2 Tesalonika 3:2 - Sura Malelaha

² Niperapi wori bona Pue Ala mokabahangkai hangko i tauna au kadake hai au mepopeahi-ahi, lawi bara ope-ope tauna mepoinalai i Ngkorana Pue Ala.

2 Tesalonika 3:2 ပူးပေါင်းရင်းမြစ်များ

Matiu 17:17

Nauli Yesu i tauna bosa hai i topeguruNa, “Noumbarikau dide? Moapari pane bara mani maroho pepoinalaimi? Nisapuaka mani peundeana Pue Ala! Hangkia maniri kamahaena ina hihimbelaNa hai ikamu? Hangkia maniri kamahaena hangangaa Kusabarai peewami? Anti mai anangkoi iti!”

Matiu 23:23

Hurewumokau, guru agama hai toParisi! Maroa i raoa peakau! Parenta au koi nipeulai haha. Mogalori tuda-tuda au koi i tabangaami nodo hare, suderei hai bunga-bunga i bondemi, nipopenomba hangkira hampulo i Pue Ala. Agaiana parenta mahile nodo kahintimba, pepokaahi hai kamatundu bara nipopolumao. Katouana itiri au hangangaa nipeulai, hai inee worikau mokoi parenta au ntanina.

Lukasi 18:8

Bara! Batena holiga kaNatulunginta. Agaiana ane hawe suleNa, Iko, Ana Manusia, ara mani pae tauna au mepoinalai Kulambi i dunia ide?”

Suro 13:45

Roo indo, mahinamohe to Yahudi moita kabosana tauna au mampehadingi lolitana Paulu. Ido hai rapapakoi hai rasapuaka ope-ope lolitana.

Suro 13:50

Agaiana to Yahudi mohuwekihe lalunda totosae au raadai i wanua iti hai towawine au pebuku i wanua iti au mepoinalaihe i Pue Ala, pane mampopeahi-ahihe Baranaba hai Paulu duuna rapopesuwu hangko i wanua Antiokia.

Suro 14:2

Agaiana to Yahudi au barahe mepoinalai mohuwekihe lalunda tauna bosa au bara to Yahudi bona mokahihihe tauna au mepoinalai i Pue Yesu.

Suro 17:5

Agaiana to Yahudi au bara mepoinalai, mahinahe i Paulu hai Silas. Ido hai mokakiomohe tauna au lohehe mobago hai au mohuda-huda peahe i pobalu-balua. Bosamohe teruhu, hai mobabehimohe silaka i lalu wanua. Kahawenda i sou au rapaidai Paulu hai Silas, pesuanda peami. Tunggaianda mohakahe Paulu hai Silas hai raanti lao i lindonda tauna bosa,

Suro 25:27

Lawi moula pelambiaku, bara hintoto tauna raanti lao i pebotusia Kaisar ane bara mani manoto apa au rasalaia.”

Suro 28:24

Arahe au mampoinalai lolitana, hai ara worihe au bara mampoinalai.

Roma 10:16

Arami tauna au ratudu moanti bambari maroa, agaiana barahe ope-ope tauna mampoinalai bambari maroa iti. Ara lolitana nabi Yesaya hangkoia au manguli, “Pue, arahe pae au mepoinalai i bambari au kiantiahe?”

Roma 15:31

Mekakaekau i Pue Ala bona Nakampaina hangko i tauna au barahe mepoinalai i Pue ane laona deade i tampo Yudea. Mekakae worikau bona taunana Pue Ala au i Yerusale ina modoko maroahe doi petulungi au kuanti ide.

1 Korintu 15:32

Tangangku inde i wanua Epesu, raewana tauna au nodo binata maila. Ane rapana tomate bara ina rapatuwo hule, apa bunduna hinangkana au kutodiha iti? Ane rapana tomate bara ina rapatuwo hule agina taula lolita au manguli node: “Maande hai maenu peamoke mohaoki katana-tana, lawi hangalo rongalo tuwoke, hai roo indo matemoke.” Nodomi lolitanda tauna hanggaa.

1 Tesalonika 2:18

Arami tunggaiaki lao mosondakikau. Iko Paulu, bahangkiami belana kutunggai lao irikamu, agaiana Datu Tokadake mohomboki liliuna.

2 Timotiu 4:17

Nauri bara ara rangangku au mamporangaina, agaiana naporangai liliuna Pue. Naweina karoho mopahopo bagongku mopahawe Ngkora Marasa bona ope-ope tauna au barahe to Yahudi peisahe mohadi bambari iti. Kahopoana, tekabahana hangko i kapate.