1 Tesalonika 5:8 - Sura Malelaha

⁸ Agaiana ikita ide iamoke tauna au ara i kamabaa; ido hai pekirinta hangangaa manoto. Hangangaa mepoinalai liliuke i Pue Ala hai hangangaa mampokaahike ranganta, hangangaa tapakaroho peharaunganta i kaNahoremanta Pue Ala. Itimi parewa pombeala au ina tapolaba moewa kamakaindi.

1 Tesalonika 5:8 ပူးပေါင်းရင်းမြစ်များ

1 Korintu 13:13

Mewali, ide-ide, ara talu pakana au hangangaa tababehi: mepoinalaike i Pue Ala, meharungake i dandiNa, hai maahike i hangka ranganta. Agaiana hangko i talu pakana iti, au melumbu kamaroana iami ahi.

2 Korintu 6:7

Kipakanoto kaikamina topobagona Pue Ala, lawi mopahawengkai paturo au tou. Kipopolumao bagongki hangko i kuasa au kihumba hangko i Pue Ala. Kibabehi liliu apa au manoto. Babehiangki au manoto peisa rapandiri nodo piho hai laba, lawi ane manoto babehiangki, kibuku moewa iwalingki, hai kibuku mantaha.

Galatia 5:5

Agaiana ikita halalu, anti peninina Inao Malelaha, meharungake i Pue Ala au mopamanotoke i peitaNa anti pepoinalainta i Kerisitu Yesu. Hai batena iti au taharunga.

Epesu 6:11

Hangangaa mopakekau hinangka parewa pombeala au napasilolongaamokau Pue Ala bona maroho peangkami moewa akalana Datu Tokadake.

Epesu 6:23

Halalungku hampepepoinalai! Kuharunga Pue Ala Umanta hai Pue Yesu Kerisitu ina moweikau roa ngkatuwo. Hai kuharunga wori bona Pue Ala ina motambai liliu ahimi hai pepoinalaimi.

1 Tesalonika 5:5

Ikamu ope-ope arakau i lalu kamabaa. Lempona, mobabehikau apa au maroa; barake nodo tauna au ara i lalu kamakaindi.

2 Tesalonika 2:16

Pue Ala motudungiake ahiNa, hai mopakaroho lalunta hawe i hae-haena, hai Naweike peharunga au maroa anti kabulana laluNa. Ido hai mekakaengkai i Amputa Yesu Kerisitu hai Pue Ala Umanta bona Napakaroho hai Napatetida lalumi bona maroa ope-ope lolitami hai babehiami.

Ibarani 6:19

Peharunganta ide nodo besi pantio kapala tahi au mewali pekingkiata au maroho bona dati marugi pepoinalainta. I lalu Souna Pue Ala, ara rindi bana au mohomboki rara manusia datihe peisa mesua i lalu Hologa au Malelaha Ntepuu. Agaiana ikita, barapi ara au mohomboki raranta hawe i lindona Pue Ala.

1 Peturu 1:13

Mewali, halalu, anti kamarohona peharungami, ido hai kuuliangaakau: nipakanoto pekirimi, nirempeki peundeana lalumi au kadake, hai nipakaroho peharungami i kabulana laluNa au ina raweikau ane hawe hulemi Yesu Kerisitu.

1 Peturu 2:9

Agaiana ikamu, halalu, napileimokau Pue Ala au mampopewalikau nodo tadulako mpenomba au mampopolumao bago mpenomba i Datunta. Napatanikau mewali kiraNa hai taunaNa au malelaha. Pue Ala mopileikau hai mokakiokau hangko i kamakaindi mesua i lalu kamabaaNa au merae ntepuu bona mopahawekau bagoNa au maroa i ope-ope tauna.

1 Yohane 1:7

Agaiana ane tuwoke i lalu kamabaa, nodo Pue Ala ara i lalu kamabaa, batenta mohintuwu hadua hai hadua, hai wahena Pue Yesu, Anana Pue Ala, ina mobahoike hangko i dosanta.