Ibarani 4:12 - Sura Malelaha

¹² Lawi Ngkorana Pue Ala iami lolita au tuwo hai au makuasa. Meliu kamataruna hangko i piho au momata mpotimali. Piho peisa mebelai hawe i leho-leho buu hai ati buu. Nodo wori NgkoraNa Pue Ala metohu hawe i lalunta. Ngkora iti napake Pue Ala moparesa pekirinta hai tunggaiana lalunta.

Ibarani 4:12 ပူးပေါင်းရင်းမြစ်များ

Lukasi 8:11

Idemi lempona ngkora pandiriKu inona: tinuda au rahawu iti, lempona Ngkorana Pue Ala.

Yohane 12:48

Tauna au mosapuakaNa hai bara modoko lolitaNgku, arami au ina mohuku. Lolita au Kupahawe, itimi au ina mohuku i alo pebotusi.

Yohane 6:51

Ikomi paande au mendaulu mai hangko i suruga, paande au mepatuwo! Tauna au moande paande ide molambihe katuwo au bara mokahopoa. Paande au mepatuwo ide, lempona wataNgku au Kukira bona manusia molambi katuwo.”

Suro 2:37

Karahadina tauna bosa lolitana Peturu iti, tebalikimi lalunda, hai mekunehe i Peturu hai i surona Pue Yesu au ntanina, rauli, “Halalu-halalu, ane nodo, apami au hangangaa kibabehi?”

Suro 4:31

Karoonda mekakae, modua-duami sou au rapaidai, hai nakuasaimohe Inao Malelaha. Ido hai bai mpuumohe mopahawe Ngkorana Pue Ala i tauna bosa.

Suro 5:33

Karahadina tadulako lolitanda suro iti, rumpu ntepuumohe, hai rapeinaomi mopapate surona Pue Yesu.

Suro 7:38

Musa iti au mokampaihe to Yahudi au bosa i pada wungi. Ia hihimbela hai toiorunta hangkoia, hai ia wori au mohadi lolitana malaeka i Bulu Sinai. Iami au modoko Ngkora Ngkatuwo hangko i Pue Ala bona rapahaweake duuna ide-ide.

Roma 1:16

Barana maea mopahawe Ngkora Marasa. Lawi hema pea au mampoinalai Ngkora Marasa iti, kuasana Pue Ala mohoremahe hangko i huku dosanda, nguru-nguruna i to Yahudi, hawe-hawe wori i tauna au barahe to Yahudi.

1 Korintu 1:24

Agaiana i tauna au nakakiomohe Pue Ala, maroa to Yahudi ba au bara to Yahudi, bambari iti, naporara Kerisitu mopatongawa kuasaNa hai kapandena Pue Ala.

2 Korintu 2:17

Agaiana ikami, barangkai nodo tauna au mohaoki peahe doi hangko i popahawenda Ngkorana Pue. Mopahawengkai Ngkorana Pue hangko i kabulana lalungki anti pohintuwuki hai Kerisitu moula tunggaiana Pue Ala au motudungkai mampopolumao bagoNa. Iami au mampetirongkai.

2 Korintu 4:2

Kikaraohi hinangka babehia au mepakaea; bara ara au kiwuwuniangi; barangkai mopakanawo tauna, barangkai mobaliki tunggaiana Ngkorana Pue Ala. Kipahawe pea apa au tou i kanoto-notoana bona ope-ope tauna mopangaku katouna bambari au kianti. Napetirongkai Pue Ala!

Epesu 5:13

Agaiana ane tauna au kadake moita babehiami au maroa, ina tongawa kakadakena babehianda, alana arahe au ina mokabaha babehianda au makaindi, hai ina tuwo worihe i lalu kamabaa.

Epesu 5:26

Ope-ope iti Nababehi bona Napatanike mewali taunaNa, Nabahoike hangko i dosanta hai owai hai NgkoraNa,

Epesu 6:17

Hangangaa niharunga katehoremami au hangko i Pue Ala. Katehorema iti mewali nodo songko besi au mopakarohokau bona mantahakau. Hai hangangaa nipopobundu Ngkorana Pue Ala nodo piho au naweike Inao Malelaha.

1 Tesalonika 2:13

Ara mani hampaka au morua lalungki manguli ngkaia kamaroana i Pue Ala, iami Ngkorana Pue au nihadi hangko irikami, bara nidoko nodo lolita au hangko i manusia pea. Agaiana nidoko hai nipoinalai bambari iti, ami hangko i Pue Ala. Hai ide-ide, Ngkorana Pue Ala iti mokale liliu i lalumi, lawi mepoinalaimokau i Pue Yesu.

1 Tesalonika 5:23

Mekakaengkai i Pue Ala au moweike roa ngkatuwo, kiuli, “O, Pue Ala! Kiperapi bona babehianda to Tesalonika Nupamanoto liliu, duuna malelaha ntepuu katuwonda. Nuporangaihe i lalu katuwonda, maroa lalunda ba pekirinda ba watanda bona dati ara kamasalanda i kahaweNa hule Amputa Yesu Kerisitu.” Nodomi pekakaengki.

Ibarani 13:7

Hangangaa nikatuinao liliuhe tadulakomi au mopahaweamokau Ngkorana Pue Ala. Nipeita noumba tuwonda hawe i kapatenda, hai nipeulai pepoinalainda.

Ibarani 6:5

moisa mpuuhe kamaroana Ngkorana Pue Ala hai kuasana Pue Ala au ina tongawa i alo-alo au ina mai.

Yakobu 1:18

Napopewalimoke anaNa moula peundeaNa haduduaNa melempo i Ngkora Marasa, au bara ara kamasalana, bona hangko i ope-ope au Napopewali, ikitami au Napokatana ntepuu.

1 Peturu 1:23

Lawi molambimokau katuwo au wou, hai katuwo au wou iti bara hangko i manusia au peisa mate. Katuwo iti naweikau Pue Ala au bara ara kahopoana. Molambikau katuwo au wou lawi mepoinalaimokau i Ngkorana Pue Ala au tuwo hai au bara mokahopoa.

Pampetudungia 1:16

Taie koanaNa mokingki pitu oguna betue, hai hangko i ngangaNa mesuwu hamata piho momata pontimali au mataru. LindoNa mewangka nodo pewangka alo.

Pampetudungia 19:15

Hangko i lalu ngangaNa, mesuwumi hamata piho au mataru. Hai piho iti, Ia monangi ope-ope tauna i dunia. Roo indo, Naparentahe hai kamarohoNa au nodo kamaroho lai besi. Ia au moupi wua anggoro i lalu popiengaa anggoro. Popiengaa anggoro iti iami karumpuna Pue Ala au makuasa.

Pampetudungia 19:21

Mewali, Topesawi i dara au bula mopapate ope-ope surodadona binata, Nabatahe hai pihoNa au mesuwu hangko i ngangaNa. Hai roo indo, hawe mpuumohe tadasi. Tadasi iti, moandehe onto tauna au rapapate hawehe mabuhu.

Pampetudungia 2:16

Ido hai Kuuliangaakau, menosomokau hangko i dosami iti! Ane bara, ina maiNa irikamu hai Kupombealaahe tauna au mampeulai paturo au sala iti hai piho au mesupa hangko i ngangaNgku.

Pampetudungia 2:23

Ope-ope tauna au meula iria ina Kupapatehe. Hangko inditi, ina tongawa i ope-ope jumaa kaIkona au moparesa pekiri manusia hai lalu manusia. Ina Kuhurungikau hintoto hai babehiami.

Pampetudungia 20:4

Roo indo, kuita bahangkia kadera kadatua au rapohudai tauna au raweihe kuasa mobotusi kara-kara. Kuita wori tanoananda tauna au rabohoki tambolonda anti popangakunda kaYesuna Ampunda hai popahawenda Ngkorana Pue Ala. Tauna iti, barahe hambela menomba i binata au kadake ba i lengge binata iti, hai bara worihe modoko tanda binata i wingkenda ba i taienda. Ido hai tuwo hulehe hai moparentahe hihimbela hai Kerisitu i lalu hasabu parena.