileihe Pue Ala bona mewalihe pebuku i pepoinalainda. Ina molambi sosoranda i lalu poparentaNa moula dandina Pue Ala i tauna au maahi Iria.

1 Peturu 1:4

Taharunga kaina molambita pewati au napasilolongaamoke Pue Ala i suruga. Pewati iti bara ina marugi ba kadake ba tebali.

1 Peturu 5:4

bona ane hawe Toporewunta au meawa tuwoNa, ina Naweikau hambua songko datu au mengkila-ngkila liliu hawe i hae-haena.

Pampetudungia 2:9

Nauli: Kuisa kapari au morumpakau, hai Kuisa peahi-ahimi, agaiana katouana pebukukau i lalu pepoinalaimi. Kuisa noumba karakakabosaimi tauna au moulihe katoYahudinda. Agaiana katouana, i lalunda barahe to Yahudi; topegurunarihe Datu Tokadake.