Ibarani 9:23 - Sura Malelaha

²³ Ane Bambaru Malelaha au i dunia ide hai anu-anu au ara i laluna, ope-ope iti mopandiri irikita kana apa au ara i suruga. Bambaru Malelaha au i dunia ide hangangaa rabahoi hai wahe binata au rapopenomba i Pue Ala. Agaiana ane sou penombaa au i suruga, hangangaa ara popenomba au meliu kamaroana.

Ibarani 9:23 ပူးပေါင်းရင်းမြစ်များ

Lukasi 24:26

Idemi au rapahaweakau nabi hangkoia: Datu Topehompo, hangangaa narumpa kapari, hangko molambiri pohudaa au meawa hai au teadai.”

Lukasi 24:46

Nauli, “I lalu Sura Malelaha teuki node: Datu Topehompo hangangaa molambi kapari hai kapate, hai i kataluna alona ina tuwo hule.

Yohane 14:3

Ane roomoNa mopasilolonga paidaami, ina mesule huleNa maikau Kuala, bona iumba pea kaaraaNgku, inditi worikau hihimbela hai Iko.

Suro 23:15

Mewali, kiperapi i uma-uma hai tadulako-tadulako i Pogombo Mahile Agama mopakatukau sura i kapala tadulako surodado to Roma, niperapi bona Paulu raanti hule i lindomi. Niuli ina niparesa mbuli kara-karana agaiana masilolongamongkai ina mopapate i tanga rara.”

Kolose 2:17

Pue Ala moweike atura iti hangkoia mewali pandiri irikita kana i apa au ina mewali, hai ope-ope atura iti napabukeimi Kerisitu.

Ibarani 10:1

Aturana Pue Ala au napahawe Musa mewali pandiri irikita kana i apa au ina mai. Hangko i Atura iti, bara mani taisa katuwo maroa au tahumba hangko i Kerisitu. Taita mewao-wao pea, bara lenggena ntepuu. Moula Aturana Musa iti, pare-parena tauna au mampeinao mohungkuki Pue Ala hangangaa moanti liliu popenombanda au himbela. Agaiana barahe peisa mewali manoto i peitana Pue Ala anti poantinda popenombanda.

Ibarani 10:4

Lawi wahe japi laki hai towau laki bara peisa moumpahi dosa.

Ibarani 8:5

Tadulako mpenomba iti mobagohe i lalu sou penombaa i dunia ide. Sou penombaa iti mewali pandiri irikita kana i apa au ara i suruga. Ido hai hangko damani nabi Musa moaro Bambaru Malelaha hangkoia, Pue Ala mouliangaa node: “Nukatuinao! Ope-ope iti hangangaa nubabehi moula apa au ratudungiamoko i wongko bulu!”

Ibarani 9:14

pelumbunami wahena Kerisitu! Anti kuasana Inao Malelaha au tuwo hawe i hae-haena, Kerisitu mohuhu wataNa i Pue Ala bona rapapate mewali popenomba au bara ara kamakurana. WaheNa iti mobahoi lalunta hangko i hinangka babehianta au moantike i kapate bona peisake menomba i Pue Ala au tuwo.

Ibarani 9:24

Lawi paidaa malelaha au napesuangi Kerisitu, bara paidaa au rababehi tauna. Paidaa malelaha iti iami suruga. Hai Kerisitu mesua mpuu i suruga. Ide-ide, arami i lindona Pue Ala mamperuruike.

Pampetudungia 5:9

Monani-nanimohe hambua nani au wou, rauli: “Oiomi au hintoto modoko sura iti hai mobungkahi penena lawi rapapatemoKo; Hai waheMu au mabubu i kapateMu, Nupopoholomohe tauna i humalele dunia, i ope-ope kadatua, i ope-ope pemulea hai i hinangka basa. Hai Nuhuhuhe i Pue Ala.