Ibarani 7:27 - Sura Malelaha

²⁷ Yesu bara nodo Tadulako Mpenomba Mahile ntanina au hangangaa mohuhuhe popenombanda alo-alona: nguru-nguruna popenomba au mohuru dosanda haduduanda, hai roo indo popenomba au mohuru dosanda tauna bosa. Agaiana Yesu hambela pea mohuhu popenomba i Pue Ala. Iti Nababehi i tempoNa mohuhu wataNa rapapate. PopenombaNa iti Nahuhu hambela pea; barapi ina rahuleki hawe i hae-haena.

Ibarani 7:27 ပူးပေါင်းရင်းမြစ်များ

Roma 6:10

Yesu mate monangimi kuasa dosa, hambela pea i hae-haena. Hai ide-ide, Ia tuwo mampeulai peundeana Pue Ala.

Epesu 2:22

Hai ikamu wori halalu au barakau to Yahudi, anti pohintuwumi hai Kerisitu, raaro sambelamokau hai ope-ope tauna au mepoinalai i Kerisitu. Hai mewalike haogu sou au napaidai Pue Ala i lalu kuasana Inao Malelaha.

Epesu 5:2

I babehianta alo-alona, hangangaa maahike i ranganta, nodo Kerisitu maahimi Irikita. Anti kamaahiNa irikita, Ia mokira wataNa rapapate mopahuruke. Babehia iti mopakatana laluna Pue Ala, nodo popenomba mawongi au rahuhu Iria.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Ibarani 5:1

Ope-ope Tadulako Mpenomba Mahile rapilei hangko i tauna biasa, hai raangka mampopolumao bagona Pue Ala. Tadulako mpenomba mahile iami hadua tadulako agama au lao i lindona Pue Ala moanti kara-karanda tauna bosa. Bagona, mosambale binata mohuru dosanda tauna bosa hai mohuhu popenomba au ntanina i Pue Ala.

Ibarani 5:3

Anti kamaledena, Tadulako Mpenomba Mahile bara pea mohuhu popenomba mohuru dosanda tauna bosa, agaiana popenomba iti mohuru wori dosana haduduana.

Ibarani 8:4

Ane rapana Yesu ara mani i dunia, Ia bara mewali tadulako mpenomba, lawi arahe tadulako mpenomba au mohuhu popenombanda i Pue Ala moula Aturana Musa.

Ibarani 9:12

I tempoNa mesua i lalu Bambaru Malelaha, Ia liliu lao i lalu Hologa Malelaha Ntepuu molindo Pue Ala. Hai wahe au Naanti mesua, bara wahe towau laki ba wahe ana japi laki, agaiana waheNa haduduaNa. PesuaNa iti, hambela pea i hae-haena, lawi hai waheNa iti, Ia mohompomi dosanta hawe i hae-haena.

Ibarani 9:14

pelumbunami wahena Kerisitu! Anti kuasana Inao Malelaha au tuwo hawe i hae-haena, Kerisitu mohuhu wataNa i Pue Ala bona rapapate mewali popenomba au bara ara kamakurana. WaheNa iti mobahoi lalunta hangko i hinangka babehianta au moantike i kapate bona peisake menomba i Pue Ala au tuwo.

Ibarani 9:25

Tadulako Mpenomba Mahile agama Yahudi, pare-parena mesua i lalu Hologa Malelaha Ntepuu moanti wahe binata, bara wahena haduduana. Agaiana Kerisitu, bara bosa belana mohuhu wataNa i Pue Ala.

Ibarani 9:26

Lawi ane rapana nodo, kebosa belana Ia hangangaa mantodiha kapari duuna mate mepongka hangko i pewalina dunia hangkoia. Mewali, ide-ide hawe i kahopoa dunia au tepakanotomi, Ia mai i dunia moumpahi dosa manusia hambela pea, i pohuhuNa wataNa rapapate.

Ibarani 9:28

Nodo wori, Kerisitu hambela pea mohuhu wataNa i Pue Ala mohalea dosa tauna bosa. Hai hambela tempo, Ia ina mai i karombelana i dunia ide. Kamaina iti, barapi mai mohalea dosanta. Agaiana mairi moanti katehorema i tauna au mampepegia kahaweNa.

Ibarani 9:7

Agaiana au peisa mesua i hologa karombuana, batena pea Tadulako Mpenomba Mahile au mesua hambela pea hampare. Hai ane mesua, hangangaa moanti wahe. Wahe iti, iami wahe binata au nahuhu i Pue Ala, mohuru kamasalana haduduana hai salanda tauna bosa au bara raoaka.