Lukasi 20:16 - Sura Malelaha

¹⁶ Batena topokadipura bondena iti maihe napapate, hai bondena ina naweihe tauna ntanina.” Karahadina tauna bosa ngkora pandiri iti, mololitamohe i Yesu, rauli, “Inee mpuu hawe mewali nodo! Ikita to Yahudi, barake ina nahuku Pue Ala nodo topokadipura bonde i lalu ngkora pandiriMu iti!”

Lukasi 20:16 ပူးပေါင်းရင်းမြစ်များ

Matiu 21:34

Hawemi tempona mopupu wua anggoro, natudumi bahangkia hawina lao merapi kirana hangko i topokadipura bondena.

Matiu 21:41

Rahanai, “Manoto ia ina mopapate tauna au kadake iti, hai bondena ina nasaroahe tauna ntanina au mounde mowei ihi bondena iria i tempo pepare.”

Matiu 22:7

Kanahadina datu apa au mewali, rumihi mpuu karumpuna. Natudumohe surodadona lao mopapate topepapate iti hai mohuwe boeanda.

Markus 12:9

Roo indo, mekunemi Yesu, Nauli, “Mewali, apa au ina nababehi ampu bonde iti? Batena ina mai mopapate topokadipura bondena, hai bondena ina naweihe tauna ntanina.

Lukasi 19:27

Roo indo, nauli mbuli datu iti, ‘Antimide mai iwalingku au mosapuaka karalantiku mewali datunda. Nipapatemohe ope-ope inde kuita-ita mata!’ ”

Lukasi 20:15

Mewali, rahaka mpuumi, rabisoso lao i raoa bonde hai rapapate.” Roo indo, napapulo Yesu lolitaNa, Nauli, “Ane mesule ampu bonde iti, apa au ina nababehi?

Suro 13:46

Agaiana Paulu hai Baranaba pebaihe mouliangaa to Yahudi iti, “Katouana, Ngkorana Pue Ala nguru-nguruna hangangaa rapahawe hampai irikamu to Yahudi, agaiana bara nidoko. Ikamu haduduami au mopakanoto kadami hintoto molambi katuwo maroa au bara mokahopoa. Ido hai ina kipalehimokau lao i tauna au barahe to Yahudi!

Roma 11:1

Mewali kupekune, natendemohe pae Pue Ala to Isaraeli au mewali taunaNa hangkoia? Manoto bara. Lawi ide iko, to Isaraeli worina, pemuleanana Burahima hangko i tina Benami.

Roma 11:11

Mewali, bosahe to Yahudi tehube lawi barahe mepoinalai. Agaiana inee tapehangu anti katehubenda iti, manawohe hawe i hae-haena. Bara iti tunggaiana Pue Ala. Anti peewanda to Yahudi, tepakahe tauna au barahe to Yahudi mepoinalai i Pue Yesu duuna tehoremahe hangko i huku dosanda. TunggaiaNa bona i kahopoana, to Yahudi ina mokahinaihe tauna au barahe to Yahudi duuna rapeinao moula pandirinda.

Roma 3:31

Mewali, naimbamoke Pue Ala manoto i peitaNa hangko i pepoinalainta pea, bara anti pampeulainta atura au nauki Musa. Agaiana inee tapehangu atura iti bara tou, lawi hai pepoinalainta, mopakarohori atura iti.

Roma 3:4

Kehapiri ope-ope tauna modongko, batena tou lolitana Pue Ala. Takatuinao apa au nauli Datu Daudi hangkoia. Nauli node, “bona tongawa kamanotoMu i hinangka NgkoraMu hai menangiKo ane raparesaKo.”

Roma 3:6

agaiana bara tou. Lawi ane rapana Pue Ala bara manoto, Ia bara peisa mampohuda-hudaa kara-karanda ope-ope tauna i alo pebotusi i kahopoa dunia.

Roma 6:15

Mewali noumba halalu! Ane nahoremamoke Pue Ala bara anti pampeulainta Aturana Musa, agaiana anti kabulana pea laluna Pue Ala, ba peisamoke mobabehi dosa? Inee nodo halalu.

Roma 6:2

Inee tapehangu nodo halalu! Bara hintoto ane mobabehi liliuke dosa, lawi matemoke hihimbela hai Kerisitu bona dosa barapi makuasa irikita.

Roma 7:13

Ba Aturana Musa au maroa iti au mogaakina hangko i Pue Ala? Bara. Agaiana Aturana Musa iti mewali rara au mogaakina hangko i Pue Ala anti dosangku. Hangko i atura au maroa iti, tongawami kamadosangku, hai manoto worimi kakadakengku.

Roma 7:7

Tauli inona, Kerisitu mokabahake hangko i Aturana Pue Ala au napahawe Musa. Agaiana inee tauli kadake Atura iti. Bara tou lolita iti! Aturana Musa maroa, lawi hangko i atura iti, taisa apa au rauli dosa. Ane rapana bara ara parenta au manguli, “Inee nupokaelu anu-anuna rangamu,” kebara kuisa kakadakena babehia iti.

Roma 9:14

Agaiana inee tapehangu Pue Ala bara manoto ane Ia mopilei au hadua hai mosapuaka au hadua! Bara tou lolita iti!

1 Korintu 6:15

Bara pae niisa halalu, watami iami hangkira hangko i watana Kerisitu. Maroa pae ane watanta au mewalimi kirana Kerisitu tapake mobabehi sala hai towawine au kadake babehiana? Bara!

Galatia 2:17

Mewali, idemi peharungangki: anti pohintuwuki hai Kerisitu, ido hai napamanotomongkai Pue Ala i peitaNa. Agaiana ara tauna au mosalai pepaturongku, rauli, “Ane mepoinalai peakau i Yesu hai barapokau mengkoru i Aturana Musa, lempona mewalikau tomadosa himbela hai tauna au barahe to Yahudi. Madosa manikau anti peulami i Yesu.” Lolita iti bara tou!

Galatia 3:21

Kaliliuana halalu, Aturana Musa bara moewa tunggaiana dandina Pue Ala. Ane rapana, peisa tapeulai atura-atura iti bona molambike katuwo maroa, lempona atura itimi au mewali raranta mopamanoto watanta i peitana Pue Ala.

Galatia 6:14

Agaiana iko, bara kuunde rapomahile i raoa hangko i kapatena Pue Yesu Kerisitu i kau mombehape. Lawi ope-ope au peisa raita i dunia ide hai au raimba mahile holona barapi ara bunduna iriko. Hai tauna i dunia ide, bara ara au tedii lalunda i apa au kupomahile.