Epesu 2:16 - Sura Malelaha

¹⁶ Anti kapateNa i kau mombehape, Kerisitu mopahintuwu to Yahudi hai tauna au barahe to Yahudi. Hai hangko inditi, Napahintuwumoke ope-ope hai Pue Ala, alana tunami posisala iti.

Epesu 2:16 ပူးပေါင်းရင်းမြစ်များ

Roma 5:10

Hangkoia, tanganta mani mampoiwali Pue Ala, Ia motudumi mai AnaNa mate mohuru dosanta bona hintuwuke hai Ia. Mewali, ide-ide hintuwumoke hai Pue Ala, hai Yesu ara liliu i lalu katuwonta. Ido hai manotomi katekabahanta hangko i karumpuna Pue Ala i alo pebotusi.

Roma 6:6

Taisa halalu, katuwonta au hangkoia rapapatemi hihimbela hai Kerisitu i kau mombehape bona dosa barapi makuasa i lalu katuwonta hai barapoke napohawi dosa.

Roma 8:3

Barake peisa tekabaha hangko i kuasa dosa lawi bara tabuku moula aturana Musa anti kamaledenta. Agaiana apa au bara peisa tababehi i atura agama anti kamaledenta, Napopewalimi Pue Ala, i potuduNami mai AnaNa i dunia mewali manusia. WataNa AnaNa Napahimbela hai wata manusia au madosa. Hai AnaNa iti mokira wataNa rapapate mohuru dosa manusia. Mewali, hangko i kapateNa, Pue Ala monangi kuasa dosa au ara i manusia.

Roma 8:7

Tauna au moulahe peundeana lalunda au kadake, moewahe Pue Ala. Barahe mengkoru i hawana Pue Ala, lawi bara rabuku.

1 Korintu 10:17

Lawi haogu pea roti au rakira-kiraake, hai taande. Lempona, ikita au bosa ide mewalimoke hawata-wata hai Kerisitu.

Galatia 2:20

Hai ide-ide barapona tuwo moula peundeaku haduduangku, agaiana Kerisitumi au tuwo i lalu katuwongku. Mewali, tangangku mani tuwo i dunia ide, batengku mepoinalai i Anana Pue Ala au mampokakaiana hai au mokira wataNa rapapate bona mewalina manoto i peitana Pue Ala.

Epesu 3:6

Tunggaia iti iami: tauna au barahe to Yahudi molambi worihe pewatina Pue Ala hihimbela hai to Yahudi. Napopewalimohe Pue Ala hawata-wata hai to Yahudi bona molambi worihe apa au nadandi Pue Ala i ope-ope anaNa. Iti ralambi anti pohintuwunda hai Kerisitu Yesu, lawi mopoinalaihe Ngkora Marasa.

Epesu 4:4

Ikita ope-ope au mepoinalai i Yesu Kerisitu, nodo peake hawata-wata, hai hadua pea Inao Malelaha au mampaidaike. Hai himbela wori peharunganta ope-ope, lawi nakakiomoke Pue Ala mewali anaNa.

Kolose 2:14

Anti kapatena Yesu i kau mombehape, Pue Ala mogewomi ope-ope dosanta au teukimi, hai Nakabahamoke hangko i atura-atura au ina moantike i pehuku.

Kolose 3:15

Pue Ala mokakiokau hai Napopewalikau hawata-wata anti pohintuwumi hai Kerisitu. Mewali, nipakaroho liliu kahintuwumi au hangko i Kerisitu. Hai niuli liliu ngkaia kamaroana i Pue Ala.