Ibarani 13:17 - Sura Malelaha

¹⁷ Nipeulaimi hawanda tadulakomi hai mengkorukau irihira. Lawi ihira au mokadipura katuwomi, hai au hangangaa mohanaihe Pue Ala kana i pobagonda. Nipeulai hawanda bona matanahe mobago. Ane bara nipeulai hawanda, ina masusa lalunda, hai ane nodo barapi ina ara pobunduana irikamu.

Ibarani 13:17 ပူးပေါင်းရင်းမြစ်များ

Lukasi 16:2

Ido hai topebuku iti mokakio topobagona, nauliangaa, ‘Ara lolita au rapahaweana kana i pobagomu. Ba tou ba bara? Mewali, hangangaa nupasilolonga ope-ope suramu bona kuparesa. Roo naparesa, nauli topebuku iti, Oio barapoko ina mokadipura doingku hai anu-anungku.’

Suro 20:28

Maroa-roakau datikau madosa, hai nikadipura maroa ope-ope jumaa au napoinalaiakau Inao Malelaha. Hangangaa nikadipurahe, nodo hadua toporewu mamporewu dimbana, lawi Anana Pue Ala mate mobaiari huku dosanda bona mewalihe taunana Pue Ala.

Roma 14:12

Mewali, ikita ope-ope hangangaa mohanai Pue Ala kana i babehianta.

1 Korintu 16:16

bona niula paturonda hai paturonda ope-ope ranganda au mampopolumao liliu bagona Pue.

Epesu 5:21

Hangangaa mombepengkoruikau hadua hai hadua anti pebilami i Kerisitu.

Pilipi 1:4

Bela-belami kupekakaea, mekakaena i lalu katana,

Pilipi 2:12

Mewali, halalu au kupokaahi, noumba kanipeulainami hawangku tangangku mani ara hihimbela hai ikamu, hangangaa melumbu mani ide-ide i tempoku karao hangko irikamu. Kuperapi bona nipamaroa-roa babehiami hintoto hai babehia tauna au nahorema Pue Ala hangko i huku dosanda. Mengkorukau i Pue Ala, hai hangangaa langakau mobabehi apa au kadake.

Pilipi 2:16

i lalu pobambarimi Ngkora Marasa au mopaara katuwo maroa. Mewali halalu, ane nodo liliu babehiami, ina matana lalungku i kahawena hule Kerisitu, lawi babehiami iti ina mopakanoto kadana mbero-mbero pobagongku i olomi; ara mpuu wuana.

Pilipi 2:29

Mewali, hangangaa nidoko i katana lalumi nodo au nibabehi i ope-ope halalunta hampepepoinalai. Nibila wori ope-ope tauna au himbela poantinda hai ia.

Pilipi 3:18

Lawi apa au paka kuuliangaakau, iti wori au kuuliangaa mbulikau ide-ide i lalu poteriangku: arahe bosa tauna au manguli katoSaraninda, agaiana kadake babehianda hai mosapuakahe tunggaiana kapatena Kerisitu i kau mombehape.

Pilipi 4:1

Mewali halalu au kupokaahi hai au kukabilai: nipakaroho pepoinalaimi i Pue. Ikamumi au kupomahile hai au kupokatana lalu.

2 Tesalonika 3:14

Rapana, ara tauna au bara raunde mampeulai apa au kiuki i lalu sura ide, nipekatandaihe. Ineehe nipohintuwua bona maeahe.

1 Timotiu 5:17

Penatua au maroa pobagonda, hintoto mpuuhe rawei peadai au rombela hangko i tauna ntanina, pelumbunami penatua au mepaturo hai au mopahawe Ngkorana Pue.

Ibarani 13:24

Nipahaweangkai tabeangki i ope-ope tadulakomi hai i ope-ope halalu hampepepoinalaimi inditi. Halalumi hampepepoinalai to Italia mopakatu worihe tabeanda irikamu.

Ibarani 13:7

Hangangaa nikatuinao liliuhe tadulakomi au mopahaweamokau Ngkorana Pue Ala. Nipeita noumba tuwonda hawe i kapatenda, hai nipeulai pepoinalainda.

Yakobu 4:7

Ido hai kuweikau lolita: mengkorukau i Pue Ala hai niewa Datu Tokadake hai batena meloho hangko irikamu.

1 Peturu 5:5

Nodo wori ikamu au mangura mani, hangangaa mengkorukau i tosae. Ope-opekau hangangaa mengkaiwoi hai mombetulungi. Lawi: “Pue Ala moewahe tauna au mampemahile, agaiana tauna au mengkaiwoi Natulungihe.”