1 Peturu 5:2 - Sura Malelaha

² Kuperapi bona nikadipura maroa halalumi hampepepoinalai i Pue Ala au ara i olomi. Lawi ihira iti nodo dimba au napoinalaiakau Pue Ala niporewu. Niporewuhe hangko i kamaluluna lalumi moula peundeana Pue Ala; inee nipobago iti nodokau au rapari-paria. Nikadipurahe hangko i kabulana lalumi. Inee peakau mohahaoki rasi.

1 Peturu 5:2 ပူးပေါင်းရင်းမြစ်များ

Lukasi 12:32

“Ikamu au meula Iriko, ineekau langa, nauri barakau bosa. Lawi hangko i kabulana laluna Pue Ala Umami, mopileikau molambi katuwo maroa i lalu poparentaNa.

Suro 20:29

Kuisa mpuu halalu, ane paduna hangko inde, batena ina hawehe tauna au kadake au mampopeahi-ahi tauna au niporewu iti, nodohe serigala mampopeahi-ahi dimba.

Suro 21:13

Agaiana nahanairingkai, nauli, “Moapari hai moteriakau? Ineekau mopamalede lalungku! Kehapiri rahiluna ba rapapate mpuuna anti peulangku i Pue Yesu, masilolongamona lao i Yerusale.”

Roma 1:15

Idomi hai kupeinao mpuu mopahawe wori Ngkora Marasa irikamu au i Roma.

1 Korintu 9:7

Ara pae hadua surodado au moongkosoi watana haduduana ane lao mombeala? Hintoto mpuu ane ope-ope tauna molambi kiranda hangko i pobagonda. Tauna au mowia, peisahe maande wua tuda-tudanda. Tauna au mamporewu dimba, peisahe moenu susu hangko i porewunda.

1 Timotiu 3:3

Bara peisa au malangu-langu ba au paka mobungka-bungka. Hangangaa au maalusu poantina, au mohintuwu hai rangana, hai au bara mohaoki pea doi.

1 Timotiu 3:8

Tauna au rapilei mewali diaken hangangaa nodo wori poantinda. Hangangaa manoto babehianda hai au hintotohe rabila. Barahe au mobatantimali ba au malangu-langu ba au mohaoki peahe doi.

Titu 1:11

Tauna iti hangangaa nukontohe, ineehe nupaliu mepaturo, lawi moantihe pepawuli hai pepaturonda au bara hintoto i tambi-tambina. Hai tunggaianda mepaturo bona molambi peahe rasi. Babehianda iti mepakaea mpuu.

Titu 1:7

Tauna au mewali penatua, ihirami au mokadipura bagona Pue Ala. Ido hai hangangaa nuangka tauna au bara ara au peisa rasalaia, au bara mampemahile ba au masodo, au bara malangu-langu ba topombetie ba au mohaoki pea doi.

Titu 2:14

Yesu mokirami wataNa rapapate mohuru dosanta bona Nakabahake hangko i ope-ope babehianta au kadake, hai Napopewalike taunaNa au malelaha hai au madota mobabehi au maroa.

Titu 3:1

Nupopaingaahe to Sarani au ara inditi bona mengkoruhe i topoparenta hai i totosae boea. Hangangaa mampeulaihe hawanda topoparenta hai mampopolumaohe ope-ope bago au maroa.

Pilemo 1:14

Agaiana bara turu inaongku motaha inde ane bara mani himbela pekirinta. Peundeaku bona apa au nubabehi, nubabehi mpuu hangko i lalumu. Barako kupari-paria moula peundeaku.

Ibarani 12:15

Mainga-ingakau dati ara rangami au mousuli hangko i Pue Ala hai mosapuaka ahiNa. Maroa-roakau datihe ara tauna au hawe mewali rasu i olomi, hai kahopoana mopakarugi pohintuwumi alana bosa tauna teanti i lalu dosa.

2 Peturu 2:3

Guru au mepakanawo iti mohaoki peahe doi, mewali ina rapahaweakau lolita au rababehi haduduanda bona molambihe rasi hangko irikamu. Agaiana ara pehuku au mahaemi napasilolongaahe Pue Ala, hai karahukunda iti ina holiga mewali.