Ibarani 8:5 - Sura Malelaha

⁵ Tadulako mpenomba iti mobagohe i lalu sou penombaa i dunia ide. Sou penombaa iti mewali pandiri irikita kana i apa au ara i suruga. Ido hai hangko damani nabi Musa moaro Bambaru Malelaha hangkoia, Pue Ala mouliangaa node: “Nukatuinao! Ope-ope iti hangangaa nubabehi moula apa au ratudungiamoko i wongko bulu!”

Ibarani 8:5 ပူးပေါင်းရင်းမြစ်များ

Matiu 2:12

Tanga kaindi, Pue Ala mampopaingaahe i lalu pangipinda, Nauli, “Ineekau mesule i Herode!” Mewali i pesulenda i tamponda, barahe moliu i Yerusale, moulamohe rara ntanina.

Suro 7:44

“Tanganda toiorunta i pada wungi, Pue Ala motudumi Musa mobabehi Bambaru Penombaa au peisa rapombegeroa hai raanti-anti iumba pea kalaoanda. Bambaru Penombaa iti mewali tanda kaarana Pue Ala i olonda to Yahudi, hai rababehi moula hawana Pue Ala i Musa.

Kolose 2:17

Pue Ala moweike atura iti hangkoia mewali pandiri irikita kana i apa au ina mewali, hai ope-ope atura iti napabukeimi Kerisitu.

Ibarani 10:1

Aturana Pue Ala au napahawe Musa mewali pandiri irikita kana i apa au ina mai. Hangko i Atura iti, bara mani taisa katuwo maroa au tahumba hangko i Kerisitu. Taita mewao-wao pea, bara lenggena ntepuu. Moula Aturana Musa iti, pare-parena tauna au mampeinao mohungkuki Pue Ala hangangaa moanti liliu popenombanda au himbela. Agaiana barahe peisa mewali manoto i peitana Pue Ala anti poantinda popenombanda.

Ibarani 11:7

Anti pepoinalaina, Noho mengkoru i hawana Pue Ala. Pue Ala mouliangaa kaina arana owai meumbala au molaboa dunia. Mewali, kehapiri bara mani naita pewalina, hawana Pue Ala napeulaimi hai nababehimi duanga mahile bona ia hai towawinena hai anana bara mate maliso. Ope-ope tauna i dunia rahuku, agaiana Noho anti pepoinalaina, ia Naimba Pue Ala manoto i peitaNa.

Ibarani 12:25

Maroa-roakau, ineekau hawe moae Pue, au mongkorami irikita. To Isaraeli hangkoia, barahe mampoinalai lolitana Pue Ala au mongkora irihira i Bulu Sinai, hai batenda rahuku. Apa mani ikita au mohadi lolitana Pue Ala au mongkora irikita hangko i suruga. Ane tasapuaka NgkoraNa, batena barake tekabaha hangko i pehukuNa.

Ibarani 13:10

Irikita, ara au meliu kamaroana hangko i ada agama Yahudi. Irikita, arami popenombata au mohompo salanta, hai tadulako mpenomba au mampeulai ada agama Yahudi barahe molambi kiranda hangko i popenombata iti.

Ibarani 9:9

Ope-ope iti mewali ngkora pandiri irikita au tuwoke ide-ide. Lempona: barake peisa mopamalelaha lalunta i peitana Pue Ala i pohuhunta binata hai popenomba ntanina Iria.

Pampetudungia 15:5

Roo iti, kuita hologa malelaha ntepuu au ara i bambaru malelaha au i suruga rabungkahimi.