2 Korintu 8:8 - Sura Malelaha

⁸ Au kuuliangaakau ide bara nodo parenta. Tunggaiaku bona kupopaisaakau noumba kamahilena ahinda to Makedonia mokira doi petulunginda i ranganda. Hai hangko inditi, peisa kuita noumba kamahilena ahimi.

2 Korintu 8:8 ပူးပေါင်းရင်းမြစ်များ

Roma 12:9

Nipokaahi rangami hangko i kabulana lalumi, nikaraohi babehia au kadake, hai nibabehi au maroa.

1 Korintu 7:12

Kaliliuana halalu, idemi lolitangku (ide lolitangku haduduangku, bara hawana Pue Yesu): ane arahe tohamboko au barahe to Sarani, hai tobalilona iti mosaranimi, inee mampogaaki towawinena au bara mani mosarani, asala towawine iti naunde tuwo sambela hai ia.

1 Korintu 7:25

Ide-ide kupaturoahe tauna au bara mani motambi. Paturongku ide bara parenta hangko i Pue Yesu. Agaiana kupaturokau moula pekiringku, hai peisana rapoinalai, lawi naangkana Pue mewali suroNa anti ahiNa.

1 Korintu 7:6

Au kuuli ide, bara mewali hambua parenta irikamu, agaiana paturongku pea irikamu.

2 Korintu 6:6

I paka-pakana, kipakanoto kaikamina topobagona Pue Ala, lawi malelaha babehiangki, mopahawengkai Ngkorana Pue Ala i kanoto-notoana, sabarangkai, maroa lalungki i ope-ope tauna, nakuasaingkai Inao Malelaha, hai mampokaahingkai hangka rangangki hangko i kabulana lalungki.

2 Korintu 8:10

Mewali, idemi lolitangku irikamu halalu: agina nipahopo bagomi au nipepongka pare liu, lawi ikamumi au nguru-nguruna motunggai mogulu doi au peisa rapakatu i rangami au ara i lalu kamakuranda.

2 Korintu 8:24

Mewali, kuperapi bona nidoko maroahe, hai nitudungiahe ahimi bona ope-ope jumaa moisa kamaahimi hai katouna lolitangki au motoiakau.

2 Korintu 9:2

Kuisa niunde mpuu metulungi, ido hai kutoia amimokau i to Makedonia, kuuliangaahe: “Ane halalunta au maidahe i tampo Akaya, mepongka pare liu, masilolongamohe motulungi halalunta hampepepoinalai au meahi-ahi tuwonda.” Mewali, kamohadinda kamaahina lalumi mokira doi iti, tehuweki worimi lalunda, alana bosahe au mokira petulunginda.

2 Korintu 9:7

Agina hadua-hadua tauna mokira popenombana i sukana kabulana laluna. Ineekau mokira hangko i kasusa lalu, hai ineekau mokira anti karapari-pariami. Lawi Pue Ala mampokaahi tauna au mokira hangko i katana lalu.

Epesu 4:15

Agaiana ina tapatongawa paturo au tou hangko i lalunta au buke ahi, bona i paka-pakana, kamahae-haea kanoto-notoake duuna mewalike nodo Kerisitu, au mewali Tadulakonta.

Epesu 6:24

Pue mowati ope-ope tauna au mampokakaia Amputa Yesu Kerisitu hai ahi au bara ara kahopoana. Hangko iriko PAULU

Ibarani 10:24

Hangangaa mombekakamatake hai mombehuweki mpolaluke bona mombepokaahike hangko i lalunta mpuu hai mobabehi liliuke apa au maroa.

1 Peturu 1:22

Ide-ide, malelahamokau anti pampeulaimi paturo au tou, ido hai niisami mampokaahi halalumi hampepepoinalai i katou-touana. Mewali kuweikau lolita bona mombepokaahikau hadua hai hadua hangko i lalumi mpuu.