Ibarani 6:11 - Sura Malelaha

¹¹ Agaiana kiperapi mpuu halalu, bona nipari-pari mopaliliu babehia iti duuna i kahopoana, bona mohumba mpuukau apa au niharunga hangko i Pue Ala.

Ibarani 6:11 ပူးပေါင်းရင်းမြစ်များ

Matiu 24:13

Agaiana tauna au mepoinalai liliu Iriko duuna i kahopoana ina molambihe katuwo maroa.

Lukasi 1:1

Teopilu au kubila, bosa tauna mopari-pari mouki tuntukana au mewalimi i olonta.

Roma 12:8

Tauna au molambi kapande mopakaroho laluna rangana, hangangaa napopolumao mpuu bago iti. Hema au mokira apa pea i hangka rangana, hangangaa nababehi hangko kabulana laluna. Hema au molambi kapande mewali tadulako, hangangaa mewali mpuu tadulako au madota. Hai hema au molambi kapande motulungi rangana au meahi-ahi, hangangaa natulungihe hangko i laluna au matana.

Roma 15:13

Taperapi Pue Ala, peharunganta, moweikau katana hai roa ngkatuwo i lalu pepoinalaimi i Pue Yesu, bona kamaroho-rohoa peharungami Iria anti kuasana Inao Malelaha.

1 Korintu 13:13

Mewali, ide-ide, ara talu pakana au hangangaa tababehi: mepoinalaike i Pue Ala, meharungake i dandiNa, hai maahike i hangka ranganta. Agaiana hangko i talu pakana iti, au melumbu kamaroana iami ahi.

1 Korintu 15:58

Mewali halalu au kupokaahi, hangangaa nipakaroho pepoinalaimi. Inee bata-bata lalumi. Hangangaa nipopolumao liliu bagona Pue, lawi niisa apa au nipobago i Pue bara ina mbero-mbero.

Galatia 5:5

Agaiana ikita halalu, anti peninina Inao Malelaha, meharungake i Pue Ala au mopamanotoke i peitaNa anti pepoinalainta i Kerisitu Yesu. Hai batena iti au taharunga.

Galatia 6:9

Mewali, ineeke oha-oha mobabehi apa au maroa, lawi ane mobabehi liliuke apa au maroa, batena ina tapupu wuana i tempo au tepakanotomi.

Pilipi 3:15

Mewali, ikita au manoto peulanta i Pue, hangangaa hampepekirike mobabehi nodo au kuuli inona. Agaiana ane arakau au bara himbela pekirimi, Pue Ala batena ina mopakanotoakau paturo au tou.

Kolose 1:23

ane mepoinalai liliukau, mantahakau, hai barakau mampogiangaa tauna mopakanawokau. Mewali halalu, hangangaa nipakaroho peulami i paturo au nihadimi. Ineekau mokabaha peharungami i apa au nadandiamokau Pue Ala i lalu Ngkora Marasa. Ngkora Marasa iti rabambarimi i humalele dunia. Hai iko wori, mewalina hawina Pue au mopahawe Ngkora Marasa iti.

Kolose 1:5

Pepoinalaimi hai ahimi maroho, lawi meharunga mpuukau i apa au Napasilolongaakau Pue Ala i suruga, nodo au nihadimi i lalu paturo au tou au rapahaweamokau, iami, Ngkora Marasa.

Kolose 2:2

Tunggaiaku bona maroho lalumi hai mombepokaahikau, alana mohintuwukau hadua hai hadua. Peundeaku bona tongawa i lalumi tunggaiana Pue Ala au tewuniangi hangkoia hai bara bata-bata lalumi; tunggaiaNa iti bona moisakau Kerisitu.

1 Tesalonika 1:5

Kiisa iti, lawi i tempoki mopahawe Ngkora Marasa irikamu bara pea lolitangki haduduangki, agaiana Inao Malelaha au moweingkai kuasa mololita. Hai kipoinalai mpuu katouna Ngkora Marasa iti. Niisa noumba babehiangki i tempoki mani hihimbela hai ikamu. Babehiangki mopakanoto irikamu katouna bambari au kianti.

1 Tesalonika 4:10

Katouana, maahimokau i ope-ope halalumi hampepepoinalai i Makedonia. Agaiana kiperapi mpuu halalu bona babehiami iti nitambai mani.

2 Tesalonika 3:13

Halalu-halalu, ineeke oha-oha mobabehi apa au maroa.

Ibarani 10:22

Lalunta Napamalelahami hai waheNa bona taisa kadanapi ara kamanawonta. Watanta rariu hai owai tanda kaNabahointa hangko i dosanta. Ido hai kuhuweki lalumi, halalu, bona mohungkukike Pue Ala hangko i lalunta mpuu hai hangko i pepoinalainta au maroho.

Ibarani 3:14

Lawi ikita ide mohintuwu hai Kerisitu, asala apa au tapoinalai hangko i nguru-nguruna takingki liliu hangko i lalunta au bara bata-bata duuna i kahopoana.

Ibarani 3:6

Agaiana Kerisitu, bara pea topobago. Ia Anana Pue Ala au matundu mampopolumao bagoNa nodo hadua tadulako au mokadipura ope-ope ihi souna Pue Ala. Ihi souna Pue Ala iti, ikita idemi, asala maroho liliu pepoinalainta hai meharunga liliuke i Pue Yesu duuna i kahopoana.

1 Peturu 1:21

Anti kahaweNa, ido hai mepoinalaikau i Pue Ala au mopatuwo hule Yesu hangko i kapate hai mowei katuwo mahile Iria, alana mepoinalaikau hai meharungakau i Pue Ala.

2 Peturu 1:10

Mewali halalu, lawi Napileimokau Pue Ala hai Nakakiomokau mewali taunaNa, hangangaa nipari-pari moula Pue Ala bona tongawa kaNapileimi hai kaNakakiomimi. Lawi ane nitambai pepoinalaimi hai babehia au kuuli inona, barakau ina manawo.

2 Peturu 3:14

Mewali halalu au kupokaahi, tangami mampepegia alo iti, nipari-pari meula i Pue bona maroa pohintuwumi hai Ia, hai bona bara ara kamasalami ba kamaeami ane hawekau i lindona Pue Ala.

1 Yohane 3:14

Ane mampokaahike halalunta, taisa katekabahanta hangko i kapate hai molambike katuwo maroa au bara mokahopoa. Agaiana tauna au barahe mampokaahi halalunda, bara manihe tekabaha hangko i kapate.

1 Yohane 3:19

Ane mampokaahike halalunta, manoto taisa ikita ananake Pue Ala, alana peisake mopatinda lalunta i lindoNa,

Pampetudungia 2:26

Hema au menangi, hai mobabehi apa au hintoto hai peundeaKu duuna i kahopoana, ina Kuweihe kuasa himbela hai kuasa au Kudokomi hangko i UmaNgku. Ina Kuweihe kuasa moparenta tauna i humalele dunia. Kamarohona kuasaNgku au Kuweihe iti nodo kamarohona lai besi. Kuasa iti, ina rapopopakarugi ope-ope iwalinda nodo kori tampo au rapengka.