2 Korintu 8:23 - Sura Malelaha

²³ Ane arahe tauna au mekune kana i Titu, niuli iami rangangku au hampopobago au kutudu lao motulungikau. Hai ane arahe au mampekune kana i rangana au rodua, ihirami tauna au ratudu jumaa inde bona laohe motulungikau i bagomi. Tauna ide mampomahile hangana Kerisitu.

2 Korintu 8:23 ပူးပေါင်းရင်းမြစ်များ

Lukasi 5:10

Ara worihe rodua rangana Simo Peturu au mampotingkara. Hanganda iami Yakobu hai Yohane, ananahe Sebedeus au mobago sambelahe hai Simo Peturu. Nauli Yesu i Simo, “Ineeko langa. Mepongka ide-ide, barapoko modala ikane, agaiana manusiami au nudala.”

Lukasi 5:7

Mokawemohe ranganda au ara i duanga ntanina bona maihe medurei. Mai mpuumohe, hai roogu duanga iti raihii ikane duuna ina tirimi anti kamantimina.

Yohane 13:16

Tou mpuu lolitaNgku ide: hadua hawi bara meliu karabilana hangko i ampuna. Hadua tudua bara meliu karabilana hangko i tauna au metudu.

1 Korintu 11:7

Tobalilo au mekakaehe ba mopahawe lolitana Pue Ala, ineehe metolombu, lawi tobalilo rapopewali nodo Pue Ala bona hangana Pue Ala rapomahile. Towawine hangangaa metolombuhe lawi towawine rapopewali bona hangana tobalilo rapomahile.

2 Korintu 12:18

Hangkoia kuperapi bona Titu lao mosondakikau, hai ara wori hadua halalunta au kutudu mamporangai. Ba naakalangikau Titu i tempo iti? Niisato halalu, Titu hai iko hampepekiri peangkai, himbela poantiki.

2 Korintu 7:6

Agaiana Pue Ala au mopalindo tauna au masusa lalunda, mopalindowomongkai i kahawena Titu.

2 Korintu 8:16

Kuuli ngkaia kamaroana i Pue Ala, lawi Ia au mampopokale laluna Titu pane madota motulungikau. Tunggaiana Titu iti, himbela wori hai tunggaiaki.

2 Korintu 8:18

Kitudu wori hadua halalunta lao irikamu hihimbela hai Titu. Ia ratoia i ope-ope jumaa anti pobagona mobambari Ngkora Marasa.

2 Korintu 8:19

Ia rapilei worimi ope-ope jumaa inde bona mamporangaingkai i polumaongki ane laongkai moanti doi petulungimi i halalunta hampepepoinalai au ara i lalu kamakuranda. Lawi tunggaiana polumaongki ide bona hangana Pue rapomahile, hai bona tongawa kamahilena ahinta i halalunta hampepepoinalai.

2 Korintu 8:22

Ara mani hadua tauna au kitudu lao irikamu hihimbela hai ihira. Kiisa kamadotana medurei i lalu bagona Pue, lawi kisabikimi babehiana i lalu paka-pakana bago. Hai ide-ide, napeinao mpuu motulungikau, lawi naisa tunggaiami motulungi halalunta hampepepoinalai.

2 Korintu 8:6

Ido hai motudungkai Titu lao irikamu lawi iami au mampepongka bago ide, bona modureikau mogulu doi petulungimi i halalumi to sarani au meahi-ahi tuwonda. Mewali ide-ide kitudu mbuli lao irikamu bona mopaliliu bago iti i olomi.

Pilipi 2:25

Ane halalunta Epafroditus, au mahaemi nitudu mai modureina, kutudumi mesule irikamu. Ikami rodua, nodongkai tauna au hihimbela lao mombeala, lawi hampopobagongkai i lalu bagona Pue, hai natulungimona i lalu kaparingku.

Pilipi 4:3

Hai kuperapi irikamu rangangku hampopobago (Sunsugos) au tetida lalumi, nitulungi wohiraia towawine au rodua iti bona ineehe mosisala. Tangangku mani hihimbela hai ikamu, madotahe mamporangaina mopahawe Ngkora Marasa hihimbela hai Klemens hai rangangku au ntanina au hampopobago. Hanganda ope haha teuki i lalu Sura Ngkatuwo.

Kolose 1:7

Ngkora Marasa iti nihadi hangko i Epafras, rangangki hampopobago au kipokaahi. Epafras iti iami hawina Kerisitu au mobago liliu motulungikau.

1 Tesalonika 2:2

Niisami tuntukana halalu! Hangko damaningkai hawe i boeami, rapopeahi-ahingkai hai rakakabosaingkai i wanua Pilipi. Hai nauri raewangkai tauna, Pue Ala mopakaroho lalungki datingkai langa mopaliliu pobagongki mopahaweakau Ngkora Marasa au hangko i Pue Ala.

2 Timotiu 4:10

Lawi ina barapi ara au mamporangaina inde. Napalehimona Demas, lawi laomi i Tesalonika mohaoki katuwona i dunia ide. Kreskes, lao i Galatia. Titu lao i Dalmatia.

Titu 1:4

Sura ide kupakatu irio Titu, au kupoanamoko, lawi hampepepoinalaike. Mekakaena i Pue Ala Umanta hai i Kerisitu Yesu Datu Topehoremanta bona Nawatiko, hai Naweiko roa ngkatuwo.

Pilemo 1:17

Mewali, ane nuimbana halalumu hampepepoinalai, kuperapi bona nudoko hule Onesimus nodo kanudokongku.

Pilemo 1:24

Tabeanda wori halalungku au hampopobago, iami Markus, Aristarkus, Demas hai Lukasi.

3 Yohane 1:8

Mewali, hintoto mpuuhe tatulungi, lawi ane tababehi nodo, lempona mobago sambelake i lalu pobagonda moanti bambari au tou.